ازاي الضغط النفسي بيأثر على النوم؟

48

جسمنا طول عمره “شقيان” معانا، ودي حقيقة علمية بحتة واللي بيثبت كده إن هرمونات التوتر والاجهاد (الكورتيزول) الجسم بينتجها بشكل طبيعي على مدار اليوم، اول ما بتصحي بيكون بكمية كبيرة وبعدين يقلل تدريجي لحد ما تترمي عالسرير من التعب وتنام، والحقيقة إن الكوتيزول دا بيسبب اليقظة الشديدة في المواقف الصعبة أو وقت ما تحس بتوتر شديد.

أنواع الضغط النفسي/ الاجهاد:

الضغط الحاد:

ودا بيكون ضغط لوقت قصير بيجي فجأة غالبا ما بيصاحبه خوف شديد، زي انك تتأخر على امتحان أو تفوت ديدلاين في الشغل، وأعراضه بتكون صداع مع ألم في المعدة وزيادة معدل نبضات القلب وبعده على طول مشاعر حزن أو غضب، والاعراض دي كلها بتهدي وبتختفي بعد وقت قصير

الضغط الحاد العرضي:

لما تتكرر أو تتراكم حالات الضغط الحاد وقتها بنسميها ضغط حاد عرضي، ودا للناس اللي بتحس بتعب في انهم يعملوا شغلهم اليومي أو حتى ابسط مجهود والإحباط دا بيبان من شراهة الاكل مثلا، لكن للأسف له مضاعفات خطيرة زي الاكتئاب السريري وأمراض القلب.

الضغط المزمن: 

ودا بيكون بسبب كذا عامل زي الأحوال المالية الصعبة، سوء المعاملة، والصدمات النفسية، إلخ.. للأسف لو متمش علاج أو تخطي العوامل دي بتسبب مع الوقت ألم نفسي ويأس قافش في عقل الشخص مش بيسيبه وبيحسسه باعراض الاجهاد طول الوقت.

طب ازاي الضغط النفسي بيأثر على النوم؟

الأرق هو اضطراب نوم شائع بيحصلنا نتيجة الاجهاد، الأرق معروف بأنه الصعوبة المستمرة في بداية النوم أو اثناءه أو جودة النوم  بشكل عام، المؤشرات والدراسات الحالية بتقول إن 10-30% من البالغين بيعانوا من الأرق، ممكن تشخيص إصابة الشخص بالضغط المزمن لو ظهرت أعراضه ثلاث مرات على الأقل في الأسبوع لمدة ثلاثة أشهر على الأقل، والضغوط اليومية ممكن تكون هي السبب الرئيسي زي:

  • الضغوطات.
  • مشاكل أو عدم الرضا في الشغل.
  • الطلاق أو مشاكل زوجية.
  • وفاة أحد أفراد العائلة.
  • مرض أو إصابة خطيرة.
  • تغييرات جذرية في الحياة

مش كل الناس بيجيلها ارق مزمن بسبب الضغط المستمر ولكن اللي بيعانوا من اضطراب القلق غالبا هما الأكثر عرضة للأرق، كده كده الناس بتحس بتوتر في يومها ولكن القلق بخصوص النوم زيادة على جوانب حياتهم دا هيخلي أعراض الأرق تخرج من أيديهم، والحاجات اللي ممكن تزود الارق والشعور بالضغط:

  • الشعور بالإرهاق والضيق.
  • صعوبة الانتباه أو التركيز.
  • انك مش عارف تتعامل مع زمايك وصحابك وحتي عائلتك.
  • الهيبرة واضطرابات مزاجك؟
  • فرط النشاط والعدوانية.
  • انخفاض الطاقة وفقدان الشغف.

الارق نتيجة الضغط المزمن ممكن يظهر فترة ويقل وترجع تنام بدون صعوبات وللأسف ممكن الاعراض تضاعف يعني يعملك شخير شديد أونوبات اختناق أو اجهاد حتى خلال النهار،وتعتبر السمنة برضو من اخطر العوامل اللي بتاثر على القلق.

هل النوم عموما ممكن يقلل من الضغط؟

الحقيقة إن سبب نوم الانسان في الأول والأخر هو عشان جسمه يرتاح ويخرج كل طاقة التعب والاجهاد، بس لو كنت متوتر ومش عارف تنام أصلا ممكن تجرب الخطوات بانتظام ونسميها:

النظام الصحي للنوم:

جدول نوم

يعني لازم تدخل السرير وتصحي منه في نفس الأوقات كل يوم مينفعش تقلل ساعات نومك أو تزودها لأنه مش صحي حتى بعيد عن التوتر، والجدول دا هتطبقه حتى في الاجازات والاعياد (بلاش استعباط).

أجواء الاوضة

لازم تبعد شغلك ومذاكرتك عن أوضتك، او بمعني اصح عن سريرك، لازم تقلل الإضاءة قبل النوم بساعة وخلي اوضتك تبقى دافية قبل ما تدخل تنام.

ابعد عنك الموبايل

خلينا متفقين ان كل أجهزة التلفزيون والموبايل واللابتوب بتصدر انوار زرقة بتخلي أجزاء من مخك تفضل يقظة، فا خلي الموبايل على ترابيزة بعيدة عنك عشان لو مضطر تظبط منبه تبقى تسمعه.

قلل كافيين

معروف كلنا منقدرش نعيش من غير قهوة لكن حاول تتجنب شرب كافيينات بشكل عام قبل النوم بساعتين، لان غصب عنك هتحس انك يقظ وفايق ومش هتعرف تنام في الوقت اللي متعود عليه.

العب الرياضة بانتظام

النصيحة اللي هنفضل نقولها في كل مقالة، انك تمارس رياضة الصبح او بعد الضهر هيساعدك تقلل توتر وتنام اسرع بالليل.

جرب برضو في اول عشر دقايق قبل النوم ان جسمك يكون في أكتر وضع بيريحك وتحاول تصفي دماغك من كل الافكار خصوصا السلبية عن طريق انك تركز على تنفسك، لو عدي 15 دقيقة ومنمتش قوم اتمشى شوية في البيت أو اقرا كتاب في اضاءة قليلة بس المهم انك متقربش من اي اجهزة الكترونية.

اترك تعليق