استشارة نفسية: مشكلة إكتئاب و إضطراب ثنائي القطب و توحد ومشاكل أخري

السلام عليكم
أنا كان في عندي مشكلة مع أهلي إني اممم (بسرقهم) والمشكلة وصلت لمحضر في القسم بس ماتعملش محضر بالسرقة وخدت كذا نصيحة وقابلت ظابط قعد ينصحني ويقولي ماتعملش كدا تاني وانت كويس وكدا … بس مايعرفش إني مريض نفسي وعندي توحد و إكتئاب درجته من ٥ إلي ١٠ علي حسب إختبار الإكتئاب علي موقع بزراميط بس دا مش التشخيص النهائي لحالتي …. ما علينا كدا توحد و إكتئاب متوسط و إضطراب ثنائي القطب نسبة عالية نسبياً … برضو علي حسب الإختبار و عندي مشكلة عاطفية وهي إني لما بخش مع بنت في أي علاقة بحس إني بحبها بدون سبب وجيه حتي لو علاقتنا محددة اللي هو إحنا ولد و بنت بس صحاب مش حبايب وأنا ببقي عايز أي بنت تحبني زي ما بحبها وأديها إهتمام وهي اللي تسمعني لما يكون عندي مشكلة وتنصحني وتقولي أعمل إيه وماعملش إيه ومشكلة جنسية بس بتكسف اقول حاجة زي كدا وعندي ضعف تركيز وإني مابقاش عندي تقدير أو إهتمام بحاجة … بمعني أنا لو حاجة جاية علي مزاجي وأنا عايزها بديها إهتمام إنما اللي مش علي مزاجي مابعملوش وأريح دماغي منها وزمان ماكنتش بشرب سجاير ودلؤتي بشربها علشان اتسلي فيها لحد ما وقت معين كدا يعدي وعندي مشكلة إني متوحد وإنطوائي وبحب أقعد لوحدي كتير وبحس بمتعة لما أكون قاعد لوحدي ع التليفون ومعايا الداتا او الواي فاي وبتفرج علي فيديوهات للعبة معينة أو بضور علي كتب معينة علي النت ولو مالقيتهاش بنزل المكتبة أضور عليهم مع العلم إن الكتب دي كتب للنجاح و العلاقات مع الطرف الآخر … الأتنين اللي هو إزاي تبقي ناجح في حياتك وإزاي تحسن روتينك اليومي و كتب عن العلاقات مع البنات علشان أعرف هما بيفكروا إزاي وتركيبتهم السيكولوجية ماشية إزاي وهكذا وعندي امممم كان نفسي أتثبت في شغلانة معينة او مكان معين بس مابكملش علشان مابتكنش حاجة انا حاببها لاني محصور في حتة الشهادة في مصر وعلي فكرة انا معايا مهارات كتير بس مش عارف أشغلها إزاي وهاكتبلكوا مهاراتي اهيه:- جرافيك ديزاينر – فيديو إيديتور اللي هو المونتاج – ولغتي في الإنجليزي حلوة ومتأسس حلو أوي فيه – اشتغلت داتا انتري وعندي خلفية عن الشغلانة وبس كدا دول مهاراتي إنما في حاجات فيا عايز حلها زي المشاكل اللي فوق دي كلها علشان أعرف أكمل وأعيش حياتي من غير مشاكل!! أنا كنت هاخش التخشيبة وأتحبس بسبب إني عندي مشاكل نفسية مأثرة عليا وعلي تصرفاتي!! فا بليز ساعدوني. انا ولد.

تعليق 1
  1. mariamkhaled يقول

    انت بتعمل حاجه اسمها اسقاط بتقرا الاعراض وتقول فيا مرض التوحد حاجه وثنائي القطب حاجة، وفيه حاجه انت بتعملها بتلوم الاخرين على مشاكلك والتهويل و الشخصنه وديه انماط تفكير خطا مشتتاك، حلها ترصد انماط تفكيرك الغلط بعيدا أنت عندك ايه وتحط ليك اهداف عايز تحققها، والمشاعر الي بتتكلم عليها ديه انبهار بتزول عادي بتاخد وقت بس نمي قدراتك ومهاراتك وصحح أخطاء تفكيرك الأول.

اترك تعليق