أسباب الطلاق الأكثر انتشارًا وإزاي تتعامل معاها نفسيًا

الطلاق…كلمة بنسمعها كتير جدًا الأيام دي وللأسف النسبة بتزيد بشكل مخيف في السنوات الأخيرة أو بمعنى أدق من سنة 2009، وده طبقٌا للبينات اللي بتصدر من الجهاز المركزي للتعبئة العامة والإحصاء. لكن الأهم من معرفة نسبة الطلاق بتزيد قد ايه كل سنة…لأنها مش هتفرق معاك وبمنتهى البساطة لو سألت السؤال ده لأي حد هيقولك “مابعدش يا جيمي”….عايزين نعرف ايه هي أسباب الطلاق؟ ليه الموضوع زاد أوي كده بشكل مبالغ فيه؟!
يعني شخصيات الناس مثلا اتغيرت للدرجة دي؟! هل الصحة النفسية بتختلف بعد الجواز؟ هل هي مشاكل جنسية اللي بتكون السبب في الطلاق؟! طبعًا كل دي أسباب قوية بتخلي الطلاق هو القرار المناسب لإنهاء العلاقة بين الطرفين. لكن برده في تفاصيل أكتر محتاجين نتكلم فيها……تعالوا كده نشوف مع بعض المقالة دي هتقولنا ايه

أكتر 4 أسباب شائعة للطلاق

1- عدم التواصل:

الطبيعي انه يكون في تواصل بين الشريكين في كل أمور الحياة اليومية، لكن للأسف مش ده اللي بيحصل دايمًا وبتكون المناقشات اليومية عبارة عن هناكل ونشرب ايه؟ يلا ندفع مصاريف المدرسة …ايه الأقساط اللي علينا…هنجهز حاجات رمضان والعيد امتى؟ كل ده طبعًا مهم وأكيد مش هنقولك ماتتكلمش فيه … ولكن مش هو ده التواصل خالص!
عدم التواصل بمعنى اني مش بقول اللي جوايا أول بأول …يعني اتضايقت من الطرف التاني بسبب موقف معين …مش بواجه وبكتم في نفسي وأسكت…غير بقى فكرة مانت لو بتحبني كنت فهمت أنا زعلانة ليه علشان الاهتمام مابيطلبش …أو مثلًا مشاكل في العلاقة الجنسية وللأسف ناس كتير بتحرج تتكلم فيها أو تلجأ لدكتور نفسي أو حد متخصص في العلاقات الجنسية….وفوق ده كله ضعف مهارة التواصل…بمعنى اني ممكن اكون الشخص اللي بواجه لكن الطريقة بيكون فيها شتيمة وإهانة وضرب وعدم إحترام للطرف التاني أو انتقاد عمال على بطال.

2- الخيانة:

طبعًا حدث ولا حرج من جروبات السوشيال ميديا خصوصًا اللي بتكون Ladies Only يعني ماينفعش رجل يكون موجود فيها…وطبعًا من غير كشف هاوية الزوجة بتدخل على الجروب تحكي مشكلتها واتعرفت على جوزها ازاي وانها ساكتة على مشاكل كتير وفجأة اكتشفت خيانة جوزها ليها وبتوضح اكتشفتها ازاي وتسأل اتصرف ازاي…وغير كده الصديقة اللي بتكتشف إن جوز صاحبتها بيخونها وتسأل أقولها ولا لأ…..وطبعًا آلالف الكومنتات اللي بتتكتب في دقايق معدودة وكلها تشجيع على الطلاق….لكن الأهم من ده كله بنسأل هل في أنواع من الخيانة؟! أيوة طبعًا في نوعين وهما الخيانة العاطفية والخيانة الجسدية.

