كيف يمكن التخلص من الاكتئاب؟
التوتر، الأرق، الحزن، اليأس، العزلة، كل دي حجات هتحس بيها لو عندك اكتئاب. وكتير من اللي عندهم اكتئاب ميعرفوش أن عندهم، ومبيفكروش يروحو لدكاترة غير بعد فوات الآوان.
شاكك إن عندك اكتئاب؟ دوس هنا واعمل اختبار الاكتئاب أونلاين
لو عايز تحسن من حالتك وتتخلص من الإكتئاب من غير أدوية ودكاترة، كمل قراية وشوف النصايح دي:
المحتويــات
حب نفسك وإقبلها زي ماهي
الاكتئاب بيحصل لما تحس بالفشل أو إنك مش راضي عن نفسك وعن اللي وصلتله. لازم تحب نفسك وتقبل الظروف الصعبة اللي بتأخر وصولك لهدف معين سواء كان في الشغل أو حياتك، وهو ده أول مفتاح هيساعدك تتخلص من الاكتئاب.
اكتب كل حاجة وبالذات مشاعرك السلبية
الاكتئاب هيجرك للعزلة والبعد عن الناس، هيخليك مش عايز تتكلم مع حد أو عن أي حد مضايقك. حارب الإحساس ده بالكتابة، أيوه أكتب وعبر عن كل مشاعرك الحلوة والوحشة.
كله هيعدي “كله رايح”
التشائم واليأس من أكتر الحاجات اللي هتحس بيها لو عندك الاكتئاب، خليك “فرفوش” ومزاجك حلو أغلب الوقت، وأعرف أن كله بيعدي الحلو والوحش. خلي عندك يقين أن اليوم الوحش بعده يوم حلو، وبكده هتتخلص من إحساسك باليأس والتشائم، وبالتدريج هتلاقي نفسك بتحب بكره واتخلصت من الاكتئاب.
بص لنص الكوباية المليان
الاكتئاب هيخليك تنقي الحاجات السلبية اللي بتحصل في أي موقف وتتجاهل أي حاجة إيجابية. حاول تبص لنص الكوباية المليان وتركز على الحلو أكتر من الوحش.
اعمل الصح
وزي ما قال الراحل غسان مطر” اعمل الصح” خليك إيجابي واسمع صوت عقلك وأعمل الصح، أوعي تمشي ورا الصوت السلبي بتاع الاكتئاب اللي هيخليك تشوف كل حاجة وحشة وتبقي بني آدم سلبي ومعندكش إستعداد تعمل أي حاجة.
حدد هدف واحد أو اتنين تحققهم الأسبوع ده
لما بتزيد الأهداف والمهام طبيعي أنك تمل وتيأس وممكن متعملش أي حاجة خالص. والحل أنك تحدد لنفسك هدف أو اتنين بالكتير كل أسبوع عشان تقدر تنجزهم وتحس بفرحة إنجازهم.
هات لنفسك هدية “دلع نفسك”
كل ماتعمل حاجة كافيء نفسك وهاتلها هدية، لازم تحس بقيمة إي إنجاز حققته حتي ولو كان تنضيف البيت.
افتكر تنبسط
الاكتئاب هيخليك تستسلم للتعب والملل، ومتعملش أي حاجة تخليك مبسوط، لازم تحارب المشاعر السلبية دي باللعب والرسم أو احتي اسمع “مهرجانات” أو ممكن تركب عجل.
فكها شوية واخرج
الخروج في الشمس والمشي وسط الشجر له مفعول السحر في التقليل من مشاعر الملل والتعب، بيشحن طاقتك من جديد ويخليك مقبل على الحياة. وكل الأبحاث والدراسات العلمية أكدت صحة الكلام ده .
لو عندك جنينة في بيتك، استمتع بضوء الشمس واتعود تفطر أو تتغدا فيها، ولو الميزانية سمحت اتغدي بره مع ناس بتحبهم، الخروج مع أصحابك هيساعدك في أنك تتخلص من العزلة اللي هي أكتر حاجة بتزود الاكتئاب.
جرب تعمل حاجة جديدة
كل الأبحاث بتأكد أنك لما تجرب تعمل حاجة جديدة، ده بيحسن من صحتك بشكل عام وبيقوي علاقتك بالناس. لأن لما بتعمل نفس الحاجة كل يوم بتستخدم نفس أجزاء دماغك وبتحط نفسك في دايرة الروتين الممل اللي بيدخلك أكتر في دوامة الاكتئاب. إنما أنت تقدر تتحدي الخلايا العصبية وتغير كيمياء الدماغ لما تعمل حاجة مختلفة وتكسر روتينك اليومي، زي مثلا أنك تتعلم رياضة جديدة أو حتى تعمل أكلة حلوة .
نام كويس
الاكتئاب هيخليك متنامش ودايما هتكون حاسس بأرق وتعب، حاول تهيأ نفسك للنوم، أشرب ينسون أو أي حاجة تهدي أعصابك، وأبعد التليفون شوية وحاول تقلل السهر واتعود تصحي بدري ومع الوقت هتتعود تنام بدري وتتخلص من الأرق من غير مهدئات.
حارب الإكتئاب بتحمل أي مسئولية
الفراغ أخرته الاكتئاب، حاول تشيل أي مسئولية حتى لو كانت في البيت لو كنت مبتشتغلش، زي مثلا أنك تساعد في تنضيف البيت أو توصل أخواتك للمدرسة. وحاول تحس بقيمة الإنجاز اللي بتعمله وأوعي تقلل منه.
كفاية رمرمة
لازم تقلل من أكل الشارع اللي مكوناته لا يعلمها إلا الله، قلل من الدهون والمشروبات الغازية في أكلك، وحاول تاخد وجبات صحية توفرلك أحماض صحية زي حمض الفوليك اللي هتلاقيه بنسب كبيرة في السمك. وركز على الفاكهة والخضروات والحبوب وطبعا قلل من المنبهات مثل الكافيين والقهوة والصودا وكمان قلل السكر والمواد الحافظة والأطعمة المصنعة.وبكده تقدر تقلل من أعراض الاكتئاب لأن الأبحاث أكدت على أن الصحة العقلية بتعتمد على الصحة الجسدية .
مارس أي رياضة..أتمشى
الاكتئاب هيخليك تحس بالتعب والخمول وأنك مش قادر حتى تقوم من السرير، شجع نفسك وقوم أتمشي حوالين البيت، وبالتدريج هتلاقي نفسك حابب تعمل تمارين أو تمارس أي رياضة تخرجك من اكتئابك. و الأبحاث أكدت أن الرياضة ليها مفعول السحر في علاج الاكتئاب من غير الحاجة لأي أدوية.
شوف حد يساعدك
لو عملت كل المحاولات اللي فاتت ولسه حاسس بأعراض الاكتئاب، يبقى لازم تروح لمتخصص.
