أسعار جلسات الدكتور النفسي في مصر عن تجربة شخصية

84

طيب بما إنك وصلت هنا وبتدور على أسعار جلسات الدكتور النفسي، فأنا بحييك مبدئيًا إنك قررت تشوف حد مُتخصص يساعدك على حل المشكلة اللي عندك. سواء كنت بتدور على علاج نفسي ليك أو لحد قريب منك فأنا هحاول أساعدك على قد مأقدر من خلال خبرتي الشخصية مع الدكاترة النفسيين في مصر.

خلينا الأول نعرف ليه أسعار جلسات الدكتور النفسي بتختلف من حد للتاني

بديهيًا هنا إن الخبرة تلعب دور كبير في الموضوع.. لكن الحقيقة لأ.

التفاوت في أسعار فيزيتا الدكاترة النفسيين مش دليل على خبرتهم خالص. الغالي مش تمنه فيه ولا حاجة. الدكتور زيه زي أي بيزنيس بيدرس السوق بتاعه والمنافسة والمنطقة اللي هو فيها وشُهرته وبناءًا عليه بيحدد أسعار الجلسات. زود على كدة كمان إنه بيقيم الجلسة في المتوسط بتاخد منه مجهود ذهني قد إيه وهنا الخبرة بتلعب دورها.

طيب إيه اللي يخليك تعرف إنهي دكتور أفضل من التاني

خلينا هنا نفترض إن كل الدكاترة شاطرة .. وبيراعوا ربنا في شغلهم.. أو عشان الافتراض يبقى منطقي أكتر.. خلينا نفترض إنك بتقارن بين 10 دكاترة سامع عنهم إنهم كويسين وشُطار.

صدقني لما أقولك إن في الـ10 دكاترة دول مافيش حد أشطر من التاني. يعني إيه؟

يعني ببساطة هتلاقي منهم دكاترة عندهم خبرة أكتر في التخصص الي بتدور عليه والخبرة بتلعب دور كبير جدًا في شطارة الدكتور من خلال تعرضه لحالات مُشابهه ومشاكل وتحديات نفسية قريبه من اللي بتمر بيها.

هتلاقي منهم دكاترة الفيزيتا بتاعتهم أكتر من اللي تقدر عليه.. ماهو ماينفعش برضه عشان نعالجك .. تفلس .. تقوم تتعب أكتر 😊 أو تمنعك قدرتك المادية عن الاستمرار في العلاج.. يبقى إحنا كدة ماعملناش حاجة.

كمان شطارة الدكتور بتعتمد بشكل أساسي على الرابط والثقة اللي بيبنيها مع المريض. يعني وارد جدًا تلاقي إتنين عندهم نفس المشكلة راحوا لدكتور واحد .. وكل واحد فيهم ليه رأي مُختلف خالص عن التاني في الدكتور ده.

أسعار جلسات الدكتور النفسي في مصر

في مصر أسعار جلسات الدكتور النفسي بتلعب في رينج من 300 لـ 600 جنيه للجلسة الواحدة.. في أكتر وفي أقل من كدة طبعًا .. وفي ناس بتطلب أرقام فلكية ولا كأنهم هايعالجوك من جلسة واحدة 😯 (مع إن ده ممكن يكون وارد لو الموضوع بسيط يعني).. وعلى الناحية التانية في دكاترة ممكن تبقى أسعارهم أكتر لكن بيديك استشارة مجانية.. يعني من الآخر تمن الجلسة في الحقيقة 200 جنيه مش 400.. بس هو بيعمل كدة عشان تروحله تاني. ودي مش لازم تفسرها إنها نصب يعني.. إنما الحقيقة مشكلة العلاج النفسي إنه بيطول وأحيانًا دي بتبقى طريقة كويسة عشان المريض يروح تاني ومايكسلش لأنه دافع تمن جلستين بالفعل.

أسعار الجلسات النفسية والوقت بتاعها

اللي أنا شخصيًا بعتبره نصب هو الدكتور اللي بيسعّر النص ساعة ب200 جنيه والساعة بـ300 مثلًا. لأني مقتنع جدًا إن نُص ساعة عمرها ماتكون كافية إنها تكون جلسة نفسية مُفيدة للطرفين. أنا على مـ أقعد وأرتب أفكاري وأبتدي أحكي عن اللي مضايقني أو اللي أنا فاكر إنه مضايقني (ما هو موضوع مُعقد بقى أمال أنا جاي لدكتور ليه؟) هاتكون النص ساعة خلصت أكيد.

أحيانًا كتير للأسف النص ساعة دي موجود ليها تسعير عشان حاجة بنسميها في التسويق الـ Decoy pricing أو بالعربي “السعر الوهمي” عشان يقنعك إن السعر الأساسي للجلسة هو فرصه لازم ماتفوتهاش..

دماغك بتحسب النص جلسة بـ200 يبقى لو ساعة هاتبقى 400 إنما أنا لو حجزت ساعة على طول هاتبقى بـ300 .. وده هايخليك تاخد قرار إنك تحجز بشكل أسهل وأسرع!

وبرضه مش معنى إنه بيعمل كدة إنه مش دكتور شاطر! الشطارة في البيزنيس والشطارة في شغله: حاجتين مالهمش علاقة ببعض ومش المفروض حاجة زي دي تأثر على قرارك ناحية الدكتور.