– الخيانة العاطفية: ودي عبارة عن اني بنجذب بمشاعري لطرف تالت لمجرد إنه بيعاملني كويس أو بيقدرني أو بيحسسني بقيمتي …وده ممكن يحصل من الست لو جوزها بيتريق عليها ومش بيحترمها وبتكون فقدت إحساسها بنفسها كأنثى ومجرد أي رجل يقولها كلام حلو أو يقولها انتي جميلة أو يشكرها على أي حاجة بسيطة …وهنا افتكرت مشهد في مسرحية الزعيم لما كانت واحدة بتقول لعادل إمام أيوة انت خطيبي علشان انت امبارح بليل شوفتني على السلم وقولتلي مساء الخير! وده لمجرد انها بتتشعبط في أي ابتسامة من الجنس الآخر علشان تحس انها مرغوب فيها….ولكن خلينا نرجع لموضوعنا وبنقول على الزوجة دي ساعتها بتكون طايرة من الفرحة وتبدأ تفكر فيه كتير وتقارنه بجوزها، وطبعًا نفس الحكاية بتحصل من الزوج لو مالقاش تقدير من مراته وشايفاه مجرد ATM ومفيش أي احترام لمشاعره.
– الخيانة الجسدية: ودي طبعًا مش محتاجة شرح كتير …وهي عبارة عن إقامة العلاقة الجنسية خارج إطار الجواز وبنسبة كبيرة بيكون مع الشخص اللي بدأت معاه بالخيانة العاطفية….أو ممكن برده مجرد اشباع الرغبة الجنسية لو حصل فتور في العلاقة الجنسية بين الزوجين لأي أسباب وماتعالجتش.

3- عدم التوافق:

الاختلاف في القيم والمعتقدات…يعني ايه الكلام العميق ده؟….هوضح أكتر …يعني لومثلا الست اللي هتتجوزها دي بتحب السهر والفسح وليها أصحاب ولاد كتير وانت مش عاجبك الكلام ده ورغم ذلك استمرت معاها في العلاقة واتجوزتوا…طبيعي بعد الجواز هيحصل خلافات كتير وممكن تشك فيها وده بيكلمك ليه وازاي يعمل أعجبني على صورتك ونفس الحكاية برده للست لو زميلة جوزها في الشغل بتكلمه كتير ولا بتهزر معاه كتير أو برده عملت أعجبني على الصورة وتبقى كارثة لو عملت كير أو لاف!
مثال تاني وهو التدين…يعني ماشي انتوا ال2 نفس الديانة ..لكن حد متدين أوي وحد نص نص أو بعيد خالص عن ربنا …تيجي تقولي نصوم نص شعبان وهو أصلا مش بيصوم رمضان ومش بيركعها وانتي محجبة وبتقضي كل فروضك! أو للمسيحين لو طرف بعيد عن الكنيسة ومش بيصلي والطرف التاني ملتزم وبيحضر قداسات وبيصوم كل أصوام الكنيسة ومشارك في خدمة زي الأطفال او مساعدة الفقراء..أو أي خدمة من الخدمات المميزة في الكنيسة….وهو مثلُا بعيد كل البعد عن الكلام ده ومش بعيد يكون بيتريق عليها كمان!

4- المشاكل المالية:

إدارة الأموال والخلافات حول عادات الإنفاق….وده للأسف ناس كتير مش بتعرف تسيطر عليها…يعني مش بحوّش من مرتبي وبفرتكه وبمشي بمبدأ ان شا الله ما حد حوش وتلاقي نفسك اتزنقت في نص الشهر أو أول أسبوع من الشهر…وطبعًا مع الظروف الاقتصادية اللي بنمر بيها في العالم وارتفاع سعر الدولار…مش بنقدر برده نتنازل عن براندات معينة بنستخدمها سواء كان في الأكل أو في الشرب والهدوم…لمجرد انك ماتحسش انك أقل من غيرك …وطبعًا ممكن يبقى في خناقة كل يوم بسبب مصاريف الكهربا والغاز والمياه ويا سلام بقى لو محتاجين صيانة زي السباكة والنجارة وغيرها..أو لا قدر الله شخص في البيت اتعرض لوعكة صحية ومحتاج مصاريف للعلاج وببتكتشف انك بتتصرف بعدم مسؤلية ومش عامل حساب الحاجات دي كلها….ومانقدرش ننسى طبعًا الأونلاين شوبينج اللي زاد من سنة 2020 تقريبًا بسبب وجودنا في المنزل بشكل مستمر وقت الكورونا…وساعتها ممكن طرف من الاتنين يقرر انه يسيب التاني علشان مش قادر يستحمل أزمة المصاريف اللي بيمر بيها.

