البزرميط الدمـاغ الصحة النفسية

6 جمل ما تفتكرش غيرهم فـ الأيام صعبة

الحياة صعبة
كتبها سها مطر

مش دايما الحياة بتمشى زى ما أحنا عايزين ، في الوقت ده بنحس بالإحباط واليأس ودى حاجة بتواجهنا كلنا . من السهل إنك تستسلم للسلبية ، بس أنت ممكن تختار طريقة التعامل مع الأوقات الصعبة بأنك تستخدم لغة إيجابية أكتر مع نفسك.

حياتنا مش خط واحد ، علشان كده السعادة مش معناها حياة من غير مشاكل ، لكن قدرتنا على التعامل مع كل الى بيواجهنا هو اللى بيفرق أو بعبارة تانية : ” ليس لدى العالم ما يمنحك إياه ، إنما يظهر لك ما تمنحه أنت لنفسك” . ” فريدريك داودسون ” . علشان كده خليك فاكر ال6جمل دول لو واجهتك أي مشكلة :

  1. مفيش حاجة بتفضل على حالها:
    كل ليلة بتعدى علينا بييجى بعدها صبح وكل يوم بيبقى بداية جديدة بأيدك تخليه أحسن . صعب أنك تفكر بالطريقة دى لما تكون بتمر بظروف صعبة .لكن لازم تبقى عارف أن كل مشكلة ليها نهاية لأن ببساطة مفيش مشكلة بتستمر مدى الحياة .
  2. التجارب الصعبة بتقويك مش بتضعفك:
    ناس كتير بتقلق أن التجارب الصعبة الى مروا بيها تكون ضرتهم أو شوهتهم ، لكن الحقيقة أنها خلتهم أقوى. ممكن تكون مريت بظروف صعبة في الماضى لكن دلوقتى عدت والى اتبقى منها التجربة والدرس الى طلعت بيه ، لازم تبقى عارف أن الظروف الى مريت بيها وعدتها كانت دليل على أقوتك وأنك قدرت تتغلب عليها بعض النظر عن قد ايه كانت صعبة.
  3. خليك إيجابى حتى لو الى حواليك سلبيين :
    أوقات كتير الناس الى حواليك بتحاول تحبطك ،بس في الحقيقة أنت مش مضطر تسمعهم . حاول دايما تحافظ على ابتسامتك وتركز إنك تكون دايما إيجابى كمان خليك فاكر أن الناس المتشائمة بتكون تعيسة جدا في حياتها وعايزينك تبقى زيهم. الاختيار دايما في أيدك أنك متتعاملش معاهم .
  4. المرور بالتجارب المؤلمة هيخلى عندك حكمة أكتر :
    كل تجربة مؤلمة بتمر بيها بتطلع منها بدرس بتتعلم منه طول حياتك . في وقت المشكلة مش هتبقى عارف ايه الدرس من التجربة دى لكن بعد كده هتفهم أن أصعب حاجة مريت بيها كانت أكتر حاجة فادتك أنك تعرف نفسك أكتر وتفهم الحياه بشكل أعمق . اصبر وخليك متأكد أن في الآخر وبعد ما المشكلة تخلص هتبقى إنسان قوى وحكيم.
  5. استمر ومتقفش في الوقت الى بتواجه فيه مشكلة :
    حتى وأنت بتعانى من مشكلة فلازم تتحرك لقدام ، حتى لو أنت مش قاد تكمل . ممكن تكون بتمر بمشاكل في علاقاتك أو في شغلك بس خليك متأكد أنها هتساعدك بعدين في حياتك أنك تلاقى السعادة الحقيقية .خليك على استعداد أنك تتعامل مع الحياة مهما كانت الظروف صعبة.
  6. الخوف مش بيغير حاجة :
    لو فضلت مركز مع كل حاجة وحشة ممكن تحصل ، فأنت كده بتجذب كل السلبيات ليك . وعادة الناس الى بيقلقوا على طول بيكون إنجازهم أقل من باقى الناس ، ده لأنهم مشغولين جدا بالقلق . والعكس أنك لو حاولت تركز على أحسن حاجة ممكن تحصل ده هيخلي عندك دافع أكبر أنك تستغل الفرص المتاحة قدامك وتتحمل المخاطر.

عن الكاتب

سها مطر