العلاقات

الطلاق أدب مش هز كتاف

الطلاق-ومابعده

الطلاق….كفكره مش سهل الوصول ليها، اكيييد حصل مشاكل كتير وكان بنهايتها الحل الافضل…. الطلاق

اثره النفسى على الزوجين تفتكروا بيبقوا فرحانين؟؟!

فالواقع طبعا لا حتى لو حب كل واحد فيهم يظهر انه سعيد بالقرار ودا الحل الامثل…طب بنعرف منين!!

بيبان والله ?  و- بالعقل كدا – حتى لومش زعلان على قطع صلته بالطرف التانى بس زعلان على فكرة الفشل وانه مااخترش الاختيار الصح اللى يفضل يكمل معاه طول الحياة. …..ضيع جزء من عمره فى ترتيب احلامه فى غير محله..

ومن السلوكيات اللا اخلاقية اللى منتشره بين كتير من المنفصلين

  • فضحية او نشر كل واحد فيهم عيوب التانى وبينسوا الحلو اللى بسببه وافق عليه? طب هو ماينفعش ننفصل من غير مانشتم بعض..نقول نصيب وخلاص ? وكم من المضايقات اللى لا حصر لها لو فى اطفال.
  • الاب انانيه لامثيل لها يتجوز ويخلف مره تانيه ويعيش حياته ويفرض على ام الاولاد ماتتجوزش وتقعد تربى العيال…اللى هو انت بجد ازاى . بتحرم اللى شرعه رب العباد .. هى مش انسانه ومن حقها الحياة…،وللاسف عاطفتها كأم بتقيدها خوفا على الاولاد
  • الاب ممكن يصرف فلوسه فى اى حاجه بس مايديش ام العيال…..طب عيالك ياعم الحاج ….ماهى اللى طلبت الطلاق ?

ونيجى نبص بقى على الام

  • لازم تطلع كل المساوىء وايه اسباب الطلاق وكلها تتحكى للعيال? طبعا امال تستعطفهم ازاى..
  • لو الاولاد راحوا يقابلوا باباهم المقابله كلها هات ?
  • ولازم تحقيقات قالكم ايه وقولتوا ايه واى موقف يحصل يبقى هو غلط..وتهدم صورة الاب والقدوة

طب انا راضيه بضميركم دى تربية تربوها للاولاد !!!!

طب عايزه منكم ايه

  • اما تختلفوا وتقرروا تنفصلوا راعوا تربية الاولاد اتفقوا انهم الخيط اللى فاضل بينكم وتربوهم صح
  • مش ذنب اولادكم ان كل واحد فيكم حط سقف احلام فى التانى اكتر من امكانيااته…..والواقع….
  • ماتدفعوش اولادكم تمن اختيارتكم
  • الاب ماتحكمش على الام بتقيدها طول الحياة هى حتى لو اتجوزت عمر حب اولادها ماهيتاثر
  • الاب ماتحرمش اولادك من حبك ولا مالك علشان تضايق فى مامتهم
  • الاب ماتسرفش فى الدلع على اولادك لما تشوفهم علشان تبقى انت الضحيه. ….الاسراف هيضرهم ….اكتر ماهيفيدك انك تبقى الحنين ،خليك وسط دلع وعاقب ان لزم الامر
  • الام كفايه استعطاف الاولاد ومش لازم تشوهى صورة ابوهم دايما علشان لما تعجزى فى حل مشكله معاهم تلاقيه سند معاكى فى حل مشكلاتهم ….هدفكم واحد اولادكم وبس
  • الام مش لازم سين سؤال وجيم جواب عن كل كلمة اتقالت من باباهم ليهم كانت ايه المقابلة… سيبى مساحه للخصوصية
  • الام لما ابنك ولا بنتك يبقوا شبه باباهم وانتى خلاص مش طايقه حتى سيرته ماتتطلعيش غلبك فيهم  …?? علشان انتى فى حملك اكيد كان نفسك يبقوا شبه باباهم وشبهك ??? مش ذنبهم ان حلمك اتحقق،،
  • مش لازم تحددى يوم معين بزمن معين اللى يشوفوا فى باباهم وقت مايعوز ووقت ماهما يكونوا محتاجين يشوفوا …وافقى ماتحرميش علشان انتى الحاضنه …هتبقى فى نظرهم امنا الغوله اللى بتبعدنا عن بابا
  • واخيييرا……راعوا اولادكم عايزين جيل من غير عقد

مع تمنياتى حياة اسرية سعيدة
شيرين محمود زمرة

.

عن الكاتب

شيرين محمود زمرة

أنا شيرين محمود زمـرة، أخصائية تخـاطب، وأشارك بنصائح للأمهـات عامة عن التعامل مع أطفالهم. اخدت دبلومة فى التخاطب...ودراستى فى الاساس فى مجال التربية خريجة كلية التربية جامعة عين شمس...واخدت دبلومة كمان فى طرق التدريس...وبحضر دورات كتييير ومحاضرات عن التربية وتعديل السلوك وتنمية بشرية....مهتميه انى اكتب وارشد الامهات عن طرق تربية الابناء من اجل حياة أفضل ....المجتمع الصالح بيبتدى بالاسرة الصالحة....أرحب بكم للتواصل معي والاستفسار ورايكم فى كلامى مباشرة من خلال الضغط على رابط الفيسبوك في حالة وجود أي استفسارات لديكم.