سايكويكي

اضطراب القلق العام : بكرة النكد بكرة

اضطراب-القلق-العام

اضطراب القلق العام ده يا سيدي مُصطلح عام بيستخدم للتعبير عن كتير من الاضطرابات النفسية اللي بيلعب فيه القلق دور رئيسي جداً. الإنسان الطبيعي بيقلق عادي، إنمـا اللي الشخص اللي عنده اضطراب قلق بيقلق أكتر بكتير من الشخص الطبيعي. بيقلق بسهولة جداً ومن حاجات تعتبر مش منطقية بالنسبة لمعظم الناس.

اضطراب القلق العام بيأثر بشكل سلبي جداً على حياة الشخص المُصاب بيه سواء حياته العملية أو الشخصية. والستات أكثر عرضة للإصابة بيه من الرجالة وغالباً بيبدأ المرض في مرحلة الطفولة، المراهقة وفي أول مراحل البلوغ.

الفرق بين المريض والشخص الطبيعي في المثال ده:

  • واحد بيخسر فلوسه في البورصة فـ بيزعل (عادي.. وممكن يعيا كمان)
  • واحد بيخاف لـ يخسر فلوسه في البورصة (فابيستسمر بمبلغ قليل)
  • واحد بيخاف لـ يخسر فلوسه في البورصة (فـ بيزعل من قبلها وممكن يعيا كمان من قبلها برضه)

إيه هي أعراض اضطراب القلق العام؟

  • الاحساس بالخوف الغير منطقي زي الخوف الشديد من الموت في أي لحظة
  • التوتر والارتباك في مواقف معينة على شوية أفكار وسواسية (ونظرية المؤامرة)
  • اضطراب في النوم وضيق في التنفس. وخفقان زيادة في القلب.
  • إن الإيد أو الرجل يعرقوا جامد أو يبردوا وإن بقك يبقى ناشف وحاسس بتنميل في الإيدين والرجلين
  • غثيان، دوخة، شوية كوابيس.. وبيبقى صعب عليه إنه يهدى ويستقر حتى وهو بيحاول
  • إنك تحث إنك في ما معناه روحك في مناخيرك وعلى آخرك وفاضلك سنتي وتقع من على حرف جبل عالي (صعب قوي الإحساس ده على فكرة والأصعب منه: إنك تقدر تتخلص منه).
  • الأعراض دي زي معظم الأمراض النفسية محتاجة تستمر فترة عشان فعلاً الشخص يتم تشخيصه إنه عنده إضطراب قلق عام

عن الكاتب

فريق بزرميط