سايكويكي

هوس الكُتب: وكذبة الكتاب الاخير

هوس-الكتب

هشتري الكتاب دا وخلاص !
مين مننا ميعرفش حد بيشتري اي كتاب يشوفه ولما تعاتبه يقولك هشتري الكتاب دا وخلاص , بيبقي اكتر وقت مبسوط فيه لما يكون جوا مكتبه , بيستني معرض الكتاب عشان ينزل ويشتري كتب كتيير واغلبها ميعرفش جواها ايه اصلا ,او يشتري اكتر من نسخه من نفس الكتاب , والاهم انه مخلصش كتب السنه اللي فاتت ولا اللي قبليها ولا اللي قبليها !!

بس مهما كان صاحبك مش هيبقي زي توماس الي اشترا اكتر من ١٦٠٠٠٠ كتاب فضلوا يبيعوا فيهم حتي بعد وفاته بـ ١٠٠ سنه !

ممكن يبقي الموضوع حب للكتب واحتمال بردو يبقي هوس الكتب او الببلومانيا خصوصا لو مبتقراش الكتب دي وبتشتريها وخلاص , كل دا مقدور عليه الي حد ما ,المشكله بقي لما الموضوع يوصل للسرقه !!

اه للاسف في الحالات المتاخره من الببلومانيا او هوس الكتب بتوصل للسرقه مع عدم الاحساس بالذنب تماما والاعتراف انها سرقه ,ودا اللي حصل مع ستيفن بلومبرغ اللي سرق١٨٠٠٠ كتاب وكان مهتم جدا بسرقه الكتب القديمه والمخطوطات الخاصه بالجامعات كمان ,

طيب ايه هو الببلومانيا او هوس الكتب : هو هوس بيبتدي من الصغر في شكل حب الكتب لغايه لما تكبر وتشتري اي كتب تقابلها عشان تجمعها وهو شكل من اشكال الوسواس القهري ,

بس لسه في جامعات في علم النفس لسه معترفوش بيه كنوع منفصل من الاضطرابات لحد دلوقتي ,بس محدش انكر انه موجود حتي لو في شكل عرض من اعراض الوسواس القهري ,

طيب الحل ايه !

في الحالات اللي بتوصل للسرقه الافضل انه يروح لمتخصص والعلاج بيبقي علي شكل العلاج السلوكي المعرفي والاسترخاء في الاغلب ودا عشان المرض النفسي دا مش صعب ,فالعلاج بيبقي اسهل” الحمدلله “

اما بقي لو علي قد شراء الكتب وتخزينها فاحنا هنقولك علي كام حاجه تحاول بيها تساعد صاحبك :

  • العلاج بالكتب : المره دي المرض هو العلاج , يعني ممكن تجيبله كتاب بيتكلم فيه عن هوس الكتب او مقالات عنه , دا هيخليه ياخد باله اكتر ويفهم اسباب تصرفاته ودا بدايه العلاج
  • لمه الصحاب : معظم المصابين بالهوس الكتب انطوائيين ومنعزلين عن الناس الي حد ما , ودا بيبقي سبب كبير في انهم بيلاقوا سعادتهم في الكتب ,فخرجوا كتير وخليه يتعرف علي ناس اكتر ويبقي عنده صحاب وحياه تانيه يتبسط فيها
  • اساله عن الكتب اللي عنده : روح زوره واتفرج علي الكتب اللي عنده واساله هو مش بيقراهم ليه والكتب دي بتتكلم عن ايه , ولو لقيت كتاب غريب عن شخصيته واهتماماته اساله عن سبب شراءه ليه , كل دا هيخليه يفكر هو بيشتريهم ليه !
  • امنعه يروح معرض الكتاب : حاول تمنعه انه يروح ولو صمم اوي ممكن تتفق معاه انه هيروح لو خلص قرايه ٥ كتب من اللي عنده مثلا – وياريت انت اللي تخترهم وتبقي من الكتب اللي انت مستغربها عشان ميكررش شراها تاني لما يقراها ومتعجبوش لانها مش اهتماماته

احنا كدا كلمناكوا عن الببلومانيا واعراضه وازاي تساعد المصابين بيه ,,
بس خلي بالك مش لازم اي حد بيحب الكتب يبقي مصاب بيه في ناس كتير بتشتري الكتب وبتقراها وبتستفاد بيها 🙂

قولنا بقي مين من صحابك شاكك انه عنده ببلومانيا ؟ وواصل لانهي مرحله ؟ 😀

عن الكاتب

عُـلا طـارق