هل يستمر علاج الاكتئاب مدى الحياة؟

66

الاكتئاب اضطراب في المزاج وأسبابه كتيرة جدًا، والعلماء بيقولوا أنه بيحصل بسبب خلل في توازن المواد الكيميائية في الدماغ. وعلشان حد يتشخص بالاكتئاب لازم يكون عنده عالأقل خمس أعراض من الاكتئاب فاليوم، ولمدة أسبوعين. الأعراض المشهورة هي، عدم الاهتمام بالحاجات المحبوبة، اللامبالاة، وشعور بعدم القيمة، وشعور دايم بالذنب من غير سبب، والتعب والإرهاق علطول، ومفيش طاقة، وغيرها وغيرها من الأعراض المتعبة.

هل يستمر علاج الاكتئاب مدى الحياة؟ سؤال بيطرح نفسه، وعايزين نقولك أن مدة علاج الاكتئاب بتعتمد على أسلوب الحياة وإذا كان الشخص ملتزم في العلاج ولا لأ. يعني أعراض الاكتئاب ممكن تقعد من أسابيع لشهور أو سنين.

اختبار-الاكتئاب-bannerشاكك إن عندك اكتئاب؟ دوس هنا واعمل اختبار الاكتئاب أونلاين

هل يستمر علاج الاكتئاب مدى الحياة؟

الاكتئاب مرض خطير، وبالنسبة لكتير من الناس بيتكرر معاهم. لكن دا مش معناه أنه ميؤوس منه. لأ في علاجات كتيرة بتساعد في علاج أعراضه وتقليلها وتقليل فرصة تكرار النوبة. كمان العلاج بيساعدك في التعود على نوبات الاكتئاب وتعليمك إزاي تتعامل معاها. أه الاكتئاب ممكن يكون حالة مزمنة، لكن ممكن التحكم فيه بالعلاج.

نوبات الاكتئاب

الاكتئاب مرض بييجي على شكل نوبات من، مثلًا زي اما بييجي لناس نوبات من  أمراض تانية زي التصلب المتعدد أو التهاب المفاصل. مدة النوبة بتختلف من حد للتاني، يعني في ناس ممكن يجلهم نوبة واحدة في حياتهم، وفي ناس تانية بيجلهم كذا نوبة اكتئاب. علشان كدا العلاج مهم جدًا.

الاكتئاب زي أي مرض لو اتساب من غير علاج الأعراض بتسوء. وبتأثر على حياة الإنسان كلها، سواء في الشغل أو البيت أو مع أصحابه. ووجع في الجسم، وممكن توصل للتفكير في الانتحار. الحاجات اللي بتزود فرصة حدوث النوبة أكتر من مرة هي:

  • حالة نفسية تانية
  • تاريخ عائلي من الاكتئاب
  • الشخصية
  • أحداث الحياة الصعبة
  • صدمة في الماضي
  • مفيش دعم اجتماعي

لو كنت معرض للاكتئاب المتكرر، فالعلاج مهم جدًا وبيقلل من الأعراض.

إزاي الاكتئاب بيتعالج؟

الاكتئاب مرض ممكن علاجه عن طريق السيطرة على أعراضه، ولما تبدأ في العلاج بدري، وكل ما كان أفضل. كمان في علاج وقائي للناس اللي بيجلها نوبات اكتئاب متكررة، العلاج بيقلل من انتكاسهم.

لكن العلاج مش واحد للكل. كل حالة على حسب أي العلاج اللي هيناسبها. وغالبًا بيكون استخدام أكتر من طريقة للعلاج، أفضل من التركيز على طريقة واحدة. يعني مثلُا علاج بالأدوية مع علاج نفسي. العلاجات بتضم الأدوية أو العلاج النفسي أو الاستشفاء أو العلاج بالصدمات الكهربائية.

