التأمل واليوجا: 12 فايدة

التأمل هو تدريب عقلك على التركيز وإعادة توجيه أفكارك، الاقبال على ممارسة التأمل بتزيد كل يوم عن اللي قبلة مع اكتشاف فوائدة الكثيرة، وممكن تستخدم التأمل كوسيلة لزيادة وعيك بنفسك وبالآخرين، وفى ناس كثيرة بتلاقى ان التأمل وسيلة فعالة لتقليل التوتر وزيادة التركيز، ده غير ان في ناس كتير بتعتمد على التأمل لتطوير عادات صحية مفيدة وتحسين المزاج وتحسين أنماط النوم والسيطرة على الألم، والمقال ده هيوضحلك أهم 12 فائدة علمية مثبتة لممارسة التأمل:

تقليل التوتر

تقليل التوتر والضغط النفسي من أهم الأسباب اللي بتدفع الناس لممارسة التأمل، خاصة بعد زيادة معدلات التوتر النفسي والجسدي بين أغلب الناس اللي بيأدى لزيادة مستوى هرمون الكورتيزول المسئول عن شعور الإرهاق في الجسم، وزيادة الهرمون ده في الجسم بيتسبب في أضرار كثيرة للجسم زي إطلاق مواد كيميائية ضارة اسمها السيتوكينات، والمواد دي معروف انها بتعطل النوم وتزودا لقلق والاكتئاب وبترفع ضغط الدم، وبتزود معدلات الإرهاق وبتشوش التفكير.

السيطرة على القلق

التأمل بيقلل من مستويات التوتر، وبالتالي تقليل القلق، والتأمل بيكون مفيد جدا في حالات الأشخاص اللي بيعانوا من القلق الناتج عم اضطراب القلق العام، ده غير ان التأمل بيحسن القدرة على التعامل مع التوتر، وبعض التجارب أكدت ان المداومة على ممارسة التأمل لمدة 8 أسابيع على الأقل بيقلل بشكل ملحوظ مستوى الاكتئاب والقلق عند الأشخاص.

تعزيز الصحة العاطفية

ممارسة التأمل تقدر تخليك تتعامل مع نفسك وحياتك بنظرة أكثر إيجابية، لأنه بيحسن من أعراض الاكتئاب وبيقلل من الأفكار السلبية.

تفهم نفسك أكثر

التأمل هيخليك تفهم نفسك أكثر ودة هيساعدك على تطوير شخصيتك، لأنك هتتعرف على الأفكار اللي بتدور في دماغك اللى ممكن تكون أفكار سلبية او ضارة وهتقدر تحولها لأفكار بناءة أكثر ايجابية، ده غير ان التأمل هيقلل شعورك بالوحدة وهيحسن حياتك الاجتماعية بشكل عام.

زيادة التركيز

التأمل زيه زي رفع الاثقال للجسم، يعنى زى ما لناس بتشيل حديد عشان تقوى عضلاتها، اللي عاوز يقوى تركيزه لازم يمارس التأمل، عشان كدة دايما هتلاقى الناس المنتظمة على ممارسة التأمل عندها تركيز وانتباه أفضل بكثير من غيرهم، لأنه التأمل بيقلل جدا من شرود الذهن والقلق وضعف الانتباة.

الحفاظ على قوة الذاكرة

القدرة العالية على الانتباه والوضوح في التفكير ممكن تخلى عقلك شباب حتى مع التقدم في العمر، والتأمل بيحسن من الانتباه والذاكرة خاصة لكبار السن، وبيحارب ضعف الذاكرة الطبيعي اللي بيحصل نتيجة التقدم في العمر، وحتى بالنسبة لمرضى الخرف ممكن التأمل يحسن من حالتهم بنسبة كبيرة.

