إزاي تِحمي اللي بتحبهم من الإدمان؟

37

لو بتحِب شخص بيعاني من الإدمان انت كمان هتعاني بس من القلق والخوف عليه إنه يروح مِنك وهتبقى أمنيتك الوحيدة في الوقت ده إنك تشوفه كويس.

تأثير الإدمان على العلاقة

لو أتأكدت من إن شريك حياتك أو صديقك أو حد من قرايبك مُدمن فده معناه إن العلاقة هتتأثر عاطفيًا وجسدًيا وماديًا ولإن دي صدمة على أي حد فمبتقدرش تنقذ العلاقة بالعكس ده وقتها العلاقة هيبقى ليها مسار تاني مُسمى وهو”الاعتمادية”.

الاعتمادية في العلاقة هي إنك وانت بتحاول تساعد الإنسان يتخلص من صراعاته بسبب الإدمان هتكون بتسهله الطريق إنه يكمل فيه!، وده لإنك مش بتوجهه للعلاج مثلًا لأ انت بتساعده ازاي يتجاوز مصاعب الأمر مش الأمر نفسه، غير إن كُل ما بتزيد درجة قُربك للشخص المُدمن كُل ما بتحمّل نفسك الذنب أكتر فبتفكر تساعده بإنك تخلصه من المشاكل المادية اللي بقى فيها أو تقوم بشغله وتهتم بدراسته أكتر منه مع إن اللي هو محتاجه منك فعلًا إنك تسخّر طاقتك ومساعدتك دي في تخلُّصه النهائي من الإدمان.

إزاي تساعد الأشخاص القُريبين منك لو وقعوا في مصيدة الإدمان؟

لو انت في علاقة وشريك حياتك طلع مُدمن أو اكتشفت إن حد من قرايبك أو صُحابك كدة ولقيت نفسك بتداري عليه وبتخلقله عُذر يبقى انت كدة مش بتساعده للأسف وفيه خطوات لازم تاخدها-برغم صعوبتها- عشان تقدر تساعده بجد:

  • متقفش جنبه في كُل مُصيبة بيعملها بسبب إدمانه وتحاول تخلّصه منها، سيبه يواجه نتيجة أفعاله.
  • متشيلش مسؤليته وخليه مسؤول عن كُل حاجة في حياته كإنك مش موجود.
  • متستسلمش للشعور بالذنب لإنك مش السبب في تعاطيهم للمُخدرات.
  • عبّر عن قلقك عليهم طول الوقت.
  • اقترح عليهم بداية رِحلة العلاج والتعافي.
  • متنساش نفسك عشان تقدر تكون بصحتك جنبه وقت ما يحتاجك.

إزاي تلاقي الدعم في رحلتك لمُساعدة اللي حواليك للتخلص من الإدمان؟

لو مش عارف تبدأ منين وإزاي تساعد اللي حواليك لو اتأكدت من إدمانهم فدلوقتي الموضوع بقى أسهل من الأول لإن ممكن تستعين بكُل سهولة بالخط الساخن لعلاج الإدمان “١٦٠٢٣” ودي خدمة مُتاحة ٢٤ ساعة وطول أيام الإسبوع والخط ده تابِع لصندوق مكافحة وعلاج الإدمان والتعاطي تحت إشراف وزارة التضامن الإجتماعي.

تعمل إيه لو انت وشريك حياتك مُدمنين؟

الإعتراف بالإدمان مش عيب لكن العيب إنك تكمل في طريق آخره مسدود، فلو انت بتحارب عشانك وعشان شريك حياتك فدي شجاعة كبيرة محتاجة تتكلل بالعِلاج عشان تنقذ نفسك وتنقذه، وممكن زي ما شديتوا بعض للطريق ده تساعدوا بعض وتروحوا جلسات العلاج سوا، سواء في جلسات التأهيل أو المُستشفيات ورحلتكم سوا هتهون عليكم صعوبة رِحلة التعافي.

إزاي تساعد شريك حياتك لو بقى مُدمن؟

فيه ناس كتير بتنفصل عن أزواجها بمُجرد معرفتهم بإدمانهم وده بيدمرهم أكتر، لكن طالما قررت تساعد حبيبك في العلاج فإحنا هنقولك إزاي:

  • افتكِر إن الإدمان مكنش اختياره ولا ضعف أخلاقي، إنما هو مرض بيصيب الدماغ.
  • اعرف إن الإدمان في الأول والآخر مسؤليته فمش هتقدر تكافح مكانه.
  • ارسمله الطريق وامشي معاه عليه.
  • شجعه طول الوقت.
  • دوّر على مُعالج متخصص واستشيره يساعدك في رحلتك معاه للتعافي.
  • ادعمه دايمًا ولكن متتحملش نتيجة أخطائه بسبب الإدمان أو تشيلها عنه وسيبه يواجه عواقبها.
  • خليك متفائل لإن الرحلة مش سهلة بس مش مستحيلة وفي الآخر هتقدر توصلوا سوا لبر الأمان.

اترك تعليق