ما هو الاكتئاب النفسي؟

أنك تكون حزين ومحبط ومش مهتم بحاجة ومبقاش يعجبك أي شيء كنت بتعمله وعندك لامبالاة. دي كلها مشاعر أي حد بيحس بيها في وقت معين في حياته نتيجة ظروفه وطبيعة شخصيته. لكن لو المشاعر دي استمرت مدة كبيرة، وأثرت على الحياة والعلاقة بالأهل والصحاب والشغل، فدا اكتئاب.

خد بالك الاكتئاب مش بس بيأثر عالنفسية، لأ دا بيتطور ويأثر على الجسم. هتلاقي نفسك بتحس بالتعب والإرهاق ووجع في أي حته أو ضربات قلب سريعة أو مشكلة في نفسك. لازم تهتم وتدور على العلاج.

اختبار-الاكتئاب-bannerشاكك إن عندك اكتئاب؟ دوس هنا واعمل اختبار الاكتئاب أونلاين

لو عايز تعرف أكتر عن الاكتئاب كمل قراية الموضوع

الناس اتعودت تقول أنها مكتئبة على أي شوية زعل أو تعب، ولكن الاكتئاب المرضي اللي بيميزه أنه مستمر مش مجرد شوية زعل ويعدوا. وممكن كمان ييجي على شكل نوبات تقعد أسبوعين على الأقل أو تستمر لشهور أو سنين قدام. كما في أعراض تانية ومنها تقدر تعرف إذا كان عندك اكتئاب ولا لأ.

اتعرف على علامات الاكتئاب:

  • مزاجك متقلب
  • مبقتش تهتم بالحاجات اللي كنت بتحبها زي لعب الكورة مثلًا
  • الرغبة الجنسية بتقل
  • شهية متغيرة، شوية تاكل كتير وشوية متاكلش خالص
  • أنك تخس لأنك طبعًا مبتاكلش حلو
  • نوم ملغبط، شوية كتير وشوية قليل
  • الأرق
  • الغضب بسرعة
  • حركة بطيئة والكلام ببطء
  • تعبان ومفيش طاقة
  • حاسس ان ملكش قيمة
  • التفكير بصعوبة
  • مش عارف تاخد قرار
  • التفكير في الموت والانتحار

الاكتئاب عند البنات

الاكتئاب منتشر عند البنات أكتر من الرجالة، وكمان في أنواع منه مرتبطة بيهم بس. زي اكتئاب ما بعد الولادة، واضطراب ما قبل الطمث الاكتئابي.

الاكتئاب عند الرجالة

الرجالة لما بتكتئب بتكون أعنف وبيميلوا لشرب السجاير ويمكن المخدرات لأنهم عايزين يهربوا من الارتباطات اللي وراهم. كما بيميلوا أكتر للمخاطرة وممكن ينتحروا.

الاكتئاب عند الأطفال

ممكن الناس تفكر أن الاكتئاب بييجي للكبار بس عشان ضغوطات الحياة عليهم كبيرة، ولكن دا مش صح. الأطفال كمان بيكتئبوا، تخيل أن في أمريكا أكتر من 3% من الأطفال والمراهقين اللي عندهم من 3-17 سنة عندهم اكتئاب.

الطفل طبعًا لما يجيله اكتئاب مبيقدرش يتعامل مع الناس اللي حواليه سواء أهله أو أصحابه في المدرسة. كمان ممكن يبقي عنده صعوبة في التعليم. والأعراض التاني زي؛ العياط، والطاقة مفيش، والعدوانية، والتحدي. كمان الأطفال الأصغر مبيقدروش يعبروا عن اللي جواهم.

أي أسباب الاكتئاب:

محدش فاهم بالظبط أي سبب الاكتئاب. في حاجات كتيرة ممكن تكون السبب، زي:

  • الجينات
  • مشاكل في الطريقة اللي شغالة بيها الدماغ
  • الأجواء اللي عايش فيها
  • الحالة النفسية
  • العلاقة بالأسرة

علاج الاكتئاب:

عشان تعالج الاكتئاب لازم تتابع مع دكتور نفسي. مينفعش تاخد أدوية من غير ما تسأله كمان العلاج النفسي مهم جدًا. لأن من خلال الجلسات هتعرف تعبر عن اللي جواك وتلاقي اللي يسمعك ويقدملك النصيحة. لكن الدكتور لو شاف الحالة محتاجة علاج هيوصف مضادات الاكتئاب زي:

  • مثبطات امتصاص السيروتونين الانتقائية (اس اس اراي)
  • مثبطات مونوامين أوكسيديز (MAOIs)
  • مضادات الاكتئاب ثلاثية الحلقات
  • مضادات الاكتئاب غير النمطية
  • مثبطات امتصاص السيروتونين والنورادرينالين الانتقائية (SNRIs)

بنأكد عليك مرة تانية متاخدش أي أدوية من غير استشارة طبية. لأن كل علاج منهم بيشتغل على حته معينة في الأعصاب. ولو بتاخد الأدوية متوقفهاش مرة واحدة من دماغك عشان متنتكسش. لازم الدكتور هو اللي يحدد المعاد.

أضرار أدوية الاكتئاب

الأدوية زي ما بتعالج ممكن تأذي. مثلًا مثبطات استرداد السيروتونين الانتقائية ومثبطات استرداد السيروتونين الانتقائية ممكن تسبب أضرار زي:

  • غثيان
  • إمساك
  • إسهال
  • انخفاض سكر الدم
  • فقدان الوزن
  • طفح جلدي
  • العجز الجنسي

كمان ممكن الأدوية دي تزود التفكير في الانتحار عند الأطفال والمراهقين بالذات أول ما يبدأو العلاج.

أعشاب ممكن تساعدك في علاج الاكتئاب

في ناس مبتحبش تاخد أدوية عشان أثارها الجانبية، وبتحب تتعالج بالأعشاب على أساس أن ملهاش أضرار. لكن دا مينفعش، أنت لو قررت تاخد أعشاب فاعرف أن مفيش رقابة قوية عليها، وعشان كدا لازم تسأل دكتور، ومتوقفش علاجك غير بإذنه. ولو بتسأل عن أكتر الأعشاب اللي بيستخدمها الناس فهي:

  • نبتة سانت جون: دي مش مناسبة للناس اللي عندها اضطراب ثنائي القطب.
  • الجينسنغ: بيستخدموها في الطب التقليدي لتقوية العقل وكمان تقليل القلق.
  • البابونج: عشبة مشهورة بفايدتها الكبيرة ودا لأن من مكونتها مركبات اسمها الفلافونويد ودي ليها تأثير ضد الاكتئاب.
  • اللافندر: هيساعدك في تقليل القلق والأرق.

هو الأكل له دور في علاج الاكتئاب؟

أيوة طبعًا في أكلات بتساعد في علاج الاكتئاب وكمان مفيدة للجسم عمومًا. مثلًا:

  • فاكهة
  • خضروات
  • سمك
  • زيت الزيتون

مش هنوصيك لازم تبعد عن الأكل المضر زي السكريات الكتير والأكل اللي كله مواد حافظة.

هو الاكتئاب وراثي؟

للاسف الاكتئاب ممكن يكون وراثي. مثلًا الشخص اللي ليه أب أو أخ عنده اكتئاب فهو معرض أكتر مرتين أو تلاتة أنه يجيله اكتئاب عن الناس التانية. لكن عادي ممكن ناس يجلها اكتئاب، وعلى الرغم من أن مفيش حد في العيلة عنده.

المراجع:

المصدر

اترك تعليق