ما هي أعراض الاكتئاب الشديد؟

177

لو دايما حاسس أنك حزين ومعندكش طاقة تعمل أي حاجة أو حتى أنك تخرج شوية، وحاسس أنك عايز تقعد لوحدك وتبعد عن كل اللي حواليك، خلي بالك دي أعراض اكتئاب واكتئاب شديد كمان.

لو عايز تعرف أكتر كمل قراية واعرف أعراض الاكتئاب..

اختبار-الاكتئاب-bannerشاكك إن عندك اكتئاب؟ دوس هنا واعمل اختبار الاكتئاب أونلاين

  • دايما هتكون حاسس بالحزن، ممكن تعيط، هتحس بالفراغ واليأس، وطبعا هيكون فيه نوبات غضب أو انفعال أو إحباط، وأنت بتتعامل مع أي موقف أو مشكلة ولو كانت بسيطة.
  • هتحس أنك مش مهتم بأي حاجة أو أنك تتكلم مع حد في أي موضوع أو حتى تشارك عيلتك في أي نشاط، وطبعا هتفقد إهتمامك بالأنشطة والهوايات ولو حتى المشي .
  • هتواجه اضطرابات النوم، وهتعاني من الأرق وممكن تنام فترات طويلة وأوقات فترات قصيرة.
  • دايما هتحس أنك تعبان ومعندكش طاقة تعمل أي حاجة ولو حتى مسئوليات البيت اليومية، وممكن تفقد الشهية وتتعرض لفقدان الوزن أو العكس .
  • ومن أهم أعراض الاكتئاب، قلة التركيز والفهم، وصعوبة اتخاذ القرارات وتذكر الأشياء.
  • كمان ممكن تحس أن ملكش قيمة في حياة أي شخص. ودايما هتحاسب نفسك وتظلمها معاك وتحسسها بالتقصير والعجز وتلومها على أي غلطة ولو حصلت من زمان.
  • ممكن تتطور أعراض الاكتئاب وتوصل لمرحلة الخطر وأنك تفكر في الموت وممكن تنهي حياتك بإيدك.
  • ممكن تحس بوجع في أماكن غريبة في جسمك وبدون سبب واضح، زي مثلا آلام الظهر أو الصداع، وممكن تحس بإعياء .
  • الشعور بأنك مذنب في حق نفسك وحق اللي حواليك، ده شعور هيلازمك وانت مكتئب. وكمان هتحس انك عاجز ومتقدرش تساعد اقرب الناس ليك أو حتى تساعد نفسك .
  • التشاؤم واليأس دول من أهم أعراض الاكتئاب وكمان التفكير بشكل سلبي ودايما هتتوقع الأسوأ .

أعراض الاكتئاب عند الأطفال والمراهقين:

مش هتفرق كتير عن العلامات والأعراض الشائعة للاكتئاب عند الكبار، ولكن في بعض الاختلافات.

  • عند الأطفال الأصغر سنًا، هتكون أعراض الاكتئاب عبارة عن الحزن، والتهيج، والتشبث، والقلق، والأوجاع والآلام، ورفض الذهاب إلى المدرسة، زيادة أو نقص الوزن.
  • في سن المراهقة، هتكون الأعراض الحزن، والتهيج، وهيحس أنه ملوش قيمة في الحياة، وهيغضب طول الوقت، وهيرفض يروح المدرسة .
  • كمان هيحس بسوء الفهم والحساسية الشديدة.
  • العزلة والأكل والنوم الكتير بيكون من أهم أعراض الاكتئاب عند المراهقين، كمان ممكن يتطور الموضوع ويفكرو في الإنتحار .

أعراض الاكتئاب عند كبار السن:

  • كتير من كبار السن بيعانو من الاكتئاب بسبب قلة الاهتمام بيهم، وإنشغال أولادهم عنهم، وهتكون أعراض الاكتئاب هنا، النسيان الكتير وصعوبة الفهم. وهتحصل تغيرات كتير في شخصيتهم زي ميلهم للعزلة دايما وتقليل الإختلاط بالناس.
  • ممكن تزيد أوجاعهم الجسدية، ودايما هيحسو بالإرهاق أو فقدان الشهية أو مشاكل في النوم، ممكن ينامو كتير وأوقات فترات قليلة .
  • دايما هيكون عندهم رغبة يفضلو في البيت، وهيرفضو الخروج والإختلاط حتى بالجيران ومش هيقومو بأي أنشطة إجتماعية ولا حتى هيمارسو أي رياضة ولو رياضة المشي.
  • من أخطر أعراض الاكتئاب عند كبار السن، التفكير دايما بشكل سلبي، وتمني الموت وممكن يفكرو في الإنتحار، خاصة كبار السن من الرجال .
  • هيعانو دايما من اضطراب في المعدة، أو مشاكل في الجهاز الهضمي.
  • هيواجهو صعوبة في التركيز، وهيكون صعب عليهم يقرأو صحيفة أو يتفرجو على التلفزيون ويفهمو التفاصيل. كمان هينسو أحداث كتير ومش هيقدور ياخدو قرارات سواء كانت صغيرة أو كبيرة.

إمتي تروح لدكتور نفسي؟

لو حسيت بالأعراض اللي قولناها دي وفكرت أنك تتخلص من حياتك، استعين فورا بدكتور متخصص، واتصل بصديق أو حد من أسرتك واتكلم معاه وعبر عن كل مشاعرك السلبية.

ايه هي أسباب الاكتئاب؟

ممكن يكون السبب جيني، جينات الكئابة ممكن تتنقل من الأب لابنه ولكنه بيحصل بنسب بسيطة. وممكن يكون السبب أنك تتعرض لموقف صعب في الطفولة وده بيأثر على الحالة النفسية للطفل ويخليه أكثر عرضة للاكتئاب لما يكبر.

كمان فقدان شخص عزيز ممكن يكون سبب للاكتئاب، أو لو اتسرق منك مبلغ كبير، أو اتعرضت لمشكلة عاطفية وفسخت خطوبتك مثلا .

المراجع:

مصدر1

مصدر2

اترك تعليق