الفلوس مش كل حاجة
لو انت من هواة المُجازفة في البورصة ولا هتلعب البخت أو اليانصيب أو مستني رسالة تجيلك تعوضك عن كمّ الرسايل اللي بعتها على برنامج الحلم ومفكّر إن البلية لعبت معاك هتبقى غلطان.
آه والله زي ما بنقولك كدة، الأبحاث اللي اتعملت عالناس اللي كسبت مبالغ كبيرة من مُسابقات ومجازفات مُقارنة بالناس اللي مكسبتش أثبتت إن اللي مكسبوش قادرين يعيشوا حياة طبيعية أكتر من اللي كسبوا.
وبكدة نقدر نقولك إن الفلوس مش كُل حاجة، أو هي ممكن تبقى كُل حاجة عادي وإحنا بنهوّن عليك بس بجد فيه قاعدة علمية اسمها “التكيُّف اللذيذ”، وهي الحالة اللي بتخليك تستمتع بحاجات مفيهاش مُتعة زي روتين حياتك اليومي واللي لو فقدته بتلاقي إن لأ لسة ناقصك حاجة حتى لو كان المُقابل المادي في سبيل خُسارتك للروتين ده كبيرة جدًا.
والدليل على كدة إن أي حاجة بتلمع في عينك في الأول هيعدي عليك وقت وتلاقي إنها بتبهت، يعني الوظيفة الجديدة في الأول مُبهرة بمرتب عالي وتأمينات كويسة بس مع الوقت وضغط الشغل هتبقى مُجرد روتين، الجواز تجربة حلوة ومشاركة وحُب وتعاون وونس بس بعدين بتلاقي مسؤليات مادية ونفسية، وكذلك الفلوس في الأول انت منبهر بالنقلة الإجتماعية والتغيرات اللي بتحصلك ومع الوقت بتلاقي إنها هتخلص فلازم تحافظ بقى عليها وتحسبها أو تشغلها في مشروع كويس، فكونك طالب من ورقة يانصيب أو لعبة حظ أو ضَربة سهم تغيرلك حياتك فده شئ مش منطقي ومش حقيقي، لإن أوقات حياتك العادية البسيطة بتكون أسعدلك من حياة جديدة مش عارف تتعامل معاها.
واللي عايزين نلفت وجهة نظرك ليه إن أغلب الناس دلوقتي بقت نظرتهم مادية جدًا-مش مادية عايزين حاجات ملموسة لأ مادية عايزين فلوس فعلًا-وده لإن تفكيرهم في السعادة مُقترن بس بالفلوس ودي بجد مش حقيقة لإن مهما كانت الفلوس كتير مش هتقدر تشتري بيها حاجات زي الصِحة والراحة والرِضا، بل بالعكس فكرة إنك تعلّق نفسك بفكرة إنك لما توصل للمبلغ الفلاني هترتاح دي مش هتريحك أصلًا!، وده لإنك بتفضل مرحّل السعادة لحد مرحلة ممكن توصلها وممكن لأ.
انت كدة أصلًا بترتكب جريمة في حق نفسك وهي إنك بتربط سعادتك على مدى بعيد ممكن يحصل فيه حاجة وممكن ميحصلش فبتهرب من الواقع وبتبدأ تشتري سمك في مياه، فكُل اللي عايزينك تعرفه بس إن انتظارك لشئ في المُستقبل يخليك سعيد مش بيخليك سعيد بيخليك قلقان ومُنتظر طول الوقت، وجاينلك بتجارب حقيقة وأبحاث بتقولك إن البخت مش الورقة اللي هتغير حياتك لأ، البخت هو الواقع اللي لازم تدور فيه على ساعتك دلوقتي بدل ما تفضل مستني.
