سايكويكي

أسباب الاكتئاب: عضويًا، جينيًا، وبعض الأدوية

أسباب الاكتئاب : لما الدنيا تتعك أوي بيحصل

ايه هي أسباب الاكتئاب ؟ ممكن يكون تم تشخيصك بالاكتئاب، وده خلاك تسأل نفسك ليه في ناس بتصاب بالاكتئاب وناس تانيه لأ!

الاكتئاب مرض معقد جدًا. محدش عارف بالضبط ايه أسباب الاكتئاب، لكن في العادة الاكتئاب بيجي بسبب من الاسباب دي. بعض الناس بتعاني من الاكتئاب أثناء اصابتهم بمرض خطير زي الإيدز. في ناس تانية بتصاب بالاكتئاب نتيجة حدث معين حصل في حياتهم زي وفاة شخص. بعض الناس بيعانوا من الاكتئاب لأن عيلتهم عندها تاريخ من الاكتئاب. وأخيرًا، في ناس بتعاني من الاكتئاب وبتشعر بالحزن والوحدة من غير أي سبب معروف.

ايه أسباب الاكتئاب الرئيسية؟

أسباب الاكتئاب

في أكتر من عامل ممكن يزودوا فرص الإصابة بالإكتئاب، زي:

  • الإساءة. ممكن الإساءة البدنية أو الجنسية أو العاطفية تزود فرص الإصابة بالاكتئاب سواء دلوقتي أو بعدين.
  • بعض الأدوية. زي الإيزوتريتينوين (اللي بيستخدم  في علاج حب الشباب)، والأدوية المضادة للفيروسات، والستيروئيدات القشرية، ممكن تزود من خطر الإصابة بالاكتئاب.
  • الصراعات. الصراعات الشخصية أو النزاعات مع أفراد الأسرة أو الصحاب.
  • الموت. الحزن على وفاة شخص أو فقدان فرد من أفراد الأسرة، رغم أنه طبيعي وبيحصل لناس كتير إلا انه ممكن يزود خطر الإصابة بالاكتئاب.
  • الجينات. العيلة اللي عندها تاريخ من الإصابة بالاكتئاب في خطورة على الاجيال القادمة من انها تصاب بالاكتئاب برضه. الاكتئاب مرض معقد من ناحية الجينات، وده معناه ان مش جين واحد بس هو اللي بيأثر على إمكانية الإصابة بالاكتئاب لكنه أكتر من جين.   
  • الأحداث الكبرى في حياة الشخص. حتى الأحداث الحلوة زي بدء عمل جديد أو التخرج أو الزواج ممكن يؤدي للإصابة بالاكتئاب. وبالتأكيد الأحداث الوحشة كمان زي فقدان الوظيفة أو الطلاق أو التقاعد.
  • مشاكل شخصية. ممكن مشاكل زي الانعزال الاجتماعي أو social isolation تساهم في الإصابة بالاكتئاب وفي العادة بيكون الانعزال الاجتماعي ناتج عن أمراض نفسية تانية أو ان الشخص ميكونش محبوب في وسط عيلته أو صحابه.
  • أمراض خطيرة. أحيانًا بيتعايش الاكتئاب مع مرض خطير وممكن يحصل بسبب حالة طبية تانيه.
  • تعاطي المخدرات. حوالي 30% من الأشخاص اللي بيتعاطوا مخدرات بيعانوا من الاكتئاب الشديد. حتى لو كانت المخدرات أو الكحول بتخليك تحس بتحسن مؤقت، إلا انها في النهاية هتزود خطر الإصابة بالاكتئاب.

ايه أسباب الاكتئاب العضوية؟

أسباب الاكتئاب العضوية

الباحثون لاحظوا اختلافات في أدمغة الأشخاص المصابين بالاكتئاب مقارنة باللي مبيعانوش من الاكتئاب. على سبيل المثال، الحصين، وهو جزء صغير في الدماغ ضروري لتخزين الذكريات، أصغر حجمًا في الأشخاص اللي عندهم تاريخ من الإصابة بالاكتئاب مقارنة باللي متصابوش قبل كده بالاكتئاب. ده معناه ايه؟! معناه ان كل ما الحصين بقى أصغر كل ما كان عدد مستقبلات السيروتونين كانت أقل. والسيروتونين  عبارة عن هرمون الجسم بيفرزه كما انه ناقل عصبي تتبادله النهايات العصبية في الدماغ وأي تأثر بيحصل في مستوى السيروتونين بينتج عنها اضطرابات في المزاج زي القلق والاكتئاب.

