استشارة نفسية: احساس بشع بالوحده و رفض لنفسي

56

مش عارفه ابدأ ازاي بس انا بنت عندي ٢٠ سنه ف كليه سياسه و اقتصاد كنت عايشه ف الامارات و جيت مصر عشان الكلية،
الموضوع ان انا فعلا مبعرفش اختلط باللي حواليا و لا بشوف نفسي مهمه ف عينهم و لا حاسة بقيمتي اساسا و رافضه نفسي و شايفه اني فعلا مبعرفش انجز حاجة ف بتالي نتايجي ف الكليه مش احسن حاجة و عندي برود كامل نحيتها و مش عايزة اعمل حاجة فعلا و بتبقا عندي مسؤوليات تانيه و مش حاسة اني عايزة اعمل حاجة وقتها فهمت ان ممكن اكون متوفرالي كل مقاومات النجاح و منجحش عشان مش كويسه من جوايا.
و انا صغيره ماما كانت من النوع الشكّاك و بتمسك تليفوني و بتقلّب فيه و تشوف انا بعمل ايه و كانت بتقولي كتير اني هبله و عبيطة و كلامك عبيط الحجتين دول اثروا ف ثقتي بنفسي و بقيت بتوتر و اقلق و اكون و لحد دلوقت ممكن اكون ماسكة تليفوني عادي و اول ما تدخل اسيبه هو مش دائما بس بعمل كده لا اراديا.
تاني حاجة انا حساسه جدا و اقل حاجة ممكن تخليني اعيط بحاول اعمل كنترول ع الموضوع ده ساعات بقدر و ساعات لا بس يعني من فتره كنت مع اصحابي ف كافيه ف هو مكانش ف ال budget اوي ف صاحبتي قالتلي كلمه كانت بتقولها بهزار *امال خليج ايه و زفت ايه اللي انتِ جايه منه* اتأسفتلي ف يومها بس زعلت و زعلت من نفسي اكتر ما زعلت منها عشان مقدرتش ارد عليها بحاجة و حاولت امسك دموعي بالعافيه
تالت حاجة كان ليا ابن خالتي كان من النوع الفضولي ده كام بيفتح الفيسبوك بتاعي من ورايا و يقلب فيه و يقعد يقول انا بعمل ايه و بكلم مين، علاقتي بخالتي قلّت لان جوزها اذاني *تحرش* بس الحمدلله محصليش حاجة و انا كنت طفله، حكيت لماما و بابا و صدقوني و اما واجهت خالتو مصدقتنيش و جوزها قال عليا كذابه و اتكلمت ف العيله عن اللي حصل، و طلع عمل كده مع بنت خالتي كمان، محدش جاب حقي و محدش مصدقني تقريبا غير اهلي.
اما دخلت اعدادي كنت طايشه اوي اوي و عرفت واحد معايا ف المدرسه كان اكبر مني و دماغه اكبر مني و مسك عليا صور و قعد يقولي هقول و هعمل و هسوي رغم اني كنت طفله و قولت لماما و بابا بعدها فقدوا الثقه فيا و الولد ده اتأسفلي من كذا شهر بعد ما كبرنا و مش مسمحاه.
ف اولى ثانوي بقيت انضج و اهدى و اشطر، بس اقرب صاحبه ليا سابت المدرسه و بقيت لوحدي و بعدها عرفت صاحبه جديده اسمها *فرح* كنت بحبها جدا جدا و لسه الحقيقه بعدها كنا قاعدين مع بعض و قعدنا نقول ايه مميزات و عيوب بعض قالتلي انتِ جدعه بس رخمه اوي! رغم اني معملتش حاجة بس فضلنا اصحاب انا و هي بنتين كمان و فضلنا اصحاب ل ٢ ثانوي و جت ناس جديده و بقيت ع الهامش كده بعد ما كنا ٤ اصحاب بقينا ٧ و انا مكنتش مهمه اوي عندهم بس كنت قريبه من فرح و اصحابي الاتنين التانيين و كنّا بنخرج يعني لحد ما بقوا بيخرجوا من غيري و يعزموا بعض ف رمضان و محدش يقولي و اشوف صورهم ع السوشيال ميديا و ف الفتره دي كان حد معايا ف المدرسه كلمني برضو كان قدي و كان شخص لطيف و قالي بحبك و الحاجات دي كلها، سابني و انا داخله اولى جامعة و اتأسفلي، سامحته بعد ما بقا مش فارق معايا، كنت مأكده لأصحابي انو بيحبني و بعدين سبني بلا سبب و مقدرتش اتكلم و لا اقول اي حاجة.
