٦ أسباب بتقولك ليه وجود الصُحاب مهم في حياتك.

الصُحاب هما الصُداع اللي مبتحبش تاخدله إسبرين، طعم الحياة بالنسبالك ومعنى المشاركة في حياتك، مش بس بيدولك كِتف تعيط عليه لأ بيدولك ضهر تتسند عليه وإيد بتشدك وقت الخوف وحُضن يساعك وعيون تقبلك في الوقت اللي مش قابِل فيه نفسك.

بس أهمية الصُحاب مش مُقتصرة على كدة بس لأ، دول ليهم أهمية كبيرة جدًا، وبتتمثل أهميتهم في تأثيرها على:

صحتك الجسدية

أيوة بالظبط زي ما قريت مش بس الصحة النفسية بتتأثر بوجود الصحاب لأ كمان صحتك الجسدية بتتأثر بوجودهم، ودي دراسة اتعملت ٢٠١٠ إن الناس اللي مُحاطة بأصحاب إيجابين أقل عُرضة للأمراض والوفاة المُبكرة من باقي الناس، غير إن وجود الصُحاب في حياتك بيخليهم ياخدوا بالهم منك في أسلوب أكلك ونظامك الصحي ويوجهوك للصح وده اللي بيمنع عنك أمراض كتير.

سلوكياتك الصحية

زي ما قولنالك وجود حد بيخلي باله منك بيمنعك من عادات سلبية كتير بحُكم تجربتهم وبدافع خوفهم وحُبهم ليك فهيمنعوك مثلًا من الإسراف في الأكل والسُكر والتدخين وهيشجعوك عالرياضة وهكذا لإن اللي بيحب حد بيكون عايز يشوفه في أحسن صورة.

دَعمك عاطفيًا

الأبحاث أثبتت إن السعادة مُعدية، فوجودك في بيئة سعيدة بيخليك سعيد وأقل عُرضة للإكتئاب وفي حالة حتى إصابتك بالإكتئاب أو تَعرُضك لصدمة نفسية عنيفة بتكون فُرصة التعافي ليك بوجود ناس جنبك بتدعمك أكبر من فُرصة الناس اللي بتعاني من الوحدة.

بناء ثِقتك بنفسك

أغلبنا دلوقتي بيعاني من التراست إيشوز ومن جلد الذات وأغلب الوقت بنكون مش قادرين نِقبل حتى نَفسنا، لكن وجود ناس حواليك بتِقبَلك وشايفاك كمان إنسان كويس وعنده صفات مُبهرة حاجة كَفيلة تخليك تُرفض كل شكوكك عن نفسك وتِقبل نفسك وتَثِق فيها وتشوفها بعيون اللي بيحبوك.

نهاية التوتر في حياتك

الدراسات أثبتت إن وجود الدعم النفسي وقت التعرض للتوتر بيحافظ على الجسم من أعراض التوتر الصعبة زي ألم المِعدة والتأثير على الشرايين والصحة العقلية، ودي حقيقة لإن وجود حد يخفف عنك الحِمل والخوف من حاجة بيخليك تهدى وتحِس إنك مش لوحدك.

وجودك في أحسن نُسخة ليك

طول ما انت ماشي بتتكعبل في ناس ممكن تقلل منك وتتعبك نفسيًا وجسديًا لحد ما تفكّر انك مش كويس بجد وهنا بيجي دور صحابك اللي بيصححولك الفكرة دي عن نفسك وبيخلوك تشوف نفسك في الصورة اللي تنصِفك وبكدة تقدر تطلّع أحسن ما عندك وتعيش في أحسن نُسخة ليك.

اترك تعليق