مرحلة المراهقة من أصعب المراحل اللى بتشكل شخصية ولادنا من أعراضها   حالة الجوع المستمرةو اللى بتخلى الأم امام خيارين:

يا تركب قفل بمفتاح للتلاجة
أو تملها بأنواع الأكل الصحى

و ده عشان الطفل بيعيش مرحلة نمو مهمة بيحتاج فيها جسمه لسعرات حرارية كبيرة بتزيد عن الكبار

الولاد : جسمهم بيحتاج من 2200 : 3200 سعر حراري في اليوم .
البنات: بتحتاج حوالى 1800 : 2400 سعر حراري في اليوم

كمان الحالة النفسية و تغير الهرمونات بيدخلهم فى حالات مزاجية كتير أوى.

ده اللى بيخليه ولادنا يكلوا أى حاجة تقابلهم و طبعا الأكل السريع و الحلويات ممكن يديهم السعرات دى كلها فى وجبة واحدة.

بس طبعا مش بتكون صحية لان الأكل ده أغلبه دهون مضرة، توابل أو سكريات.

العادات السيئة فى الأكل ممكن تزود وزن الطفل و طبعا دى مشكلة تانية لان مرحلة المراهقة بيخليه مهتم جدا بوزنه و شكله.

مع ضغوط المرحلة ممكن تخليه المراهق عرضة لاضطرابات الأكل ذى فوبيا زيادة الوزن أو البوليميا.

11 نصيحة تهمك عن الأكل الصحى للمراهقين

1. علمي طفلك أزاى يختار الأكل الصحى و أملى تلاجتك بسناك متنوع وصحي مثل الجزر، الخيار ،الزبادي ،العنب و الفواكه المجففة.
2. عودى الطفل يقرأ تاريخ الأنتاج و محتويات أي منتج يشتريه و يعرف نسبة الدهون المشبعة و أضرارها.
3. دخلى الحبوب الكاملة لنظامه الغذائى ذى الشوفان و العيش اللى معمول من القمح الكامل و جنين القمح.
4. طبعا هما مش هيبطلوا يكلوا وجبات سريعة خالص بس ممكن لما يعرفوا الأضرار يقللوا شوية يعنى مرة أو اتنين فى الشهر.
5. أستبدلى السناكس المعلبة ذى البطاطس و المقرمشات اللى مليانة مواد حافظة بالفشار فى البيت و ألواح الطاقة من الشوفان وحبوب الكورن فليكس مع الشيكولاته و الفواكه المجففة.
6. أوعى تطوعي بنتك لو حبت تلغى أى وجبة عشان تخس لان سنهم محتاج 3 وجبات منتظمة وصحية.
7. كمان مننساش السناك بين الوجبات و دى ممكن تكون فاكهة أو خضار أو ألواح الطاقة الصحية لان جسمهم محتاج طاقة .
8. حافظى على مستوى الحديد فى الروتين الغذائى للطفل عشان نبعد عن مشاكل الأنيميا.
9. ساعدي طفلك يبعد عن مشروبات الصودا و يبدلها بالعصاير و السموزى الصحى.
10. أبعدى عن المقليات على قد ما تقدرى و حببي ولادك فى المشويات طبعا عشان نقلل نسبة الدهون المضرة من القليه.
11. دخلى منتجات الألبان فى وجباته اليومية و لو مش بيحب اللبن ممكن ندخله فى أصناف الأكل المختلفة ذى :

•  السموزى ( باللبن أو الزبادى)
• الأرز المعمر صنف حادق أو الأرز بلبن كصنف حلو
• كريم كرميل
• اعملي له أصناف البسكويت أو الكيك باللبن فى البيت.
• المكسرات مهمة للطفل طول مراحل النمو لأنها كمان بتساعد فى تقليل القلق و الأكتئاب.

حبي و لادك و عوديهم على العادات الصحية للتغذية لأن المرحلة المراهقة من أهم مراحل النمو لطفلك و لو أتعود يراعى جسمه و صحته بشكل متوازن .

كمان علمي الطفل يحب الأعتدال فى كل شى عشان يبعد عن مشاكل اضطرابات الأكل و السمنة فى المستقبل.

أيه النظام الغذائى المتبع لطفلك؟