الصحة النفسية

الإدمان : إتنين مالهمش أمان الشاي والدخان

الإدمان

الإدمان هو عبارة عن اضطراب سلوكي بيخلي الشخص يكرر الفعل اللي بيعمله كل شوية عشان ينشغـل بنشاط معين بغض النظر عن الأضرار الصحية والعقلية والحياتية اللي بتحصله نتيجة الإدمان ده.

مُشكلة الإدمان مش في الأضرار بس لكن كمان بيخلي المدمن يفكر بطريقة معينة تخليه دايماً حاسس بالنقص والخوف والقلق والإكتئاب والقرف. وبتخليه دايماً حاسس أنه أقل من اللي حواليه ودي حاجة بتخليه يبص للمجتمع حواليه بنظرة معادية. كل ده بيحصل بطريقة غير واعية في عقله.

الإدمان يا جماعة ممكن يبقى إدمان مخدرات، إدمان سجاير، إدمان حركة معينة، إدمان الإنترنت، إدمان عادة سرية، إدمان شتيمة، إدمان كحول، الخ.. الإدمان ممكن كمان يبقى إدمان حاجة حلوة ومش مُضرة ساعتها هايبقى إدمان برضه بس مش هايتصنف مرض نفسي زي إدمان نوع من المزيكا، من الأكل، من الكلام والثقافة والقراية وهكذا..

إدمان الحاجة الكويسة يتصنف إدمان لو بدأ يضر الجسم أو العقل أو الحياة الاجتماعية. زي مثلاً إنك تدمن الشاي. الشاي كويس ومفيد للجسم لكن إدمانه ممكن يعمل مشاكل في النوم وأرق مثلاً، وهكذا..

إيه هـي أعراض الإدمان وإزاي نعرف إننا أو اللي نعرفهم مُدمنين؟

  • أكتر عرض هو العزلة والوحدة: نتيجة الإدمان بتقل المهاراته الاجتماعية بتاعت الشخص و بيلجأ للعزلة والوحدة وبيبتدي يهرب من المواجهة ومن الاندماج في المجتمع ل،ه ساعتها هايبقى مُختلف عنه في والأسلوب والكلام والاهتمامات فيا هايقعد لوحده يا هايقعد مع النـاس اللي عندها نفس الإدمان بتاعه (زي ما بنلاحظ إن الناس اللي بتشرب سجاير بتتعرف على بعضهـا بسرعة في الشغل مثلاً).
  • الانكار على طول الخط: هو إنكار إنه أصلاً مُدمن وإنه يبقى مقتنع إنه معندوش أي مشكلة مع الحاجة اللي هو أدمنها رغم إنه مش قادر يبطلها! وكمان هاينكر إن اللي وصلتله حالته من مشاكل كانت نتيجة الإدمان ده.
  • التبرير صديقه الصدوق: هايفضل على طول يبرر إن السبب ورا المشاكل اللي هو عايش فيها بسبب إدمانه كانت سبب الظروف اللي حواليه والمجتمع والعيشة في مصر صعبة والناس ضدي والكلام ده كله .. وهايرمي المسؤولية على اللي حواليه لتبرير إدمانه وهايلعب يلعب دور المظلوم كتير.. (زي جملة: أنا بشرب مخدرات عشان أنسى الواقع الزبالة ده)
    ملحوظة: ده ما ينكرش إن العيشة في مصر صعبة إحنا مش معترضين 😀 بس صدقني مش هي السبب الرئيسي في الإدمان.
  • الاخلاق في النازل: مش لازم بس يروح يسرق عشان يجيب تمن الكيف، ويبقى ده الانحلال اللي بنتكلم عليه .. إنما كمان اللي بيدمن حاجة مُضرة بيعمل حاجات تانية مش مُضرة.. دايماً تلاحظ إن معظم اللي بيشرب خمرة بيشرب سجاير ويمكن حاجات تانية جنبها .. ومعظم اللي بيشرب سجاير عنده إستعداد أقوى إنه يشرب خمرة مقارنة باللي ما بيشربش (كله فيه سبرتو على فكرة).
  • الصحة في النازل: حالة المدمن بتتدهور بمرور الوقت وإدمانه بيزيد ومعدل تعاطيه بيزيد وبتسوء حالته من يوم للتاني.
  • حاسس بالذنب: بيحس بالذنب دايماً نتيجة أفعاله والخسائر المادية والصحية اللي حصلتله نتيجة إدمانه.. إحساس الذنب ده بيبقـى داخلي ومش باين وكمان بيمتدد لحاجات تانية فبيبقـى سهل قوي يحس بالذنب من أي حاجة.

أربع حاجات عشان نشخص المُدمـن بسرعة

  1. الإستمرار في الحاجة
  2. الإفراط في الحاجة
  3. التدهور في الحياة
  4. ما يقدرش يبطل فترة

 

عن الكاتب

فريق بزرميط