في الحقيقة، العلماء مش عارفين ليه الحصين بيكون أصغر في بعض الأشخاص المصابين بالاكتئاب. وقد وجد بعض الباحثين ان هرمون التوتر اللي هو الكورتيزول ينتج بشكل كبير في الناس المصابة بالاكتئاب. وعليه بيعتقد الباحثون ان الكورتيزول ليه تأثير “مقلص” على الحصين. وبعض الخبراء رأيهم ببساطة ان الناس المصابة بالاكتئاب بتتولد وهي عندها حصين أصغر وبالتالي بيميلوا للشعور بالاكتئاب.

الشيء الوحيد المؤكد هو ان الاكتئاب مرض معقد في أكتر من عامل بيساهم في الإصابة بيه. وأحدث الدراسات اللي اتعملت على بنية الدماغ ان مضادات الاكتئاب بتمارس ما يمكن ان نسميه “التأثيرات العصبية أو neurotrophic effects” وده معناه انها بتساعد في الحفاظ على الخلايا العصبية وبتمنعها من الموت. وعليه، ممكن نقول ان مع مرور الوقت هيقدر العلماء يفهموا اكتر أسباب الاكتئاب وهيكون بمقدور الدكاترة في ما بعد انهم يعملوا تشخصيات أفضل، ويصفوا بدورهم خطط علاج فعالة أكتر.

ازاي ممكن الجينات تساهم في الإصابة بالاكتئاب؟

الاكتئاب والجينات

تلعب الجينات دور مهم في الإصابة بالاكتئاب، فإذا كان الأب أو الأم مصابين بالاكتئاب، فإن فرص الاصابة بالاكتئاب بتكون أكتر. وفي حين ان واحد من كل أربع أشخاص معرض للإصابة بالاكتئاب، لكن خطر الإصابة بتتضاعف 3 مرات إذا كان الأب أو الأم مصابين بالاكتئاب. وممكن نقول ان التوائم المتطابقة بيتشاركوا حالة الاكتئاب أكتر من التوائم غير المتطابقة.

العامل الوراثي ليه دور كبير في كتير من الأمراض، والاكتئاب من الأمراض اللي بتحصل نتيجة تغيرات في فعالية وكفاءة مناطق أو موصلات عصبية في الدماغ. وقد يكون هذا التأثير الجيني مباشر بحيث تظهر الأعراض في عمر مبكر، أو عن طريق البيئة، بمعنى ان كآبة الأب أو الأم بتكون عامل رئيسي في تغير سلوك الطفل مما يؤثر بدوره على مناعة الجسم وعلى ارتفاع هرمون التوتر وضمور منطقة الحصين مما يؤدي لظهور أعراض الاكتئاب.

هل ممكن تسبب بعض الأدوية في الإصابة بالاكتئاب؟

لما نسمع ان الدوا اللي بناخده ليه آثار جانبية، بنبتدي نفكر في آثار زي طفح جلدي أو صداع، إلا ان وفقًا لدراسة أمريكية حديثة، فإن كتير من الأدوية اللي بيوصفها الدكاترة لمرضاهم قد تزيد من نسبة الإصابة بالاكتئاب.

ومن أبرز الأدوية دي:

  1. بعض أدوية منع الحمل، لإنها بتسبب اضطرابات في الهرمونات الأنثوية، وبعد فترة تسبب الاكتئاب والقلق، وفي الحالة دي لازم استشارة الدكتور المعالج لتغيير العلاج أو تقليل جرعته.
  2. الأدوية المخدرة والمنومة، بتأثر في الجهاز العصبي المركزي، وتعمل على ارتخاء العضلات والشعور الدايم بالاكتئاب.
  3. الأدوية اللي بتساعد على الاقلاع عن التدخين والإدمان، بتؤثر على الجهاز العصبي وبتسبب الاكتئاب الشديد اللي بيؤدي للانتحار.
  4. أدوية الحموضة، الإفراط في تناولها بيأثر على جدار المعدة وبيسبب التوتر والقلق، ووفقًا لدراسة حديثة فإن 10 آلاف مريض بيتناولوا أدوية حموضة المعدة لمدة طويلة تعرضوا للاكتئاب.

