أنا كسلان ليه؟ عشان إنت أصلاً سحلية.

المقال ده طويل و تقيل، فا لو خلقك ضيق و الكسل مسيطر عليك متكملش، بس تخيل انت كدة عملت اللى انت جاي تقرا حل ليه، انت “كسلت” تقرأ، جاية من  الكسل ها!

علشان نعرف الكسل سببه ايه، لازم نعرف اصلا  دماغنا بيشتغل ازاى! فهنتناول بطريقة بسيطة كدة نظريتين، واحدة بمرجع علمى و هى ال Lizard Brain و التانية بمرجع دينى روحانى و هى.. هتعرف فى الاخر ?

الLizard Brain:

ببساطة دماغنا بيتكون من 3 مناطق اساسية، منطقة منهم اسمها الlimbic cortex و دى المسئولة عن كل نزعة بدائية فى الانسان، من الأكل و الشرب لغاية الجنس(مش مهم الاتنين التانيين ? )

علشان كدة المنطقة دى اتسمت بالLizard (السحلية) لان نشاطها عبارة عن اكل و شرب و خناق على الفريسة و تكاثر و نوم، بس مبتعملش اى حاجة غير انها بتستهلك، معندهاش اى نشاط انتاجى(بغض النظر عن انها بتتزواج و تنتجلنا سحليات بنفس السلوك البطئ) ?

طب احنا لينا تحكم فى الجزء ده من دماغنا؟

نظريا لأ، انت مابتتحكمش فى انك تجوع او تعطش، مبتتحكمش انك تغير على حد او لأ، مبتتحكمش تحب مين و امتى!

كام مرة قولت هعمل دايت و فجأة لقيت نفسك قدام باب التلاجة بتنقنق من طبق البطاطس! كام مرة قولت هنزل اجرى الصبح و المنبه يرن و تقفله و تنام!

كام مرة سمعنا عن حد من المشاهير رجع تانى للادمان و هو لسه خارج من المصحة؛ فى بداية الالفينات الاخبار مكنش وراها غير بريتنى سبيرز شربت و اتقبضت عليها، ليندزى لوهان خرجت م المصحة و دخلت تانى بعد اسبوع!

طيب مفكرتش مرة هو الناس دى معندهاش دماغ؟ الفلوس لاحسة مخهم؟ ما بيعقلوش تصرفاتهم؟

اه هى اكيد لاحسة مخهم و ال3 طبقات داخلين على بعض مما لا شك فيه يعنى ?

بس فعلا خلينا نحط نفسنا مكانهم، نقنقتك للبطاطس و انت عامل دايت لا تقل شأنا عن رجوع حد فيهم للمصحة بعد يومين تلاتة! انتوا الاتنين ملكمش تحكم فى اللى بيحصل جوا دماغكم، انتوا الاتنين الLizard مسيطرة عليكم، لان الفعل اللى تم عكس القرار اللى اتاخد.

طب احنا ليه ملناش تحكم فى الجزء ده من تصرفتنا؟

الاول افتكر اننا قولنا فوق “نظريا” احنا ملناش تحكم فيها، و بناء عليه لازم نعرف ليه؟!

ببساطة، اى نزعة بدائية جواك هى ال Comfort zone بتاعتك، يعنى اعمل دايت و اجوع ولا اكل اكل بحبه، هوبا هتلاقى نفسك قدام التلاجة بتنقنق فى طبق البطاطس، ليه؟ علشان مخك عاوز يرجع لحالة السكون تانى، مش عاوز يفضل فى حالة اضطراب بسبب “قرار” انت خدته!

يعنى نقدر نستنتج من كدة ان سبب رجوعك عن اى قرار هو انه 90% من الوقت بيكون عكس النشاط البدائى للمخ اللى مش عاوز يعمل حاجة غير انه ياكل و ينام و يقعد على الفيس بوك!

اوقات لما تيجى تذاكر او تخلص شغل متكوم عليك، تبدأ تحس بجملة “ماليش نفس” على طرف لسانك ? لان خلاص عقلك ربط المذاكرة و الشغل بإنهم اوضاع بتهدد حالة الهدوء و السكون اللى هو فيها، فيخليك متعملهاش، فا هوبا تلاقى نفسك بتقول “ماليش نفس” ?     الحقيقة انت ليك نفس، بس دماغك هى اللى مسوحاك!

ليا نفس؟ يعنى اقدر اتحكم فى الجزء ده من دماغى؟

عمليا بقى، اه تقدر تتحكم بس ده محتاج منك ارادة و قوة عزيمة و شوية اهداف واضحة و محددة كدة تساعدك و تحفزك انك تكمل!

وسوسة الشيطان:

 هو عاوزك تعمل كل حاجة حرام ممكن تتخيلها (اللى معظمها متحكم فيها الجزء البدائى ده من المخ، طب لو انت عرفت تقوم كل النزعات البدائية دى و تحطها فى اطار سليم؟!
كدة يبقى انت عديت اول سلمة من التحكم فى نفسم،  و طالع التانية، يسيبك بقى هو تكمل!
لا، يوسوسلك علشان تكسل، و ال Lizard بتاعك يشتغ لو متعملش حاجة، و متبقاش منتج، و متبقاش فرد ليه قيمة مضافة فى المجتمع!

و يبقى انت كدة اه مبتعملش حاجة حرام، بس فى نفس الوقت انت ملاكش اى تلاتين لازمة، و هو عاوز ده ليه، علشان ربنا خلقنا نعمر الارض، و اضافتنا لاى قيمة ايجابية هيبقى خطوة فى الطريق ده، فا صباح الفل انت كدة بتعمل حاجة حرام بردو!

فسواء انت مرجعيتك علمية، او دينية، او الاتنين، فانت عندك تفسير صريح و واضح لكسلك، كل اللى عليك انك تعرف مفاتيحك فين و العب عليها، اعرف انت بتيجى ازاى و جيب نفسك تحت طوعك.
حتى لو الطريقة اللى هتجيب بيها نفسك دى انك تقف تهزقها قدام المراية كل يوم!

جربت تهزق نفسك قدام المراية قبل كدة اصلا؟ الموضوع بالنسبالى ممتع جدا 😀

اترك تعليق