غير بقى مشكلة ارتفاع الأسعار …مشاكل تانية بدأت تظهر زي مين اللي ملزم يصرف الرجل ولا الست ولا الاتنين و هل الرجل ملزم يصرف على هدوم مراته والمكياج والكريمات والصن بلوك؟ ولا طلاما هي بتشتغل تصرف على نفسها في الحاجات دي؟ طب هل عادي الست تشارك في مصاريف الكهربا والغاز ….بلاش كل ده…هي أصلًا الست ينفع تنزل تشتغل ولا لأ ولا تقعد في البيت تستنى جوزها وتجري على المطبخ تسخن الأكل أول ما الفرعون يفتح باب الشقة وكأنها عاملة عملة وخايفة منه…و تسيبه يدوس بجزمته على فساتينها الماركات اللي جايبها بفلوسه…وتقوله ياااا…لياء اللنداء وأستااااذ للتفخيم ومحمد للتنعيم زي ما صاحبتنا بتقول؟!…الصراعات كتير والدنيا بتولع على السوشيال ميديا ودار الافتاء والأزهر يردوا وده بيسمّع لخناقات لرب السما في البيت …وعادةً النهاية بتكون غير سعيدة بالمرة.

دي أسباب ممكن تكون معروفة لناس كتير والناس بتتكلم فيها على السوشيال ميديا وبرامج التوك شو…لكن كل اللي فات حمادة وكل اللي جاي حمادة تاني خالص لأننا هنتكلم في العوامل النفسية اللي بتساهم في حدوث الطلاق واواي ده بيأثر على الصحة النفسية وازاي أتعامل معاه.

أكتر 3 عوامل نفسية بتساهم في الطلاق

1- أنماط التعلق:

كل واحد بيتعامل مع شريك حياته بطريقة مختلفة وده بيكون نتاج التربية من الأسرة في فترة الطفولة، وبالتالي بتحدد نمط التعلق مع الشريك في بداية الجواز وبيظهر الشكل ده في المستقبل هيكون عامل ازاي خاصةً في وجود أطفال. ولكن في تعلق آمن وتعلق غير آمن ودي هنتكلم عنها بالتفصيل لكن تعالوا سريعًا نعرف يعني ايه تعلق آمن.

التعلق الآمن عبارة عن القدرة بتكوين علاقات مع المجتمع وشريك الحياة حاسس بالأمان ومش قلقان من العلاقات دي وبيكون في ثقة متبادلة بين الطرفين…مفيش خوف من العلاقة الحميمية…غير كده لو مثلُا طرف منهم جيه قال للتاني معلش أنا محتاج أقعد لوحدي بيحترم ده وبيديله مساحته…وده بيكون نتيجة التربية السوية في بيته بمعنى أدق أسرته اديتله مساحة آمنة للتعبير عن مشاعره السلبية والخروج والتعرف على الناس …وكمان كان مقبول ومرغوب فيه وسط أسرته ومهتمين بكل احتياجاته سواء كانت النفسية أو المادية.

نرجع تاني هنا للتعلق الغير آمن وأنواعه اللي بيساهم في الطلاق:

– التعلق القلق:
وهو نوع غير آمن من التعلق، وده بيحصل لما طرف بيكون قلقان بشكل مبالغ فيه إن الطرف التاني هيسيبه ويختفي فجأة، أو مثلًا يقلق لما يبعت رسالة ومايردش عليه في وقتها…وده بيكون بسبب إن الأب طلق الأم وساب البيت فجأة ومبقاش يهتم بيهم ولا يعرف أخبارهم… أو مثلُا بيستجيب لاحتياجاته بشكل متقطع …بالتالي هيفضل حاسس بعدم الأمان وهيحس ان الشريك ممكن يسيبه في أي وقت.

