ازاي تعمل فلوس وتحوش وتستثمر أيًا كان دخلك كام؟

267

انك تستثمر فلوسك وتزيد لوحدها دا معناه انك تسيطر على احوالك المالية، وانك تستخدم السيطرة دي عشان تحسن من استقرارك المادي، ممكن في النهاية تستقر أو تعمل ثروة لكن مش هتقدر تعمل دا لو معرفتش ازاي تكسب الفلوس وازاي تقدر تستخدمها وتستغلها.

اتعلم ازاي تعمل الميزانية

الميزانية هي أحسن أداة تقدر تدير بيها اموالك، لما تعمل ميزانية هتعرف انت فلوسك جاية منين وبتعمل بيها ايه، بدل ما تكون عمال تصرف عالفاضي، والهدف من الموازنة هو انك تصرف أقل ما بتكسب.

وانت بتعمل ميزانية ممكن تستخدم المؤشرات دي:

  • اقلل المصاريف على قد الاحتياجات.
  • افهم فلوسي بتروح فين.
  • ايه هي عاداتي السيئة الاستهلاكية.
  • اسدد ديوني.
  • اتجنب الديون الجديدة.
  • ادي الأولوية عالحاجات المهمة وبس.
  • أحوش للمستقبل.

مهم انك تحسب ميزانيتك ودا مش حاجة تعملها مرة في الحياة، مش شيء لمرة واحد، يعني لو بتقبض شهريا يبقى كل شهر تراجع نفقاتك وميزانيتك وعاداتك في الصرف.

سدد ديونك مبدئيًا

لما بتكون في ديون وعليك فوايد فا انت بتدفع اكتر من التمن الأصلي للشئ، ودا بيقطع جزء كبير من دخلك، والديون اللي راحت في أشياء استهلاكية معناها فلوس مش بتشتغل ليك دي بتستنزفك، بدل ما تداين حط الفلوس دي في صندوق اجتماعي أو شهادات بعوائد مالية تقدر تدر ليك مبالغ مالية تحوشها أو تبدأ بيها مشروعك التجاري، أو حتى تستثمر في مشاريع تجارية موجودة بالفعل بمقابل جزء من الأرباح.

4 خطوات عشان تسدد ديونك بسرعة:

  • ادفع الحد الأدنى للدفع على كل ديونك شهريا.
  • وجه كل فلوسك الزيادة على اصغر دين فاضلك عشان تخلص منه.
  • لما تخلص اصغر واحد شوف اللي بعده.
  • لما تتخلص من ديونك الصغيرة هيشيل من عليك عبء ويديك مساحة تسدد ديونك الكبيرة

اعمل صندوق للطوارئ

المفاجآت بتكون مخيفة لما متكونش مسيطر على امورك المادية، زي انك تضظر تصلح عربيتك أو تفقد وظيفتك أو كشوفات طبية أو حلالات تانية لا قدر الله تضغطك ماديا ونفسيا، انك تعمل صندوق للطوارئ سواء في بيتك او في حسابك البنكي هو افضل طريقة انك كل شهر تحط مبلغ مالي معين فيه ومتجيش جمبه غير للضرورة القصوي.

طبعا هياخد وقت على ما تعمل صندوق محترم تقدر تعتمد عليه، يعني تقريبا توفر نصف دخلك السنوي، لو مكنش عليك ديون وميزانيتك مظبوطة والتزاماتك بقت محدودة هتقدر تعمل حساب ادخار منفصل.

إدخر واستثمر أموالك

بمجرد ما تبقى حر في فلوسك ومواركش ديون ساعتها هتقدر تحط كل فلوسك الإضافية في مدخرات أو استثمارات، واللي هيرجعولك فلوسك زايدة على فترات زمنية معينة.

وجنب صندوق الطوارئ هتحتاج لحسابات تانية لازم تفكر فيها:

  • مدخرات للتعليم، ليك أو لاطفالك.
  • مدخرات السفر.
  • فلوس تحت الحساب لمصاريف البيت الشهرية.
  • مدخرات لبدء مشاريع أو استثمار.
  • فلوس على جنب للعربية أو لتصليحها.
  • مدخرات للإعالة لما بعد الستين.

ازاي تزود فلوسك وتستثمر؟

الاستثمار هو استراتيجية طويلة الاجل عشان تكون ثروة، المستثمرون الأكثر نجاح في العالم بدأوا بدري في انهم ينموا فلوسهم لسنين ولعقود قبل ما يستدخموها كايراد.

لو مش محتاج مدخراتك دي لكام سنة قدام، احسن طريقة عشان فلوسك تشتغل عشانك هو إنك تستثمر، لما بتحط فلوسك في استثمارات شركات وعقارات وغيره يا إما فلوسك هترجعلك بالفايدة يا اما فلوسك هتزيد بسبب زيادة قيمة الشئ اللي استثمرت فيه، واللي ممكن تعمله هو انك تسحب الزيادات دي كعائد سنوي من الاستثمار لو هتحتاجه.

والمفروض عشان تستثمر فلوسك صح حتى لو قُليلة، محتاج تنوع استثمارك:

  • أسهم في البورصة
  • السندات الحكومية
  • صناديق الاستثمار
  • العقارات
  • مشاريع (الخاصة بيك أو بشخص تاني)

طبعا في الشركات الاستثمارية الكبيرة بتحتاج انك توفر الحد الادني للاستثمار، عشان كده ممكن تبدأ في تطبيقات الاستثمار الصغيرة اللي بتتيحلك تشتري اسهم قليلة من اول استثمار دولار واحد. بغض النظر ازاي هتدخر أو هتستثمر، ان يكون عندك اهداف محددة تحط فيها فلوسك زي انك تعلم طفلك كويس أو تشتري بيت، او تعمل معاش مبكر، هيساعدك في طريقة صرفك الفلوس دي وايه افضل أنواع الاستثمار بالنسبالك.

اترك تعليق