فوائد التأمل واليوجا لحالتك النفسية والصحية

238

دراسات كثيرة أثبتت ان ممارسة التأمل بانتظام ليه فوايد كثيرة جدا، زي تقليل التوتر وزيادة التركيز وخفض ضغط الدم، وتقليل أعراض القلق والضغط النفسي، وفى أنواع كثيرة جدا من التأمل وكلها ليها فوائد كثيرة للصحة النفسية والعقلية، وهنعرفكم أكثر في المقال ده عن أهم فوائد التأمل.

  1. زيادة التركيز

التأمل بيساعد جدا على زيادة التركيز في المهام اليومية لأنه بيعتمد في الأساس على التركيز على الحاضر، وفى سنة 2011 في دراسة اتعملت في كلية الطب بجامعة هارفارد، أثبتت ان في علاقة بين ممارسة التأمل وقدرة المخ على التعامل مع المعلومات الجديدة، وفى الدراسة دي تم فحص أدمغة أكثر من 17 شخص قبل وبعد اجراء التجارب عليهم، وثبت ان الأشخاص دول بعد 8 أسابيع من ممارسة التأمل، زادت المنطقة الرمادية في ادمغتهم وهي المنطقة المسئولة عن التعليم والذاكرة والحياة العاطفية.

  1. تحسين احترام الذات والوعي الذاتي

التأمل بيخلى حياتك أهدى وبيخليك تتعرف على نفسك أكثر وتعرف الصفات الإيجابية في شخصيتك، ده غير انه هيخليك واعى ومتفهم أكثر لأفكارك ومشاعرك، ودة هيوصلك في النهاية لزيادة احترامك لنفسك، والأبحاث اللي أجراها الباحثون في جامعة ستانفورد اكدت أن التأمل الذهني بيساعد جدا الأشخاص اللي بيعانوا من القلق الاجتماعي، وبيقلل القلق وبيحسن احترام الذات بعد فترة من الممارسة المنتظمة للتأمل.

  1. تقليل التوتر

التأمل اليقظ كمان بيخفض مستويات الكورتيزول في الدم (وهو الهرمون المسئول عن الإحساس بالتوتر في الجسم) ودة بيخليك في حالة أهدى كتير، ده غير ان تكرار كلمة معينة او عبارة معينة أثناء التأمل ممكن يكون ليه أثر مهدئ جدا، من خلال التركيز على المنترا الخاصة بيك اللي بتخليك تحول تفكيرك عن أي أفكار مشتتة للانتباه.

  1. التحكم في القلق والاكتئاب

التأمل بيساعد عقلك على التركيز على الحاضر، ودة بيخلى احتمال التفكير في الأفكار اللي مضايقاك اقل بكتير، لأن الأفكار المقلقة دى ممكن توصل في كتير من الأحيان ممكن توصل للاكتئاب، والتأمل في حد ذاته ممكن جدا يكون جزء من خطة علاجية شاملة للصحة العقلية لأن التأمل اليقظ مفيد جدا للأشخاص اللي بيعانوا من القلق لأنه بيهدى العقل وبيقلل أعراض الاكتئاب بما فيها من مشاكل النوم وفقدان الشهية سوء المزاج.

  1. محاربة الإدمان

ممارسة التأمل ممكن تقدر تغير مستقبلات الدماغ المرتبطة بإدمان الكحول والمخدرات، ودة بيقلل الرغبة جدا في تعاطى المواد دي، دة غير ان التأمل اليقظ بيزود من مستوى وعيك وبيخليك تقدر تتحكم في رغباتك بشكل أحسن، ده غير ان التأمل بيساعد في منع الانتكاسات المستقبلية للناس اللي بتعانى من اضطراب تعاطى المخدرات.

  1. السيطرة على الألم

أطباء كتير بينصحوا بممارسة التأمل للسيطرة على الألم، وخاصة للمرضى اللي بيعانوا من آلام حادة ومزمنة زى آلام ما بعد الجراحة، والتأمل مش هيخفى الإحساس بالألم بس هيساعد جدا في السيطرة عليه والتعامل معاه بشكل أحسن.

  1. التحول لشخص أكثر لطفا وحبا

التأمل بيعزز احساسك بالتعاطف مع نفسك ومع الناس، وبيساعد المخ انه يدرك مشاعر الآخرين، وييدعم شعور الايثار، وبيقلل من تحيزك لنفسك، وعشان تقدر تبدأ في ممارسة التأمل ممكن تتخيل شخص بتحب في دماغك وتتمنى له السعادة وبعد كدة ممكن تمدد شعور الحب ده لنفسك وللآخرين، وممكن كمان تستخدم عبارات بسيطة تكررها بينك وبين نفسك زي مثلا “أتمنى السعادة ليا وللناس”.

                                                                  

اترك تعليق