استشارة نفسية: اكتئاب

السلام عليكم!
أنا حاسة بحاجة مش مظبوطة معرفش ايه هي بس في حاجة غلط. الموضوع بدأ من تلات سنين وشوية لما اتعرضت لأزمة دراسية أثرت على حياتي ونفسيتي وكان نتيجتها إن نظرة أهلي ليا ونظرة المجتمع بقت سيئة جدا ونتيجة ل ده بردو قابلت خذلان من صحابي وملقتهمش معايا وكنت حاسة اني بواجه كل حاجة لوحدي ومعرفتش أخرج من ده نفسيا حتى بعد ما الموضوع عدى عليه وقت وحتى بعد ما تجاوزت موضوع الدراسة نفسه مقدرتش أتجاوز ولا أنسى المشاعر اللي وصلتني وقتها وبالتدريج الموضوع اثر على حاجات كتير زي نشاطاتي فضلت تقل لحد ما انعزلت عن كل الناس ومبقتش بخرج ولا بدخل نقاشات مع حد حتى أهلي ومش بقعد معاهم. وبعدين في نفس الوقت اتعرضت لفقدان شخصين من أهلي بالموت. كانو قريبين مني جدا لكن استجابتي للحادث كانت لا مبالية تماما ومكنتش حاسة بأي شئ كأني لوح تلج مع اني كنت حزينة، حزينة جدا لكن معرفتش اعبر عن ده. فضلت على نفس الحال وكاتمة كل مشاعري ومش بشارك حد في أفكاري وتراكمات الأحداث والمشاعر لحد ما بدأت تظهر عليا هجمات قلق شديدة وتوتر وأعصابي تعبانة وعاوزة تنفجر بس الكلام مكتوم ومش عارفة أخرجه ومش عارفة أسيطر عليه ومش عارفة أقول ايه. أنا مش شخص تشائمي بطبيعتي بس انا ببذل مجهود كبير علشان أحافظ على هدوئي والناس الي بتحاول تقرب مني ببعدها لاني بكون مضطرة أبذل طاقة أكبر علشان أجاريها ومخلهاش تحس مشاعر سلبية مني بس أنا حاليا مش قادرة ومش عارفة أعمل ايه وسنين عمري بتعدي وانا مش قادرة حتى أخرج من أوضتي وأنزل أشوف الشارع والناس