– التعلق التجنبي:
ده بيحصل لما يكون الشخص في طفولته مكنش بيتم استجابة احتياجاته بحساسية وفيها نوع من التقليل بمشاعرهم والاستهتار بيها…ده بيخليه حاسس بخنقة وبيحكم على نفسه انه يقفل على مشاعره ومايعبرش لأن ماحدش هيفهمه ولا يقدره …وبيترتب عليها انه بيكون في مشكلة في وجود علاقات عاطفية في حياتهم وبيفضلوا الاستقلالية والاعتماد على نفسهم…وفي حالة اتمام الجواز بيكون في خوف من العلاقة الحميمية.

– التعلق المخيف والمتجنب:
بيكون معروف بإسم التعلق الغير منظم وده نادر ما بيكون موجود…ولكن عبارة عن الميل الشديد لوجود المودة والرومانسية وعايزين يحسوا بالحب من الشريك وفي نفس الوقت خايفين يطوروا الموضوع..وبيترتب عليه سلوك جنسي متزايد وبتزيد خطورة وجود عنف أثناء العلاقة وصعوبة تنظيم العواطف بشكل عام.

2- السمات الشخصية:

– العصبية:
وده بقى بيكون ردود أفعاله مبالغ فيها تجاه أي موقف حتى لو كان بسيط…ود بيكون نتيجة إحساسه بعد الأمان والقلق وقلة ثقته في نفسه…وعند صعوبة في تحقيق أهدافه في الحياة زي تحسين الظروف المادية والاجتماعية وده بيوخليه حاسس بحزن وكآبة معظم الوقت.

– النرجسية:
بنسمع الكلمة دي بتتوصف على ناس كتير ولكن عايزين نفهمها أكتر ..هي مش زي الحمصية والفولية زي ما الأستاذ حمو بيكا ما كان فاهم…ولكن السمة دي مخيفة وناس كتير بتتخدع فيها… الشخص بيكون ساحر وجذاب وممكن يعرف يقول للشريك كلام حلو ويغرقه حب ويحسسه انه عايش في قصة حب خيالية بس الفترة دي مش بتطول لأن بعد كده هتلاحظ الصفات دي:
* الأنانية وحب الذات: بيشوف الطرف التاني مخلوق لتلبية احتياجاته ومش بيهتم بالطرف التاني مضايق من ايه أو حاسس بإيه.
* جنون عظمة: شايف نفسه دايمًا أفضل من غيره وإنه جامد وماحصلش من ناحية الذكاء وقوة الشخصية.
* الشعور بالتميز والتفرد: بيميل إلى تسليط الأضواء عليه إن محدش هيفهمه ولا يقدره غير العظماء أمثاله.
* التعجرف والغطرسة: لازم يلبس أحلى لبس من حيث الماركات ولازم يكون معاه أفخم سيارة ولازم يكون طول الوقت شايف نفسه أعلى وأفضل من كل اللي حوليه …وبيشوف اللي حوليه دول بنظرة فيها دونية واحتقار.
* شعور قوي بالاستحقاق: شايف نفسه إنه يستحق أفضل حاجة فيكل شئ ويتعامل بشكل مختلف يليق بيه.
* الحاجة للحصول على الاعجاب: بيحب دايمًا يحي بالإعجاب والتقدير لغذية الأنا العليا اللي جواه علشان تأكد نظرته الإيجابية عن نفسه…يعني رغم التعجرف والغرور لكن شخصيته من جواه هشة جدًا وبيفتقد شعور ثقته بنفسه بشكل كبير
*عدم التعاطف مع الآخرين: مش بيقدر مشاعر الشخص اللي قدامه ولا بيتعاطف معاه ومككن كمان يتنمر عليهم ويسخر منهم.
* عدم قبول النقد: يعني لو حد حب يغلطه يقلب التربيزة على الطرف التاني ويحسسه إنه هو السبب في الموقف اللي حصل …ولو ماحصلش مشكلة في موقف معين يشكر في نفسه ويقول إن الفضل يرجع ليه عشان هو اللي بيعرف يقرر ويفكر صح وباقي الناس مش بتفهم حاجة.

