استشارة رقم 8 : مشكلتي اني دايما حاسة اني مش مؤثرة في حياة الي حواليا بشكل عام
مشكلتي اني دايما حاسة اني مش مؤثرة في حياة الي حواليا بشكل عام ..مشكلي بالاخص مع صحابي .. احنا شلة ٧ بنات صحاب و بيحبوني و بحبهم بس المشكلة ان في واحدة فيهم هي المسيطرة لماهم حواليها جدا ..يعني كلنا صحاب بس ديما هي الي بيحكلها كل حاجة و هي الي جذبانا كلنا ..مشكلتي اني بدأت اغير منها جدا لدرجة اني بقيت اعمل زيها في كل حاجة و اتعامل بنفس اسلوبها معاهم و اعمل حجات مش شبهي ..يعني مثلا انا عصبية و هي باردة و هادية فانا بدات ابقى كدة و كل دة لا اراديا ..كل دة عشان عايزة اكسب حبهم زيها ..بس مهما عملت بتفضل هي حاجة تانية عندهم برضه ..اسئلتي :ازاي امنع نفسي من الغيرة منها ،ازاي اخلي حد من صحابي يحكيلي حاجة يعني ادخله ازاي و اقول ايه مع العلم ان طريقة تفكيري بتعجبهم جدا بس عايزة اعرف ازاي اطلع الكلام من الي قدامي عموما ، ازاي يبقى اسلوبي مميز او في حاجة مميزة تشد الناس ليا؟
على فكره ده عادى جدا جدا جدا وطبع الغيره ده جميل ايضا ولكن لمواقف واشخاص معينين …… حاولى وانتوا قاعدين مع بعض تعتزلى جانب لنفسك وكان مخنوقه او زعلانه واللى يسالك تقولى مفيش حاجه …. خليكى فى وسط قعدتهم مختصره وتقيله ورزينه كده ومتتكلميش الا فى خطوات معينه …. اعتزلى منهم فتره وعلى الاقل هتعرفى قيمتك اد ايه عندهم … كل ما تكونى رزينه وعاقله كل ما تجذبى حواليكى اكتر ….. هى لا بالضحك ولا بالفهلوه ولا التسليه انما بالمواقف ….. الموقف الحاسم هو اللى يحدد مين تعتزى بيه ومين لا وواحده واحده هتكونى اقوى منهم كلهم مش منها ….. انتى اللى بتصنعى لنفسك الغيره وانتى اللى بتصنعى لنفسك المجد ….. فكرك لازم يكون ايجابى ومش سلبى زى ما حضرتك بتفكرى كده وفى الاول والاخر دى ايام بتفتكرى الحلو والوحش منها وربنا يقوى شخصيتك ان شاء الله
انا فعلا عملت دة بسبب ان انا لاحظت ان هي بتعمل كده .. بس دايما بتفضل هي الاصل و هي الي القعدة متكملش الا بيها .. انا بحبها جدا جدا بس شعور عشان كدة شعور الغيرة لما وصلي زعلت من نفسي جدا ..دايما سرهم معاها و كلهم بيحاولوا يكسبوها و يلفتوا نظرها و دايما اي هزار بتقوله بيعلم جدا دة غير ان هي عندها سرعة بديهة ..ف ازاي اخلي الي قدامي يحكيلي كل حاجة و يرتاح في الكلام معايا عامتة؟ و ازاي يبقى عندي سرعة بديهة ؟ و ازاي اوزن الكلام قبل ما اقوله ؟ و شكراا جدا عالاهتمام