أدوية الاكتئاب

في أنواع كتيرة من مضادات الاكتئاب، وأوقات اللي بينفع لحد مش بينفع لغيره. لكن لازم الدكتور هو اللي يوصفها، ومضادات الاكتئاب بتضم:

  • مثبطات امتصاص السيروتونين الانتقائية (اس اس اراي)
  • مثبطات امتصاص السيروتونين-نوربينفرين (SNRIs)
  • مضادات الاكتئاب ثلاثية الحلقات (TCAs)
  • مضادات الاكتئاب غير النمطية
  • مثبطات مونوامين أوكسيديز (MAOIs)

في أوقات بيستخدموا أكتر من علاج في نفس الوقت، مثلًا ممكن أدوية القلق مع مضادات الاكتئاب. وعلى حسب الحالة لو منجحش معاها علاج، بيجربوا غيره، لحد ما يعرفوا أي المناسب.

العلاج النفسي

العلاج النفسي هو العلاج بالكلام مع الدكتور النفسي. الكلام عن المشاكل اللي بيمر بيها المريض النفسي         خطوة مهمة في علاجه. بتساعده يعرف هو عايز أي وإزاي يقدر يحل مشاكله. كمان في أنواع كتيرة من العلاج النفسي، زي العلاج السلوكي الجدلي (DBT) والعلاج السلوكي المعرفي (CBT). بيساعدك العلاج في:

  • تحديد الحاجات اللي بتسببلك اكتئاب
  • تعرف الحاجات الغلط اللي مقتنع بيها ومأثرة عليك
  • تتعلم حاجات جديدة إيجابية
  • تعرف إزاي تتأقلم مع الظروف اللي حواليك وأي حاجة تحصلك، وتتعامل إزاي مع مشاعر الحزن اللي طبيعي كل واحد بيمر بيها.
  • تحط أهداف وتوقعات مع دكتور وبخطة العلاج تحاول تحققها على تسيطر على أعراض الاكتئاب عندك.

العلاج بالصدمة الكهربائية

النوع دا من العلاج مش بيستخدم بشكل كبير، لأنه مش مناسب للكل. ومع ذلك، بيجيب نتيجة مع الاكتئاب الحاد او المتكرر واللي صعب علاجه. وكمان مش بيستخدم كتير لأن ليه أضرار زي فقدان الذاكرة. لكن عمومًا مفيش خوف منه لأن التيار الكهربي بيستخدم وهو الشخص تحت تأثير المخدر.

تغيير أسلوب الحياة

في حاجات الإنسان ممكن يعملها علشان يسيطر على اكتئابه، وهي:

  • تنفيذ خطة العلاج المحطوطة ، سواء كانت جلسات علاجية منتظمة، أو أدوية، أو علاج جماعي، وكمان البعد عن أي حاجة مضرة زي المخدرات مثلًا.
  • البعد عن المشروبات المضرة. يعني المخدرات والخمرة وحتى السجاير أفضل تبطلها، لأن كل دا ليه تأثير على المزاج، غير التفاعلات الوحشة مع الأدوية زي مضادات الاكتئاب.
  • الهدوء ولعب الرياضة. حاول دايمًا تلعب رياضة لأن دي بتجدد الطاقة ولو حتى نص ساعة في اليوم مشي حوالين بيتك، مش شرط تلتزم بجيم ومواعيد. كمان أنك تخرج من البيت دا ليه فوايد كتيرة وبيخرجك من العزلة.
  • النوم والأكل الكويس. الجسم والعقل مرتبطين ببعض، وعلشان كدا لازم تاكل حلو وتنام كويس علشان جسمك وعقل يكونوا بخير.

علاج الاكتئاب في المستشفيات

  • ممكن يكون علاج الاكتئاب في المستشفى ضوري في حالة:
  • نوبة الاكتئاب الشديدة
  • مش قادر تحافظ على سلامتك
  • مش قادر تعتني بنفسك

وأنت موجود في المستشفى، بيتابعوا معاك كويس أنت بتاخد الأدوية ولا لأ، أو تغيرها لنوع تاني أفضل ليك. وكمان بيجمعوا بين العلاج الفردي والجماعي، يعني جلسات معاك لوحدك وجلسات مجمعة مع ناس تانية علشان تساعدوا بعض.

المراجع:

المصدر

اترك تعليق