ما هي أعراض الاكتئاب عند النساء؟ 

203

الاكتئاب للأسف مش شوية زعل وحزن وشوية وهيعدوا، لأ دا مرض بيغير المزاج والنفسية وبيأثر بشكل وحش عالحياة ككل وعلاقتك باللي حواليكي. كمان ممكن يوصل أنه يسبب مشاكل جسدية زي أوجاع في أماكن كتيرة في الجسم وغيرها من العلامات.

الاكتئاب ممكن يحصل لأي حد، لكن الستات بالذات بيجلهم أكتر من الرجالة ممكن قدهم مرتين، ودا بسبب طبيعتهم الحساسة والعاطفية وكمان هرموناتهم المتغيرة.

اختبار-الاكتئاب-bannerشاكك إن عندك اكتئاب؟ دوس هنا واعمل اختبار الاكتئاب أونلاين

أعراض الاكتئاب عند النساء

  • مبتستمتعيش بنفس الحاجات اللي كنتي بتحبيها، أو مش بنفس الدرجة.
  • مفيش قدرة عالتركيز.
  • شهية متغيرة.
  • نقص الوزن بشكل كبير
  • الضعف والإرهاق
  • شعور دايم بالذنب
  • إحساس بعدم القيمة
  • مفيش أمل في المستقبل
  • عياط من غير سبب
  • نوم متغير
  • تقلبات مزاجية، يعني شوية فرحانة وشوية زعلانة
  • تفكير كتير في الموت

الفرق بين أعراض الاكتئاب عند النساء والرجال

الاكتئاب أعراضه بتختلف من الراجل للست ودا بسبب الهرمونات. يعني مثلًا الستات بتعاني من تغيير في الهرمونات في أوقات زي؛ الدورة الشهرية، والحمل والولادة، وسن اليأس.

كمان ممكن الفروقات بتكون بسبب طبيعة المجتمع، الست بتميل للانفعال وأنها تخرج اللي جواها. أما الراجل بيميل أنه يظهر أنه قوي ومش بيعبر عن اللي حاسه. ولو طلع اللي جواه بيطلع في شكل غضب، ولوم الناس مش نفسه، ويخانق كتير، ويشرب سجاير أو غيرها من الحاجات المضرة. ومع ذلك، كل واحد أعراض الاكتئاب بتظهر عنده بشكل مختلف.

أسباب الاكتئاب عند النساء:

زي ما قولنا الستات بيجلهم اكتئاب أكتر من الرجالة، وفي أسباب كتيرة لدا زي تكوينهم الجسماني والنفسي وطبيعتهم الحساسة. الأسباب المهمة زي:

الدورة الشهرية

في حاجة اسمها متلازمة ما قبل الدورة الشهرية. بيحصل فيها تغيير فالهرمونات وبتأثر على مواد كيميائية، زي السيروتونين، ودي اللي بتسبب تغيير في مزاجك. غالبًا بتكون أعراض الدورة الشهرية مؤقتة. وهي الانتفاخ والصداع وإحساس أن الثديان رقيقان عند اللمس. كمان الاكتئاب والقلق أوقات بيكونوا من أعراض المتلازمة.

اكتئاب ما حول الولادة

النوع دا من الاكتئاب بيحصل فالفترة اللي حوالين الولادة، يعني أخر الحمل وبعد الولادة مباشرة. لأن الهرمونات بتتغير بشكل كبير فالتوقيت ودا بيسبب مزاج متغير والقلق والاكتئاب. كمان مشاكل النوم والتفكير في الانتحار وإحساس أنك مش قادرة تاخدي بالك من نفسك أو ابنك.

في حاجات ممكن تزود إحساسك بالاكتئاب فالفترة زي أنك تكوني بتمري بمشاكل في علاقتك مع جوزك أو اللي حواليكي. كما إذا كنتي اتعرضتي للاجهاض قبل كدا.

اكتئاب ما قبل انقطاع الطمث

النوع دا بيحصل لما الست تكبر شوية فالسن وتدخل مرحلة سن اليأس. لأن بيحصل فيها تغيير كبير في الهرمونات فبيسبب أعراض كتيرة زي السخونة في الليل، وآلام العظام وغيرها وكمان الاكتئاب. في أحداث بتزود الاكتئاب في الفترة دي، زي مشاكل في البيت أو الشغل.

أسباب عامة للاكتئاب:

  • اكتئاب موسمي، دا بيحصل مع تغير الفصول وبالذات في الشتاء.
  • اختلال في توازن مواد كيميائية في الدماغ أو الهرمونات، زي السيروتونين أو الناقلات العصبية.
  • مشاكل الغدة الدرقية اللي بتسبب تسبب تغيرات في الهرمونات
  • تاريخ عائلي من الاكتئاب
  • أحداث الحياة الصعبة، زي موت شخص عزيز أو الطلاق أو فراق اللي بنحبهم
  • الإساءة الجسدية زي الاغتصاب والتحرش والضرب
  • مشاكل مع الصحاب أو البيت أو في الشغل
  • مرض طويل بيمنع من الاستمرار في الحياة بشكل طبيعي

كيفية التعايش مع الاكتئاب

ناس كتيرة بتسأل إزاي أعيش مع الاكتئاب؟ أعمل أي؟ أول حاجة لازم تروحي لدكتورعلشان يساعدك تعدي المرحلة الصعبة دي. كمان هتكوني قادرة تتكلمي مع حد عن مشاعر الإحساس بالذنب والفشل وغيرها، مجرد أنك تخرجي الكلام دا وتوصفي إحساسك دا هيساعدك في حل المشكلة بدل ما الاكتئاب يزيد أكتر. حاجات تانية ممكن تساعدك زي:

  • الخروج. كمان حاولي تخرجي عالأقل نص ساعة كل يوم في ضوء الشمس دا هيساعدك في علاج الاكتئاب اللي بيحصل نتيجة التغيرات الموسمية في الطقس. كمان الأبحاث بتقول أن عدم الحصول على ما يكفي من فيتامين د من الشمس أو من مصادر تانية ممكن يزيد من خطر الإصابة بالاكتئاب.
  • ممارسة الرياضة. لعب الرياضة بشكل منتظم ضروري جدًا في علاج الاكتئاب لأنه بيجدد الطاقة ويحسن النفسية . كمان لازم تاكلي أكل صحي، ولو كان التوتر هو سبب الاكتئاب فحاولي تعملي الحاجات اللي بتساعد على الهدوء زي؛ التأكل واليوجا علشان تقدري تخففي من أعراض الاكتئاب.
  • الناس الإيجابية. خليكي دايمًا مع الناس الإيجابية اللي كلها طاقة وسهل التعامل معاهم دا هيساعدك في علاج الاكتئاب. أما الناس اللي بتضايقك وتسببلك التوتر وتزود الاكتئاب فلازم تتجنبيهم.
  • الدواء. ممكن تغييرات الحياة متكونش كفاية وتكوني محتاجة تاخدي دواء زي مضادات الاكتئاب إذا كانت أعراضك شديدة. لأنه هيساعدك في موازنة المواد الكيميائية أو الهرمونات. لكن طبعًا مينفعش تاخدي أي علاج اكتئاب من غير ما يكون وصفه دكتور. كمان مينفعش تتوقفي عنه إلا بمشورته علشان ميحصلكيش انتكاسة.

المراجع:

المصدر

اترك تعليق