سايكويكي

الاكتئاب عند المراهقين : تعاسه وحزن وهرمونات

الاكتئاب عند المراهقين : تعاسه وحزن وهرمونات

الاكتئاب عند المراهقين بقي حاجه عادية رغم إنها الفترة اللطيفة اللي في حياتهم ومفيش مسؤليات وكده بس برضه بيكتئبوا ،معظم المراهقين بيحسوا بالتعاسة كتير دا غير التغيرات الهرمونيه اللي بتحصلهم في المرحلة دي ، ومزاجهم اللي حبه فوق وحبه تحت ، وبالتالي بيجيلهم اكتئاب.

فيه دراسة بتقول أن 1 من 8 مراهقين بيبقي عندهم اكتئاب، بس الاكتئاب ممكن نعالجه عشان نتفادي المشاكل الخطيرة اللي بتيجي معاه ، ولو أستمر المراهق في مود الاكتئاب اكتر من أسبوعين يبقي لازم يروح لدكتور نفسي.

ليه بيعاني المراهقين من الاكتئاب ؟

فيه أسباب كتيره عن معاناة سن المراهقة من الاكتئاب، زي مثلا ممكن المراهقين تزيد عندهم مشاعر التفاهه وإن درجاتهم وحشة، ومستواهم في المدرسة مش ولا بد، دا غير أنهم بيقارنوا حالة أسرتهم المادية بحالة أقاربهم ، حط عليهم الميول الجنسية أو الحياة الأسرية ممكن كل ده يكون ليه تأثير كبير على الطريقة اللي بيحس بيه المراهق في السن ده ، وساعات البيئه نفسها اللي عايش فيها تجيب اكتئاب.

ايه هي أعراض الاكتئاب في سن المراهقة ؟

ممكن نلاقي اختلاف كبير بين الاكتئاب عند الأطفال وعند المراهقين في الأعراض، يعني مثلا الأطفال اللي داخلين  علي سن المرهقة ممكن يميلوا انهم يناموا كتير بعد المدرسة، دا غير أن عادات الأكل عندهم بتتغير، وممكن يتجهوا للسرقة بغرض السرقة بس مش أنهم محتاجين الحاجه اللي سرقوها .

وهنا هنقول شوية علامات لو ظهرت علي المراهق يبقي مكتئب.

  • اللا مبالاة.
  • بيشتكي من الآلام، زي الصداع، المغص، وجع الضهر، أو التعب.
  • صعوبة في التركيز.
  • صعوبة اتخاذ القرارات.
  • الإحساس بالذنب بشكل مبالغ فيه.
  • مفيش أي نوع من تحمل المسئولية حتي مسئولية نفسه زي انه يغيب من المدرسة.
  • سدة النفس أو الأكل بزيادة أو بياكل غصب عنه وبالتالي بيخس أو بيتخن بسرعه.
  • فقدان الذاكرة.
  • بيفكر في الموت كتير.
  • السلوك المتمرد
  • الحزن، القلق، أو اليأس
  • قالب يومه صاحي بالليل ونايم بالنهار.
  • بيحس انه بردان فجأه .
  • بيتجه انه يجرب الخمره أو المخدرات أو الجنس بطريقة غير مشروعة .
  • بيبعد عن صحابه .

إزاي بيتم تشخيص الاكتئاب في سن المراهقة ؟

بيتم تحديد شدة الاكتئاب في سن المراهقة وخطر الانتحار على أساس تقييم المقابلات مع الدكتور النفسي، هنا الدكتور هيبص علي علامات الاضطرابات النفسية المحتملة زي القلق أو تعاطي المخدرات، وفيه كمان الأشكال المعقدة من الاكتئاب زي  الاضطراب الثنائي القطب  أو اللي بيسموه مرض الهوس الاكتئابي أو الذهان، هنا الدكتور النفسي هيقوم بتقييم المخاطر في سن المراهقة اللي هي ممكن تتشكل في فكرة الانتحار أو القتل، الحالات اللي بيسيطر عليها تشوية النفس بتكون اكتر عن البنات اكتر من الأولاد، انما الأولاد بيميلوا أكتر للأنتحار.

ازاي بيتم التعامل مع الاكتئاب في سن المراهقة ؟

فيه اساليب متنوعة لعلاج الاكتئاب ، بما فيهم الأدوية و العلاج النفسي، كمان العلاج الأسري ممكن يجيب نتيجة ويقلل من الخناقات اللي بتحصل مع المراهقين وبين عيلتهم في السن ده اللي بيكون سببها الاكتئاب.

المراهقين اللي عندهم اكتئاب شديد من الأفضل أنهم يدخلوا المستشفي هناك هيبقوا في آمان أكتر،عشان نوعية الأكل والأدوية ومضادات الاكتئاب ممكن تقلل ميلهم للأنتحار أو حتي السلوك السيئ  عند الأطفال والمراهقين اللي بيعانون من الاكتئاب والاضطرابات النفسية.

كمان استخدام مضادات الاكتئاب للمرضى الصغيرين بيكون محتاج مراقبة ومتابعه من الدكاترة .

ايه هي  علامات التحذير اللي بتقول إن المراهق ده بيميل للأنتحار؟

المشاكل الأسرية ، موت او انفصال حد من الأسرة ، أو الإحساس بالفشل في المدرسة أو في علاقات المشاعر السلبية، الاكتئاب في سن المراهقة غالبا بيظهر المشاكل بشكل كبير مع الأحساس بالآلام،  الانتحار هو فعل من اليأس والاكتئاب في سن المراهقة وغالبا بيكون له سبب جذري .

  • بيتكلم كتير عن يأسه من المستقبل
  • بيتخلي عن نفسه يعني لما بيتكلم اكنه بيوصف شخص تاني خالص.
  • بيستعد للموت ، وبيتخلي عن الحاجات بتاعته اللي بحبها ، وبيكتب وصيته أو رساله وداع اللي بيحبهم.
  • بيتجه لأنه يتعاطي المخدرات أو الخمرة عشان يقدر ينام أو يخفف من الألم النفسي اللي بيحس بيه.
  • بيهدد انه يقتل نفسه.

لو لقيت العلامات دي علي أي مراهق من الفضل انه يروح لدكتور نفسي.

ازاي نعالج الاكتئاب عند المراهقين:

فيه تجارب بحثية قالت إن الفعالية الأدوية الاكتئاب بتعمل على انها تخفف من أعراض الاكتئاب في سن المراهقة، وهنا فيه ثلاث مناهج مختلفة لعلاج المراهقين في مراحل الاكتئاب.

  • العلاج الاول :باستخدام الأدوية المضادة للاكتئاب المرضى اللي أعمارهم من 8-18 .
  • العلاج الثاني: عن طريق العلاج السلوكي المعرفي ، أو العلاج المعرفي السلوكي ، عشان يساعد المراهق انه يعترف انه مكتئب ويغير من طريقه تفكيره السلبيه اللي بتسبب الاكتئاب.
  • العلاج الثالث: ده بيبقي خلطه من الأدوية والعلاج المعرفي السلوكي .

عن الكاتب

حنان جمـال