ايه العلاقة بين الاكتئاب والأمراض المزمنة؟

الاكتئاب والأمراض المزمنة

في بعض الحالات من الأمراض المزمنة ممكن تسبب اكتئاب. المقصود بالمرض المزمن هنا هو كل مرض يستمر لفترة طويلة جدًا وعادة مبيكونش بيتعالج. وفي كتير من الأحيان بيمكن السيطرة على المرض ده بحيث ميكونش سبب من أسباب الاكتئاب زي اتباع نظام غذائي وممارسة الرياضة وبعض الأدوية. ومن الأمثلة على الأمراض المزمنة اللي ممكن تسبب اكتئاب هي مرض السكري وأمراض القلب والتهاب المفاصل وأمراض الكلى وفيروس نقص المناعة البشرية/الإيدز والذئبة. وبيعتقد الباحثون أن علاج الاكتئاب ممكن يساعد في بعض الأحيان في تحسين حالة المريض المصاب بمرض مزمن.

ايه العلاقة بين الاكتئاب والألم المزمن؟

لما يكون الألم مستمر لكذا أسبوع أو شهر بيسمى ساعتها انه ألم مزمن. بيأثر الألم ده على نومك وعلى قدرتك على ممارسة الرياضة وعلى علاقاتك وإنتاجيتك في الشغل، وممكن كمان يخليك تحس بالحزن والعزلة والاكتئاب.

في ارتباط وثيق بين الألم والاكتئاب. ممكن الاكتئاب يسبب ألم وكمان ممكن الألم يكون سبب من أسباب الاكتئاب. أحيانًا، ينشأ عن الآلام والاكتئاب حلقة مفرغة يؤدي فيها الألم لزيادة أعراض الاكتئاب وعليه يزيد الاكتئاب من الشعور بالألم. مثلًا الناس اللي عندها اكتئاب في العادة بيبقى عندهم أعراض بدنية صعبة التفسير زي آلام في الضهر أو الصداع.

هل في علاقة وطيدة بين موت شخص والاكتئاب؟

من الطبيعي جدًا، اننا لما يموت شخص عزيز على قلبنا نزعل عليه، لكن الحياة لازم تستمر، الموضوع ممكن يستغرق وقت طويل عشان الواحد يرجع لحياته الطبيعية، لكن السؤال هنا هل موت شخص معناه الإصابة بالاكتئاب؟

الحزن بشكل عام هو استجابة طبيعية تجاه أي خسارة. ممكن تكون الخسارة دي موت حد من الأسرة أو الأصدقاء، أو خسارة الوظيفة أو وفاة حيوان أليف محبوب أو فقدانه، أو الطلاق أو التقاعد.

ممكن لأي شخص أنه يعاني من الحزن أو الخسارة حسب ما وضحنا قبل كده، لكن مش كل حزن بيكون مرتبط باكتئاب، الاكتئاب بيكون مرتبط بأعراض زي ان الشخص يبص لنفسه بدونية ويكون في أفكار سلبية تجاه المستقبل وأفكار متعلقة بالانتحار، لكن الحزن بيكون مرتبط بمشاعر زي الفراغ والشوق لشخص أو لشيء، مع وجود قدرة على الشعور بالسعادة.

هل في علاقة بين الإصابة بالاكتئاب والسن؟

السن والاكتئاب

سن الشباب والمراهقة واللي من المفروض أنها تكون أسعد أوقات الإنسان بقت من اتعس الفترات دا اللي قالوا خبراء الصحه النفسيه، في الوقت اللي احنا فيه ده المراهقين بيميلوا لأنهم يعبروا عن مشاعرهم اللي بتتولد بسبب الأحداث اللي بيعيشوها عن طريق الغضب والتمرد أو الهروب من البيت أو إدمان الخمره أو المخدرات او ان سلوكياتهم تبقي عدوانيه سواء في البيت أو الشغل أو المدرسة أو الجامعة، وعدم معالجة حالات الاكتئاب عند المراهقين بتدي فرصه للمرض انه يتطور ويوصل لمرحلة الأنتحار، بدليل زيادة نسبة الانتحار لأكثر من تلات أضعاف بين المراهقين والشباب سواء بنات أو ولاد حسب الإحصائيات الأميركية.

في النهاية ممكن نقول ان أسباب الاكتئاب كتير وتقريبا أي حاجه في حياتنا لما بتتعك اوي وتبوظ ممكن تقلب معانا باكتئاب، ده لأنه خلطة من  مشاعر الحزن، والوحدة، والشعور بالرفض من الناس، دا غير الإحساس بقلة الحيلة والعجز عن مواجهة مشاكل الحياة.

عن الكاتب

حنان جمـال