ليه بنحس أحيانا بفراغ جوانا ؟

حاول تفتكر الأوقات اللى حسيت بيها بفراغ أو غربة جواك وكنت بتكافح الشعور ده . على الرغم من أنك بتعرف ايه الحاجات اللى بتبسطك ومحدد هدفك في الحياه ، لكن حاس بوحدة . لما بتقول ” أنا حاسس بفراغ ” ده معناه ايه ؟

اختبارات نفسية

الفراغ الداخلى سببه نقص الحب.
وفقا للدكتورة مارجريت بول ، الفراغ الداخلى هو حالة ذهنية سببها نقص الحب،  لما متحبش نفسك وتتجاهل أي مشاعر ودايما تحاول أن كل اللى حواليك يهتموا بيك ويوافقوا على أي حاجة بتقولها، وقتها أكيد هتحس بفراغ داخلى . كل الناس مبدعين وعندهم إمكانيات كتيرة ، لكن مش كلهم بيستغلوا ده صح وبالتالي بيملوا فراغهم بالأكل أو الدخول في علاقة عاطفية أو الشغل أو أي حاجة علشان ميركزوش في الإحساس ده .
حالة الفراغ النفسى هيساعدك تفهم أكتر أحاسيسك الداخلية.
وعلشان نلاقى حل للمشكلة لازم نفهم الحالة اللى بنمر بيها . ودى الأعراض الأكثر شيوعا :

  •  مش عارف أنت مين وايه هدفك في الحياة .
  •  مليان أفكار سلبية.
  • دايما مستنى موافقة سواء من أهلك أو أصحابك .
  • مش عارف تشرح مشاعرك أو تعبر عن نفسك .

أحيانا الفراغ بيكون زى الثقب الأسود أو حاجة فاضية جواك.
أهم حاجة لازم تكون فاهمها هي أن الفراغ هو حالة من النقص . والحقيقة أن أغلب الناس اللى بتعانى من الشعور المزمن بالفراغ كانوا في طفولتهم محسوش بالحب والاهتمام من أهلهم وده خلى عندهم شعور دائم أنهم مش كويسين كفاية. ده معناه أن السبب الحقيقى للفراغ الداخلى هو عدم وجود علاقة عاطفية وعدم إظهار الحب .
والنتيجة هي أن الشعور ده بيسافر معانا فى حياتنا ، انعدام الانتماء إحساس مؤلم جدا للإنسان ومش مريح والإنسان ممكن يعمل أي حاجة علشان يبعد عنه.
الشعور بالفراغ ممكن يسبب اكتئاب.
على الرغم من أن الشعور ده مألوف بالنسبه لناس كتير ، لكن لو سبته من غير مراقبة ممكن يؤدى لاضطراب مزمن زى الاكتئاب ،و في ناس كتير بتلجأ للإدمان علشان تخرج من الإحساس ده . علشان كده لازم نبقى فاهمين الأسباب اللى بتخليك بتحس بالفراغ.
الحل هو أنك تعرف ايه اللى ناقصك.
هل هو شعور بقلة الانتماء أو الاتصال بين الأشخاص ؟ في اقتراحات كتيرة من الخبراء في ازاى تتعرف وتتعامل مع الفراغ الداخلى :

  •  ركز وعيد التوازن لنفسك.

وفقا ل “كايتلين سليت” وهو معالج في مجال الزواج والأسرة في مدينة “رالى ” بالولايات المتحدة الأمريكية ، لازم نركز على نفسنا ونقضى وقت أكتر في التفكير في رغباتنا.
علشان جسمك وعقلك يكونوا في حالة إيجابية ، ممكن تلجأ للتأمل أو ممارسة التمارين.
أسهل طريقة لإعادة التوازن لنفسك عاطفيا وجسديا هو أنك تاخد حمام دافى ، والأبحاث بينت أن الاستحمام ليه فوايد كبيرة زى تخفيف الألم وتحسين الحالة المزاجية .

  •  دور على احتياجاتك عن طريق مساعدة الآخرين.

كلنا عندنا احتياجات ، لكن الاحتياجات دى بتكون مؤلمة لما منكنش قادرين نحصل عليها ودايما بنفكر ازاى نحقق احتياجتنا بنفسنا ، لكن أوقات لازم ندور على حد يكون سند وعون لينا ، لأن طلب المساعدة ممكن يكون حل لحاجات كتيرة في الحياة وممكن تكون الخطوة الأولى لتلبية احتياجاتك .

  • قدر اللى عندك.

طريقة تانية علشان تخلص من حالة الفراغ الداخلى اللى بتحس بيها هى إحساسك بالامتنان. والأبحاث بينت أن الشعور بالامتنان هو من أهم المشاعر الإيجابية اللى بتسمح للناس بتوسيع رؤيتهم للعالم ولنفسهم ، وبيكون النتيجة بناء علاقات اجتماعية ومهارات أفضل.
وده معناه أن الناس اللى عندها شعور بالامتنان والشكر بيكونوا مرتاحين أكتر في علاقتهم مع عيلتهم وأصحابهم.
حاول تقدر كل حاجة حواليك من خلال أنك تلاحظ كل الحاجات الكويسة والنعم اللى دايما بنعتبرها أمر مفروغ منه أو دايما موجودة وبالتالي مش بنقدرها ، كمان اتعلم أنك تقدر الحاجات الصغيرة لأن ممكن مجاملة بسيطة من شخص تخلى عندك طاقة إيجابية طول اليوم.

  • متبطلش أبدا استكشاف حاجات جديدة.

علماء الأعصاب اكتشفوا أنك تتعلم حاجة جديدة بيكون ليها آثار تحفيزية بتعادل مادة الدوبامين المسئولة عن الإثارة العاطفية ، علشان كده حاول كل يوم إنك تتعلم حاجة جديدة حتى لو كانت بسيطة. نصيحة كمان مفيدة جدا هي تغيير البيئة المحيطة حتى الحاجات الصغيرة زى تغيير الإضاءة في الأوضة أو تغيير ديكور البيت ممكن يكون ليه تأثيرإيجابى على حالتك العاطفية.

  •  اطلب المساعدة من أصحاب الخبرة لو احتاجت.

كتير من الناس مش بتعرف تحدد بالظبط سبب الشعور ده ، أهم حاجة في الحالة دى هي أنك متيأسش واطلب المساعدة من دكتور كويس لأنه هيقدر يساعدك أنك تعرف سبب الإحساس بالفراغ الداخلى اللى ممكن تكون أسبابه من الماضى كمان مش بس من دلوقتى.
التعرف على أسباب الفراغ الداخلى ممكن يكون تحدى وكمان ممكن تاخد وقت طويل ، لكن بدل من أنك تشتت نفسك عن طريق أنك تملى الفراغ بحاجات زى الأكل أو التليفزيون أو الدخول في علاقة عاطفية محكوم عليها بالفشل أوالإدمان، حاول تعرف ايه اللى مخليك حاسس بفراغ.

اترك تعليق