إزاي تساعد اللي بيعانوا من اضطرابات الأكل في رمضان؟

لو شوفت حد بيعاني من النحافة الشديدة أو السِمنة المُفرطة لازم تقف ثانية قبل ما تعبّر عن رأيك في جسمهم لإن بنسبة كبيرة هما بيعانوا من اضطراب عقلي وجسدي ونفسي اسمه”اضطراب الأكل”.

وللأسف الشديد مفيش عِلم كافي بالمرض ده في أغلب المُجتمع لإن الوزن شئ ظاهري بيُعتبر وصمة عار للشخص أحيانًا ومقياس للجمال في وقت تاني مع إن ده غلط ومفيش حد يستحق إن شخصيته تكون متعلقة بوزنه خاصة لو بيعاني من الإضطراب ده.

أغلب التجارب الشخصية اللي عانت من الإضطراب ده كانت البنات والسيدات وده لإنهم طول الوقت تحت المُلاحظة من اللي حواليهم سواء وزنهم زاد أو نقص وده اللي ممكن يدخلهم في حالة إكتئاب شديدة ورحلة علاج طويلة وأوقات من شِدة الإضطراب وصعوبته بيكون فيه حالات ممنوعة من الصيام في رمضان،

تخيل بقى الشهر اللي بنستناه من السنة للسنة مش هتقدر تصومه بسبب اضطراب مالكش يد فيه!

عشان كدة لازم تقف وتتعامل كويس جدًا مع الناس اللي بتعاني من الاضطراب ده

 طيب إزاي تساعدهم؟

خليّ بالك من كلامك

خاصة لو اللي بيعاني من الاضطراب فرد من أفراد عيلتك لازم تكون حَذِر في كلامك لإن الإنتقاد لما بيجي من القُريبين بيكون أصعب، بلاش تنتقد المظهر الخارجي اللي مش بيمثل ١% من الشخصية اللي بتتعامل معاها واللي أصلًا مختارتش تُصاب باضطراب يتعبها بالشكل ده، وركّز عالطِباع والمواهب اللي بتخلي الشخص ده مميز مش مُجرد صورة طالب مِنها تكون مثالية عشان تعاملها كويس!.

شجّعهم على الأكل

لو طول السنة مش بتتجمع العيلة عالأكل فرمضان بيكون مُختلف وبتكون فُرصة إن الكُل بيتقابل عالسحور والفِطار، وفي الوقت ده انت هتلاقي الشخص المُصاب بالاضطراب بيحاول ينسحب عشان ياكُل لوحده سواء عشان إصابته بتخليه ياكُل بشراهة وخايف من نظرتكم أو عشان فاقد للشهية ومش عايز حد يضغط عليه، وفي الحالتين لازم تخليه ياكل معاكم عشان نفسيته تتحسن وياريت محدش يضغطه بأي تعليق على طريقة أكله أيًا كانت لإن قبولكم ليه في الوقت ده هيحميه من الإكتئاب.

متستسلمش

ممكن تقعد وقت كبير بتعمل نفس الحاجة دي بنفس الكيفية بس أهم حاجة في رحلة علاج مُصابي اضطراب الأكل الدعم النفسي من اللي حواليهم عشان كدة متزهقش وخليك بتعمل الخطوات دي دايمًا.

متلومش نفسك

مهما كانت درجة قُربك من الشخص المُصاب بالاضطراب اعرف إنك مالكش ذنب في إصابته، مهما كنت متضايق عشانه وصعبان عليك متحُطش نفسك في خانة المُذنب لأنك فعليًا معملتش حاجة بس ممكن تعمل بقى اللي يساعده ويخليه يتعالج ويكمل علاج عشان يرجع زي الأول وأحسن.

اترك تعليق