3- الصحة العقلية:

– الاكتئاب:
أنواعه كتير ولكن في الأول وفي الأخر هو مرض نفسي لو الطرفين ماحولوش يلجأوا لمتخصص في العلاج النفسي علشان يقدروا يمارسوا حياتهم اليومية بشكل طبيعي ويركزوا في مسؤلياتهم…هيحصل تقصير في أمور كتير زي التركيز في الشغل وهيكون في مشكلة في التعامل مع الأطفال والدايرة المحيطة في المجتمع زي القرايب والأصحاب والمعارف.
– القلق:
الاحساس بالتوتر وعدم الأمان بسبب الخوف من المستقبل سواء كان على مستوى العلاقة العاطفية بين الطرفين أو مستوى الجتماعي والمادي خاصةً في وجود اطفال.
– تعاطي المخدرات:
طبعًا دي من أكبر وأخطر المشاكل اللي لو ماتعالجتش بشكل صحيح وماحصلش تعافي على الأقل لمدة 5 سنين بعد التبطيل، وارد جدًا يحصل انتكاسة وهيبدأ يضرب أهل بيته ويسرق كل اللي معاهم علشان يجيب مخدرات وللأسف أهالى كتير بتلجأ إنها تجوّز أولادها على أساس الجواز هيخليهم يبطلوا إدمان للمخدرات ودي معتقدات وموروثات كارثية أدت لخراب بيوت ناس كتير.

أثر الطلاق على الصحة النفسية

1- الآثار قصيرة المدى:
– الآثار النفسية والعاطفية:

تختلف الآثار النفسية والعاطفية بين الرجل والست.
بالنسبة للرجل:
* إحباط وقلق وحزن.
* قلة الثقة في النفس وعدم الرغبة في العمل.
*تغيير في مواعيده من حيث الدخول والخروج من البيت وكمان مواعيد الأكل.
*خوف وقلق من الزواج مرة تانية.
وطبعًا ده بيختلف بين رجل والتاني على حسب شخصيته وتربيته.

أما بقى بالنسبة للمرأة:
*الانطواء والعزلة بسبب كلام الناس.
* اكتئاب وحزن .
* احباط ويأس بسبب المشاكل القانونية ووجودها في المحاكم اللي في بعض الأوقات بيهددها بحرمانها من رؤية الأطفال.
* ضغط نفسي انها ماينفعش تتجوز تاني عشان كلام الناس ورفض الأهل بفكرة الزواج من مطلقة، وده أصلًا ممكن يسبب اختيار لزوج أسوء من اللي قبله.

– الآثار الجسدية:

ودي تنطبق على الرجل والمرأة:
*إدمان الممنوعات زي المخدرات ومشاهدة الأفلام الإباحية أو ممارسة الجنس خارج إطار الزواج.
* فقدان الشهية أو الأكل الكتير(Emotional Eating) كتعبير عن الشعور بالإحباط بسبب الفشل الحب والجواز.
* أمراض سيكوسوماتية…يعني أمراض جسدية بتيجي بسبب المشكال النفسية زي قرحة المعدة والسكر وتساقط الشعر وأمراض القلب وحساسية في الجلد وإرهاق مزمن والصداع النصفي ومشاكل في التبول والإخراج، وطبعًا السمنة بسبب ال Emotional Eating زي ما وضحنا من شوية اني بطلع غُلبي في الأكل بسبب فشل حياتي الزوجية، وفي بعض الأحيان الإصابة بالسرطان كمان …أيوة الضغط النفسي والحزن ممكن يسبب المرض ده، لأنها بتأثر على الغدد وافراز الهرمونات اللي ممكن تتحكم في نمو الخلايا السرطانية.

2- التأثيرات طويلة المدى:

– عدم الرضا عن الحياة:
طبعًا وارد يكون في مقارنة بيني وبين حياة غيري، يعني ليه حياتهم مستقرة وأنا مطلقة …إحساس اني أقل من غيري أو فيا عيب.

– زيادة مشاكل الصحة العقلية:
 زي الاكتئاب الشديد والخوف من المستقبل ومش عارفة أخد قرارات في حياتي في المستقبل وبالتالي مش عارفة اتعامل مع الأولاد. وكمان التمسك بالماضي يعني مش عارفة أساعد نفسي وأحاول اشوف حد متخصص يخليني أتشافى من الماضي.