زيادة المشاعر الإيجابية

بعض أنواع التأمل ممكن تزود المشاعر الإيجابية اللطيفة تجاه نفسك وتجاه الآخرين، وفى نوع من التأمل أسمة تأمل الحب واللطف، النوع ده من التأمل بيطور عندك المشاعر والأفكار اللطيفة، وكلما زاد الوقت اللي بتقضيه في التأمل كلما زادت المشاعر الإيجابية اللطيفة، وبتزيد المشاعر دي بمرور الوقت مع ممارسة التأمل.

محاربة الإدمان

التأمل بيزود القدرة على ضبط النفس وإدراك محفزات السلوك اللي بتسبب الإدمان، وبالتالي ده بيسهل توجيه الانتباه ومعرفة الدوافع للإدمان، ده غير ان التأمل ممكن يعالج ادمان الاكل لأنه بيساعد على التحكم الرغبة الشديدة لتناول الطعام وبيساعد على تقليل النهم.

تحسين جودة النوم

أكثر من نصف سكان العالم عانوا من الأرق وصعوبات النوم في مرحلة من مراحل حياتهم، والتأمل بيكون حل مثالي للأرق لأنه بيساعد الجسم على الاسترخاء والتخلص من التوتر ووضع الجسم في حالة من الهدوء اللي بتساعد على النوم، ده غير انه بيساعد في التحكم في الأفكار الجامحة وقت النوم.

السيطرة على الألم

إدراك الألم مرتبط بالحالة الذهنية، والأبحاث العلمية أكدت ان المواظبة على التأمل في روتين الحياة بيساعد بشكل فعال في السيطرة على الألم، وأيا كان سبب الألم اللي الشخص بيعانى منه فالتأمل يساعد على التعامل مع الألم وتقليله، ويستخدم التأمل كعلاج تكميلي للعلاج الدوائي المعتاد.

خفض ضغط الدم

التأمل بيحسن الصحة البدنية من خلال تقليل الضغط على القلب، وضغط الدم مش بينخفض بس وقت ممارسة التأمل ده بينخفض عموما بمرور الوقت عند الناس اللي بتمارس التأمل بانتظام، ودة بيقلل الضغط على القلب والشرايين وبيساعد على الوقاية من أمراض القلب.

التأمل سهل متاح في أي وقت وأي مكان

ممكن ممارسة التأمل في أي وقت واى مكان لأنه مش محتاج لمعدات معينة او مساحة كبيرة، وممكن ممارسته لمدة دقائق يوميا، وفى أنواع رئيسية للتأمل وهي:

  • تأمل التركيز: والنوع ده من التأمل بيركز على الانتباه على شيء واحد او فكرة واحدة او صوت او تصور معين، والنوع ده بيساعد عقلك انه يتخلص من المشتتات، وبيكون التركيز فيه على التنفس او المنترا او الصوت المهدئ.
  • تأمل المراقبة المنفتح: وبيعتمد النوع ده من التأمل على زيادة الوعي بكل جوانب البيئة المحيطة وتدريب الأفكار والشعور بالذات.

إذا كانت البيئة اللي حواليك في الشغل او البيت متسمحش بتخصيص وقت ثابت وهادئ لوحدك للتأمل، ممكن تشترك في مجموعات خاصة للتأمل، ودة هيساعدك ويحسن فرصتك في التأمل عشان هتكون موجود في مجتمع بيدعم لنفس النشاط، أو ممكن تصحى بدري كل يوم عشر دقائق وتستفيد من الوقت الهادي الصبح بدرى وتمارس التأمل ودة هيخلق عندك عادة صحية ثابتة وهيساعدك تبدأ يومك بطريقة إيجابية.

وفى النهاية لازم تعرف ان التأمل عادة صحية ممكن أي حد يمارسها لتحسين الصحة العقلية والنفسية والعاطفية، والتأمل مش محتاج أي تجهيزات أو إمكانيات كبيرة عشان تستمتع بيه، وتقدر تخصص دقائق كل يوم للتأمل عشان تحسن حياتك.

اترك تعليق