العلاقات

هل علاقات المسافات الطويلة بتستمر؟

هل علاقات المسافات الطويلة بتستمر؟
كتبها سها مطر

هل بتدور على إجابة إذا كانت علاقات المسافات الطويلة بتستمر ولا لأ؟

حوالى 14 مليون شخص في الولايات المتحدة عندهم النوع ده من العلاقات، وحوالى 3,75 مليون متزوجين! رقم كبير أكيد! طيب بيعملوا ايه؟ وهل هيعرفوا يستمروا؟

علاقات المسافات الطويلة تعتبر تحدى، علشان كده قبل ما تقرر أنك تلتزم بيها، لازم تكون عارف أن في تحديات كتيرة هتتحملها مش موجودة في العلاقات التانية. ولأن الموضوع مش سهل خالص، لازم تسأل نفسك هل أنت مستعد للدخول في علاقة من النوع الفريد ده.

– تحدى لكن مش مستحيل :

مع أغلب النصايح بيكون في إشارة واضحة بفشلها، ده ممكن يحبطك ويخليك تشكك في الفكرة إذا كانت ناجحة ولا لأ. لكن فعلا ازاى ممكن لعلاقة أنها تتغلب على عقبة المسافات الطويلة؟

مع المشورة الصح، ممكن تواجه التحديات، وممكن تكون علاقة دائمة ووفية – لو كنت مستعد إنك تبذل جهد كافى.

ناس كتير قدمت نصايح عن الأسباب اللى بتخلى علاقات المسافات الطويلة تنجح. ممكن تكون بتسأل ” لو الموضوع بالصعوبة دى، ليه متدورش على شريك يكون قريب منك؟ ” لأن لو أنت عندك استعداد أنك تبذل وقت ومجهود ، يبقى أنت قادر أنك تبنى علاقة عاطفية قوية مع شريك حياتك.الميزة في علاقة المسافات الطويلة هي أن الوقت اللى هتقرروا أنتو الاتنين أنكو تكونوا أقرب، تعيشوا مع بعض وتتجوزوا، أكيد الوقت ده هتكونوا راضيين عن علاقتكم وهتكون علاقة صحية أكتر من أزواج تانيين. المسافة بينكم ممكن تخليكم أقرب لبعض.

هل أنت على استعداد لمواجهة التحديات؟

  •  الانفصال  :

أنتو الاتنين مش هتقدروا تشوفوا بعض كل يوم أو حتى كل أسبوع. علشان كده أنت مضطر أنك تحافظ على علاقتك عن طريق التليفون أو مكالمات الفيديو ( لو كان الانترنت كويس بدرجة كافية). أنت حياتك هتستمر بغض النظر أنت فين وكذلك شريك حياتك ، أنتوا الاتنين هتكبروا وهتتغيروا مع إمكانية كبيرة أنكم تنفصلوا عن بعض بمعنى أن كل واحد حياته تتشكل بعيد عن التانى.

ازاى تقدروا تكبروا وتتغيروا مع بعض بالرغم من المسافة ؟ المفتاح هنا هو أنكم تحافظوا على التواصل المنتظم والمتكرر. لو ميزانيتكم تسمح حاولوا تسافروا لبعض وتزوروا بعض كل فترة على قدر الإمكان. وبالطريقة دى، التغييرات الفردية الخاصة بكل طرف مش هتكون مفاجأة. أحسن حاجة أنكم تكونوا صادقين مع بعض، وصارحوا بعض لو حسيتوا أنكم في بداية أنكم تتفرقوا عن بعض أو لو حسيتوا بفجوة بينكم.

  •  الشعور بالغيرة :

أنتم الاتنين بالغين وناضجين، حاولوا تكونوا داعمين لبعضكم. لكن في أحيان كتيرة، الغيرة ممكن تغير كل حاجة. من السهل جدا أنك تحس بالقلق من الأوقات اللى بيقضيها شريك حياتك بتكون مع مين، وده طبيعى جدا لو أنت عايز تقضى وقتك معاه.

متخليش الغيرة تسيطر على تفاعلاتك مع الآخرين. لو أنت شاكك أن شريك حياتك له علاقة بشخص تانى، اسأله. لكن متتهموش. لازم تكون مدرك أن الغيرة بتنبع من انعدام الأمن الخاص بيك والحل أنكم الاتنين تتعاملوا مع الموضوع. مفيش مشكلة أنك ترجع الطمأنينة والسلام لنفسك، لكن الحق الغيرة في وقت بدرى علشان متسيطرش عليك وتستولى على علاقتك.

لو عايز تبني علاقات سليمة من غير ضغط نفسي بص علي المقال ده

  • سوء فهم نية الشخص الآخر:

لما بتكونوا في علاقة المسافات الطويلة، فأكيد بيكون التواصل بينكم لفظى ومكتوب، مفيش رفاهية أنكم تشوفوا بعض في الحقيقة وتشوفوا تعبيرات الوش وبالتالي من السهل جدا أنك تسئ فهم المقصود من ورا اللى أنت بتقوله، وحالات سوء الفهم بيكون نتيجتها دايما الخلافات.

  • سوء الفهم ممكن يؤدى للخلافات :

علشان تتجنب المشكلة دى، حاول أنك تكون واضح على قدر الإمكان لما تتكلم مع حد في الشات. ماتفترضش أن الشخص اللى قدامك هيعرف أو هيفهم أنت بتتكلم عن ايه بالظبط. لو أنت مش متأكد من فهم المقصود بالظبط، اطلب منه أنه يوضح. بدل ما تتسرع وتاخد رد فعل متسرع تندم عليه، اتأكد الأول من أنك فاهم كل حاجة.

  • خلي العلاقة تستمر :

مفيش شك أن علاقات المسافات الطويلة بيكون فيها تحدى بالنسبة للطرفين. لو عايزين العلاقة تستمر، لازم أنتم الاتنين تبذلوا جهد أزيد شويه من أي علاقة، حاولوا تكونوا صبورين، ممكن ينتهى بيكم المطاف لواحدة من أفضل وأنجح العلاقات في الحياة.

عن الكاتب

سها مطر