سايكويكي

إيه الفرق بين المرض العقلي والنفسي؟

المرض-العقلي-و-النفسي

في فرق كبير جداً بين المرض النفسي اللي يبصيب البني آدم وبين المرض العقلي خصوصاً لما المرض العقلي ده تخش فيه أعراض كتير من الأمراض النفسية.

كتير مننا بيخلط بين المرض النفسي والعقلي، ودي حاجة بتؤدي إلى إهمال العلاج بشكل للمرضين في حين إن معرفة الفرق بين نوعين المرض هاتفرق كتير جداً في فهم الشخص المُصاب وهاتفرق كتير جداً في العلاج برضه.

المرض النفسي عبارة عن إصابة تحدث نتيجة الحياة والمواقف اللي بنعيشها كل يوم، من غير وجود أي مشاكل عضوية أو مشاكل في الأعصاب. أما المرض العقلي، فهو خلل في تركيبة الدماغ أو الوصلات العصبية نفسها، وده بينعكس على سلوك المريض، اللي غالباً في الحالة دي هايكون خطر على نفسه وعلى اللي حواليه.

لإيه أهم الفروق بين المرض النفسي والمرض العقلي:

  • أهم حاجة بتميز المريض النفسي إنه عارف مشكلته أو ممكن يعرفها بسهولة، أو ممكن يقتنع بيها بسهولة لو قعد مع مُختص.. وممكن يحاول يحلها. إنما المريض العقلي عنده مشكلة في التفكير أصلاً أنه مريض أو إنه يحتاج إلى أي علاج حتى لو أجمعت الدكاترة على كدة.
  • بيبقى من السهل إقناع المريض النفسي أنه محتاج علاج، أما المرض العقلي فبيسيطر على عقل المريض وبيخليه يفهم إنه معندوش مشكلة وبيخليه يرفض العلاج أو حتى الاعتراف بالمرض من الأساس وده طبعاً بيخلي الحالة تدهور.
  • في الغالب المريض النفسي مايعتبرش خطر على نفسه أو على اللي حواليه، أما بقى المريض العقلي فغالبا بيبقى تهديد على نفسه واللي حواليه كمان ومحتاج رعاية 24 ساعة.
  • المرض النفسي في الغالب ممكن يتعالج أسرع من المرض العقلي اللي ممكن يقعد طول الحياة وبيحتاج لمتابعة دورية واستمرار العلاج لفترات طويلة، سنين.
  • المريض النفسي عنده حتة الإدراك يدرك أن اللي بيحس بيه دلوقتي ده -أو عامة- غير حقيقي، إنما المريض العقلي مصدق نفسه، والموضوع بيوصل معاه لهلاوس وخيالات بيفتكر إنها حقيقية جداً.
  • المريض العقلي عنده مشكلة كبيرة جداً ودي بتأثر بشكل سلبي جداً على العلاج وهي “الشك”، وبيتهيئله إن الناس دايماً بتحاول تأذيـه، فبياخد موقف معادي مه الناس ، وده بيخليه معرض أكتر إنه يبقى عدواني حتى مع الناس اللي قريبين منه.  أما المريض النفسي في أغلب الأحيان مش خطر على نفسه ولا على حد.

خُـد بالك بقى القصة دي:

كتير من الأمراض العقلية بيخش فيها ظواهر نفسية زي القلق والخوف والتوتر واضطراب المزاج وكتير جداً من أعراض الأمراض النفسية موجود عند الناس اللي عندهم مرض عقلي. إنما العكس غير صحيح. لإن المريض النفسي المرض مأثرش على عقله أو بمعنى أصح وعيه وإدراكه.

عن الكاتب

فريق بزرميط