ما اسباب الاكتئاب عند النساء؟

170

الاكتئاب منتشر وبيسبب مشاعر وحشة زي أنك تكوني يائسة ومبتقدريش نفسك. بتختلف درجته من حد للتاني والنوع البسيط منه بيخلي في لامبالاة وقلة نوم ومفيش نفس للأكل. ولكن الأعراض ممكن تزيد وتوصل للانتحار ودا في حالة الاكتئاب الشديد. فخدي بالك كويس من نفسك، واطلبي من اللي حواليكي المساعدة. ولو لزم الأمر روحي لدكتور يساعدك متسكتيش.

على فكرة الاكتئاب منتشر بالذات عند الستات، وبيتعرضوا ليه ضعف الرجالة. مثلًا الدراسات بتقول أن ست من كل 4 ممكن يحصلها اكتئاب في وقت معين في حياتها.

اختبار-الاكتئاب-bannerشاكك إن عندك اكتئاب؟ دوس هنا واعمل اختبار الاكتئاب

أي بيخلي الستات يجيلهم اكتئاب؟

الحاجات اللي بتزود فرصة الاكتئاب عند الستات هي:

  • أسباب وراثية
  • طبيعة الشخصية
  • الحالة النفسية
  • التعرض لضغوط الحياة والشغل
  • فقدان الأب أو الأم وهي صغيرة
  • مفيش اهتمام وحب
  • فقدان الشغل
  • التعرض لاعتداء جنسي
  • تناول بعض أدوية
  • اكتئاب ما بعد الولادة

أي أعراض الاكتئاب عند الستات؟

  • دايمًا حاسة بحزن وقلق
  • العزلة ومبتهتميش بأي حاجة حتي جوزك وعلاقتك بيه
  • الأرق
  • العياط الكتير
  • الشعور بالذنب والتشاؤم
  • النوم كتير أو قليل جدًا
  • تغيرات الشهية والتخن أو الرفع بسرعة
  • التعب أقل مجهود
  • التكفير في الموت والانتحار
  • مبتقدريش تاخدي قرار
  • الاكتئاب كمان ليه أعراض جسدية مش بس نفسية ومنها؛ الصداع وألم المعدة.

هو الاكتئاب وراثي؟

أيوة الاكتئاب ممكن يبقى وراثي وينتشر في العيلة. ودا بيحصل أكتر عند الستات في عمر 15-30 سنة، ومفيش سبب واضح للمشكلة.

اعرفي الفرق بين الاكتئاب عند الستات والرجالة

الاكتئاب بيحصل عند الست في سن صغيرة وبيقعد كتير، ولو اتعالجت منه فخطر أنه يرجع أكبر. كمان بيرتبط بالمواقف اللي بتعشها كل يوم لأنها بتكون حساسة أكتر لأي حاجة. وكتير بتحس الست بالذنب وتلوم نفسها على كل كبيرة وصغيرة لدرجة توصلها للتفكير في الانتحار. لكن مش كتير بينفذوا الحمد لله، إنما الرجالة هما اللي بينتحروا بنسبة أكبر.

العلاقة بين الدورة الشهرية والاكتئاب

كلنا عارفين أن الست في وقت الدورة الشهرية بتكون متغيرة وحزينة وعصبية وبتعيط من أقل حاجة ودا مش دلع أو مشكلة فيها. لأ هي عندها نوع من الاكتئاب نتيجة حالة اسمها ” متلازمة ما قبل الحيض” ودي متلازمة بتيجي ل3ستات من كل 4 في عمر العشرينات أو التلاتينات.

حالة الاكتئاب دي في الغالب بتظهر قبل الدورة الشهرية ب7-10 أيام. وبعدين بيحسوا بالراحة مع نزول الدورة. السبب فيها مش معروف بالظبط لكن الأكيد أن تغير الهرمونات بيأثر على المزاج.

الاكتئاب عند الحامل

فرحة الست بالحمل وأنها هتشوف حته منها قريب كبيرة، ويمكن متتخيلش أنها هتكون مكتئبة. لكن للأسف الاكتئاب في الحمل بييجي لستات كتير دلوقتي. في حاجات ممكن تكون السبب:

  • الاكتئاب حصل لناس تانية في العيلة
  • العمر في وقت الحمل، الستات الصغيرة بيجلهم اكتئاب أكتر
  • الوحدة
  • مفيش دعم وحب من اللي حواليكي
  • مشاكل مع جوزك أو أهلك أو فالشغل
  • خوف من أنك تفقدي الحمل

تأثير الاكتئاب على الحمل

الاكتئاب له تأثير وحش عالحمل. بيخلي الست متقدرش تاخد بالها من نفسها كويس، ولا بتهتم بكلام الدكتور، ولا بتنام كويس، ولا بتاكل كويس. طبعًا كل دا بيأثر على صحة الجنين. مش بس كدا لأ دا في حالات الاكتئاب الشديدة في ستات بتشرب سجاير أو مخدرات أو أدوية خطر على صحة الجنين. لأن الاكتئاب بيخليها مش مرتبطة بالطفل اللي جاي على عكس الأم في حالتها الطبيعية.

الاكتئاب في الحمل بيزود فرصة الاكتئاب بعد الولادة ودي حالة تانية معروفة اسمها “اكتئاب ما بعد الولادة”. الست وقتها بتبقي حزينة دايمًا وبتعيط ومش عارفة تفرح بابنها أو بنتها ودايمًا حاسة بالذنب أنها مش أم كويسة ومش عارفة تتعامل. لكن الحلو أن الحالة دي مش بتطول وبتتعود الأم على حياتها الجديدة.

إزاي تعالجي الاكتئاب؟

الستات اللي عندها اكتئاب بسيط، مثلًا بسبب الدورة الشهرية ممكن يعالجوا الموضوع بانهم يتمرنوا أو يخرجوا مع أصحابهم ويتفرجوا عالتلفزيون أو أي حاجة تشغل وقتهم وتبسطهم. أما اللي عندهم اكتئاب شديد فلازم يروحوا للدكتور علشان يساعدهم بالعلاج المناسب ليهم زي الأدوية، وطبعًا مينعش تاخدي علاج من نفسك لأنه ممكن يسبب أضرار كتير. كمان ممكن الدكتور يشوف أنك محتاجة للعلاج النفسي الفردي أو الجماعي عشان متحسيش أنك لوحدك وتستفيدي من تجارب غيرك.

المراجع:

المصدر

اترك تعليق