ما هو اضطراب الوسواس القهري؟

158

كلنا بيجلنا لحظة نفكر هو أنا فصلت المكوة، هو أنا طفيت النار، هو أنا قفلت الباب، وغيرها من الأفكار ودا طبيعي. لكن الوسواس القهري بيخلي الأفكار دي تكتر أوي، ومنقدرش نسيطر عليها لدرجة أنها بتأثر على الحياة وبنفضل في مكانا مش عارفين نخلص حاجة من كتر الشك والتشتت.

الموضوع بيوصل للتكفير المؤذي لنفسك ولغيرك. والمشكلة أنك بتكون مش قادر تسيطر عالتفكير كأن في حاجة غصب عنك بتجبرك عالتفكير. يعني مثلًا تتأكد 10مرات من أنك قفلت الباب، أو تغسيل إيدك كتير جدًا عشان تتأكد أنها نضيفة. مع أنك مش بتستمتع، بس بتضطر تعمل كدا عشان توقف التفكير اللي مش بيسكت جواك. في ناس بتحاول تتجنب الحاجات اللي بيوسوسوا منها وناس ممكن توصل لأنها تشرب مخدرات علشان تبطل تفكر. لكن دا أكيد مش هينفعها وهيضرها أكتر. الصح أنك تسأل دكتور عن الحل وكمان في نصايح لو عملتها بتعلمك تسيطر على وسواسك.

اختبار-الاكتئاب-bannerشاكك إن عندك اكتئاب؟ دوس هنا واعمل اختبار الاكتئاب أونلاين

أعراض الوسواس القهري

أن يبقى عند أفكار وسواسية مش معناه أنك مصاب باضطراب الوسواس القهري. لكن مع الوسواس القهري، بتحس أن الأفكار والسلوكيات دي مسببالك خانقة من كتر ماهي مسيطرة عليك وواخدة وقتك، ومنعاك من حياتك الطبيعية. أكتر أفكار الوسواس القهري هي:

  • الخوف من التلوث بالجراثيم
  • الخوف من أذية نفسك أو غيرك
  • أفكار جنسية عنيفة
  • تركيز كبير على فكرة دينية أو أخلاقية
  • الخوف من فقدان اللي بتحبهم
  • فحص كتير للحاجات، الأقفال والأجهزة والمفاتيح
  • بتتأكد من أن حبايبك بخير وبيتنفسوا
  • العد أو التخبيط أو تكرار كلمات بعينها أو أي حاجة تانية بنفس الطريقة
  • وقت كتير في الغسيل والتنضيف
  • ترتيب الحاجات كتير
  • الخوف من الغلط في الصلاة وإعادتها أكتر من مرة
  • مبترميش الجورنال القديم أو أي خردة

أعراض الوسواس القهري عند الأطفال

بداية اضطراب الوسواس القهري غالبًا في فترة المراهقة أو الشباب، لكن الأطفال ممكن يجلهم بردوا. لكن خد بالك لأن في اضطرابات تانية أعراضها شبه الوسواس القهري. مثلًا زي اضطراب فرط الحركة، ونقص الانتباه، والتوحد، ومتلازمة توريت. علشان كدا لازم الطفل يتعرض على دكتور.

الوسواس القهري والاكتناز

في ناس دايمًا تحب تحتفظ بأي حاجة حتى لو مش مهمة. لأنهم بيخافوا من أنهم يحتاجوها فيوم، وكمان بيحسوا أن هيحصلهم حاجة لو رموها. دا نوع من الوسواس القهري، والدراسات بتقول أن حوالي 25% من اللي عندهم وسواس قهري عندهم اكتناز قهري.

لكن فرق ما بين الاكتناز القهري وما بين اضطراب الاكتناز القهري. لأنه حالة منفصلة. الاكتناز القهري الناس فيه بتجمع حاجات من خوفها، ومش بشكل مبالغ فيه أوي ومبيكونوش فرحانين بدا. ولكن مجرد طريقة للتخلص من الفكرة اللي فدماغهم. أما اللي عنده اضطراب الاكتناز القهري بيكون مستمتع بجمعه للحاجات. لكن من كترها البيت بيتملي وبيبدأ يقلق من فكرة إنه مضطر يرمي حاجات منها علشان المكان.

نصايح هتساعدك في التخلص من الوسواس القهري:

  • حدد الحاجات اللي بتحفزك

الخطوة الأولى في علاج الوسواس القهري، هي تحديد الحاجات اللي بتسببه. يعني ممكن تكتب كل الحاجات اللي بتعشها فيومك وبتسببلك وسواس، وكمان أدي لخوفك من كل حاجة فيها درجة وإزاي بتحاول تتخلص منها.

الطريقة دي هتساعدك في توقع رغبتك قبل ظهورها ومن هنا هتخف. يعني مثلًا لو الوسواس بيجيلك أنك مقفلتش الباب حلو، فحاول من قبلها أنك تتأكد أنك قافله تمام. كمان ردد مع نفسك الباب مقفول كويس مفيش مشكلة. مع الوقت الرغبة القوية اللي جواك في أنك تتأكد الباب مقفول ولا لأ هتقل، وقيس على كدا أي وسواس بيقابلك.

  • قاوم الوسواس القهري

كويس أنك تتجنب الحاجات اللي بتسببلك وسواس قهري، لكن دا مش مفيد علطول. لأنه هيزود خوفك، وعلشان كدا حاول تواجه وسواسك مرة على مرة هتعرف تتحكم فيه . هديك مثال، لو عندك وسواس غسل الأيد بعد لمس الحاجات. حاول تمسك أوكرة باب بره البيت، وامنع نفسك من غسل إيدك بعدها. بالتدريج الرغبة هتقل.

  • اطلب المساعدة

الوسواس القهري ممكن يزداد لو حسيت بالوحدة، علشان كدا لازم تطلب من اللي حواليك يساعدوك. كل لما تكون مرتبط بيهم كل ما بيقل خوفك. كمان ممكن تدخل في مجموعة لدعم الوسواس القهري، علشان تسمع غيرك ويسمعوك وتساعدوا بعض.

  • اتحكم في توترك

التوتر مش بيسبب الوسواس القهري، لكن بيخلي الأعراض أسوء. عشان تهدى بننصحك بلعب رياضة بتحبها أو التواصل مع ناس إيجابية بتفهمك. في حاجات تانية بتساعدك زي أنك تبص لصورة بتحبها أو اسمع موسيقى أو استمتع بكوباية شاي أو ألعب مع قطتك. كمان ممكن تسترخي بالتأمل أو اليوجا أو أي طريقة بتنفع معاك، وخد نفس عميق علشان يساعدك في تقليل التوتر.

  • غير أسلوب حياتك

أٍسلوب الحياة الصحي بيقلل التوتر، يعني كل كويس وابعد عن السكريات الكتير والمواد الحافظة، ونام حلو، والعب رياضة. ياريت لو تلعب في جو مفتوح لأن دا بيصفي ذهنك أكتر ويخلصك من التوتر.

  • ابعد عن السجاير

لو مفكر أن السجاير أو غيرها من الحاجات دي بتهديك، فأنت غلطان. الموضوع كله مجرد شوية وقت وبينتهي وترجع تاني أسوء من الأول. لأن النيكوتين أصلًا منبه قوي، والتدخين عمومًا بيزود التوتر والوسواس القهري.

  • خد أدويتك

مضادات الاكتئاب أوقات بتتاخد علشان تعالج الوسواس القهري. لكنها مش كفاية لوحدها.

المراجع:

المصدر

اترك تعليق