بعدها جبت مجموع كويس الحمدلله و سافرت مصر عشان الكليه و انا معنديش اي طموح و لا ف دماغي حاجة و الحقيقه اني كنت عايزة ارضي اللي حواليا مش اكتر و كنت خايفه ابقا زي اخويا جدا، اخويا اسمه محمود كان شاطر جدا لحد اعدادي و عندو اصحابه ف ٣ ثانوي بقا شخص تاني و مبقاش عايز يروح المدرسه و لا يمتحن و جاب مجموع وحش ف الاخر و بعدين اهلي دخلوه هندسه فاروس برغبه منه هو و غالبا هو دخلها عشان ميحسش انو اقل من اصحابه اللي كانوا جايبين مجموع احسن منه، المهم انو بعد ده كله كان بيسقط و يقول انو نجح و يقول للي حواليه انو جايب تقدير عالي و ده كده اخويا مفروض يتخرج السنه دي بس هو قاعد ف سنه اولى سنتين و تانيه سنتين و المرشد الاكاديمي قالت انو متعثر، لحد ما ساب الكليه و حاليا بيشتغل، اخويا قال انو بيكره السجاير و مستحيل يحطها ف بوقه و بيكره ريحتها، اخويا دلوقتي حريقة سجاير و بيلفها كمان، كان كويس دلوقت مبقاش،
ايا كان كنت خايفه ابقا زي اخويا عشان كده بغضب نفسي اذاكر و غاصبه نفسي ع الكليه و بنجح الحمدلله رغم اني فعلا مفيش اي تركيز و اما اهلي عرضوا عليا ادخل خاص خوفت و قولت لا انا مش هتقل عليهم و دخلت كلية قمة بمجهودي اللي حققته و انا لوحدي. دخلت الكليه و ادركت اني عند مشكله ف التعامل و اما بتكلم مع حد بتوتر و يشوف نفسي رخمه و كرهت نفسي، لحد ما عرفت كام بنت عشان دخلنا بروجكت و اتعرفنا و بقينا اصحاب جدا جدا و قتها ارتاحت قولت الحمدلله يبقا انا المشكله مكانتش فيا دي كانت ف اصحابي اللي ف الامارات و كانت سنه اولى كلية دي اجمل سنه و عرفت واحد من الانستجرام و كان لطيف جدا و بنتكلم كتير و كان بيحكي كل حاجة و جالي اسكندريه قبل كده لكن مرضتش اقابله، المهم ان الترم التاني من اولى كلية جت الكورونا وقعدنا ف البيت و كنت اغلب الوقت بلعب ببجي معاه و بعدين قولت ف مره ادخّل اصحابي معانا نلعب بدل الزهق ده، بعدها واحده من اصحابي قالتلي انا معجبه بيه و بحبه و استغربت ازاي كده ، او ازاي ممكن حد يحب حد من النت، ما علينا الموضوع كان عادي بس هي بعدت عني بالتدريج و هي كانت اقرب واحده ليًا ف الشله، و هي بدلتني بحد تاني و قربت من صاحبتنا تانيه و اسلوبها كان غريب معايا من غير سبب و اتكلمت معاها كذا مره حسستني ان مفيش حاجة و انا اللي مجنونه، الولد ده كان كويس بس بعدها بقا بيتعرف ع اصحابي و اغلب اللي حواليا و بقيت عادي عنده و بعدها كدبت عليه ف حاجة و عملي بلوك من حياته و بقا احسن بكتير من الاول و خلاص بيتخرج من الكليه، بقا مبسوط و انا مبقتش، بعدها علطول بقيت ١٠٠ في ١٠٠ مش عارفه اتعامل و لا اتكلم مع حد و لا اقرب من اي حد اطلاقا و بقيت شويه مبسوطه و بعدها بشويه مخنوقه و بعيط و مكتئبه و اما بخرج مع اصحابي بعمل كده غصب عني عشان بس مبقاش من غير ذكريات بس فعلا انا بعمل كل حاجة غصب عني و اصحابي اما بييجوا يهزروا بحس ان دمهم تقيل و مفيش حاجة تضحك حرفيا مبقتش عارفه نفسي و لا فاهمه انا بعمل ايه.
هو انا وحشه؟ و لا ده دلع و لا انا فعلا محتاجة دكتور نفسي و لا ارشاد نفسي؟

تعليق 1
  1. مريم خالد - أخصائية نفسية يقول

    اهلا بحضرتك

    انتي محتاجه ثقة بالنفس تحبي نفسك وتحسني صوره ذاتك محتاجه توكيد ذات ازاي تتعلمي تقولي لا ومتتاثريش بكلام الناس وتوزنيه اغلب كلام الناس نابع من غيره غرضه يبين انا مفيش احسن مني دلوقتي هتعملي ايه هتنزلي جيم وتغيري مظهرك الخارجي وعينك تشوف ده هتبقى نقطه البدايه للتغير بعدها هنشوف أنماط التفكير الخطا الي مخلياكي تدركي المواقف بشكل خطا بمعنى بتفسري الي حصل بطريقه غلط وبعدها هتعرفي تتعاملي مع صحابك لانك فهمتي نمط تفكيرك الخطا والغيره الي ورى الانتقاد.

اترك تعليق