كمان الجلسة ممكن تبقى نص ساعة لما مثلًا تبقى مرتين في الإسبوع. أو تبقى جلسة مُتابعة سريعة أو سؤال عن مشكلة مُحددة في إطار علاج أصلاً شغال..

لكن نص ساعة كل إسبوع عشان نتعامل مع مشاكل نفسية تفاصيلها كتير زي الإكتئاب والقلق وغيرهم.. أعتقد ده كلام مش منطقي أبدًا.

الساعة في الجلسات النفسية في الغالب مش 60 دقيقة

لأن الدكتور في العيادة بيحاول مثلًا يدي مواعيد للناس كل ساعة وكتير من الدكاترة بتحتاج تستريح بين كل session والتانية قول 10 دقايق مثلًا .. وبغض النظر إني بدفع تمن ساعة وباخد 50 دقيقة فأنا في رأيي دي حاجة مُهمة جدًا ليا وللدكتور.. لأني مُتخيل حجم المجهود الفكري والعصبي (والجسدي كمان) اللي بيبذله مع كل مريض (بس طبعًا زي ماقولنا الخبرة هنا بتفرق جامد).

هل أسعار جلسات الدكتور النفسي أرخص من الأخصائي النفسي؟

لأ ومالهاش علاقة. لأن الدكتور مش ضروري يبقى أشطر من الأخصائي وبالتالي أرخص. أيوا أنا عارف إننا كبشر بنثـق أكتر في الروب الأبيض (وكل شركات معجون السنان عارفة ده 😉 ) إنما الحقيقة إن في أخصائيين نفسيين شُطار جدًا في شغلهم وفي منهم الأرخص والأغلى من الدكاترة عادي. اعرف أكتر إيه الفرق بين الدكتور النفسي والأخصائي النفسي وتروح لمين فيهم؟ في المقال ده.

صدقني اختيار المُعالج النفسي بتاعك ليه علاقة بتلات حاجات بس:

  1. الخبرة العملية بتاعته والتخصص اللي انت بتدور عليه
  2. التفاعل والثقة اللي هاتقدروا تبنوها مع بعض
  3. أسعار الجلسات وهل هاتقدر تتحملها ولا لأ

طيب هل العلاج النفسي مُكلف؟ وانت محتاج كام جلسة تقريباً؟

الإجابة اللي عايز تسمعها: لأ مش مكلف! وجلستين تلاتة وتبقى زي الفل!

إنما الإجابة الحقيقة هي: إنه مش مُكلف فعلاً! لو قارنته بأي مرض عضوي (بس مش شوية برد يعني). مرض محتاج شوية زيارات للدكتور وأدوية وأشعة وتحاليل لحد ما تبقى كويس! و50% من الناس اللي عندها أمراض نفسية بتحتاج تقريبًا من 15 لـ 20 جلسة عشان تتحسن بناءًا على كلام الجمعية الأمريكية للأطباء النفسيين، حتى النسبة دي كمان بتقل مع تطور العلاج النفسي عشان توصل إلى من 12 لـ16 جلسة بس.

الخطة العلاجية: (4-3-2-1 تيكي تاكا)

أول متاخد نفسك على محمل الجد بقى. وتقف وتقرر إن فيها مُشكلة وإنك محتاج تصلحها،  هاتبتدي تشتغل على حاجة إسمها خطة علاجية هدفها إننا نقسم اللي هانعمله لخطوات بسيطة كل فترة معينة عشان في الآخر نوصل لهدفنا (تيكي تاكا).

المرض النفسي زيه زي أي علاج محتاج تعمل حاجة إسمها خطة علاجية مع الدكتور بتاعك عشان تعرف أسعار جلسات الدكتور النفسي وأسعار الأدوية وتظبط مواعيد الجلسات عشان تضمن إنك عامل حسابك ماديًا وقافل على نفسك كل البيبان اللي تخليك ماتكملش زي الكسل أو الظروف والمواعيد والكسل أو الكسل! 😀

احنا ليه بنفتكر إن العلاج النفسي غالي؟

الحقيقة إن إحنا اللي بنحس العلاج النفسي غالي لأننا ببساطة بنتعامل مع نفسنا إننا مكنة في ترس.. هو الحقيقة العالم كله بيعاملنا كدة من أول الثورة الصناعية اللي وعينا عالدنيا لاقيناها.. وطبعًا المكنة لما بتبوظ بنصلحها.. مش بنوديها للدكتور. وياريتنا حتى لما المكنة بتبوظ عضوياً بنصلحها كويس.. إحنا بس بنلصمها!

أرجوك ماتلصمش نفسك!

اعمل الصح .. ودور على حد يساعدك!

Summary
أسعار جلسات الدكتور النفسي في مصر عن تجربة شخصية
Article Name
أسعار جلسات الدكتور النفسي في مصر عن تجربة شخصية
Description
بما إنك وصلت هنا فأنا بحييك مبدئيًا إنك قررت تشوف دكتور نفسي يساعدك على حل المشكلة اللي عندك. تعالى نعرف أكتر عن أسعار جلسات الدكتور النفسي.
Author
Publisher Name
بزرميط
Publisher Logo
اترك تعليق