– تأثير الطلاق على الأطفال:
* من سن 3 – 5 سنين بيتعرضوا لاضطرابات أثناء النوم والخوف بسبب التجربة اللي مروا بيها.
* سن المراهقة من سن 13 – 18 سنة بيحسوا بالغضب وكبت المشاعر وتمرد وممكن توصل للتفكير في الانتحار.
* عدم الإحساس بالأمان.
* عدم التركيز أثناء المذاكرة ومستواهم الدراسي بيقل وممكن يسقطوا في امتحاناتهم.
* ممكن كمان يحس إن بابا وماما مش بيحبوه ومش بعيد يحس انه هو السبب في الطلاق.
* حياتهم الاجتماعية محدودة او تقريبًا مش موجودة.
* ممكن  يبقى في انحراف في سلوكياتهم زي الخناقات والضرب والعلاقات مع أصدقاء السوء والسرقة وإدمان المخدرات والعلاقات الجنسية.
* بيفقدوا القيم اللي بيزعها المجتمع زي الترابط الأسري والتفاهم والتسامح.

أهم 4 طرق للتعامل مع الطلاق

1- طلب المساعدة المهنية:

مش عيب خالص الجأ لمتخصص سواء كان دكتور نفسي أو معالج نفس أو Life Coach علشان أعرف اتقبل الواقع اللي أنا فيه وكمان أعرف اتشافى من الوجع والأذى النفسي اللي اتعرضتله وغير كده ازاي أعرف اتعامل مع الطرف التاني بعد الطلاق خصوصاً لو في أطفال.

2- الانخراط في الرعاية الذاتية:

يعني ايه الكلام ده؟ يعني زي ما قولت من شوية بعد ما الجأ لحد يساعدني لازم برده أهتم بنفسي، وأمشي بمبدأ أغنية تامر حسني اللي بتقول ومن النهاردة هدلعني هخرج معايا وأمتعني…كملوا بقى الأغنية…آه عادي نخرج ونتفسح ونسافر ونروح كوافير أو حلاق ونعمل نيولوك واكافئ نفسي على أي انجاز أعمله حتى لو بسيط زي اني أكل برة أو أدخل سينما وممكن أخد كورسات جديدة و أشارك في أنشطة مش لازم تكون هتفيدني في شغلي…بس تبقى تجربة جديدة بستمتع بيها.

3- إنشاء نظام دعم:

ممكن أشارك في مجموعة زي Group therapy أو جموعة دعم يكونوا بيمروا بنفس المشكلة علشان الشخص مايحسش إنه لوحده في الدنيا اللي عنده المشاكل دي وإن في زيه كتير، وده ممكن تسأل عنه من خلال المتخصص اللي بيساعدك. وطبعًا لو حوليك ناس من أصحابك بتفهم وتقدر ظروفك ومش بتقلل منها خليهم دايمًا مصدر دعم ليك.

4- تطوير استرتيجيات المواجهة:

ايه الكلام الجامد ده؟! هنحاول نبسطها …الكلام ده معناه ازاي أعرف أواجه مشاكلي وأتعامل معاها بعد الطلاق…يعني ايه برده؟ …يعني ازاي أتحكم في نفسي خاصةً في التعامل مع الطرف التاني بعد الطلاق…ازاي أقيم نفسي من حيث شخصيتي وحالتي النفسية …تحملي المسؤلية…وكمان التعامل مع المجتمع ومواجهته بشجاعة لأنك ماعملتش حاجة غلط.

خلاصة كل اللي اتقال ده لو انتوا لسه على البر ولاقتوا مشاكل من اللي بتواجهوها دي ممكن تكون سبب في الطلاق بعد الجواز اعتبرها red flag يا معلم وانهي الموضوع بدري بدري قبل ما الفاس تقع في الراس…أما بقى لو كان الاكلام ده متأخر شوية وقريته بعد الطلاق… برده دي مش حاجة وحشة خالص لأنك عرفت الطرق اللي ممكن تساعدك تتعامل مع الوضع الجديد وازاي ترجع ثقتك بنفسك تاني علشان تكون راضي عن نفسك وكمان عشان لو قابلت شخص جديد في حياتك وفكرت تتجوز تاني تميز انت المرة دي اختيارك صح ولا لأ.