خليك سند

أهم 9 وصايا عشان تعرف تتعامل مع شخص مدمن وتقنعه بالعلاج

التعامل مع شخص مدمن

الإدمان مش مجرد عادة سيئة، إنما هو مرض نفسي واضطراب سلوكي مش هاينفع معاه كلام الهجوم من عينة “إيه القرف اللي بتشربه ده؟” ولا التخويف الديني من عينة “هاتخش النار يا مُدمن” ولا صح التعامل مع شخص مدمن إننا نتجنبه وقال يعني بنعاقبه.. لأنه ببساطة كدة كدة أصلًا بيفضل يقعد مع اللي شبهه.

الإدمان أنواعه كتير من أول السجاير والشيشة، مرورًا بالقهوة والشاي والحشيش والقمار، لحد الكحول والمخدرات والأدوية، وغيرهم وغيرهم..

دي أهم 9 نصايح عشان تعرف إزاي تتعامل مع شخص مدمن

  • أولًا: حافظ على توازنك وشخصيتك وحبك ليه. وحاسب من إنه يجرك معاه لطريق الإدمان حتى على سبيل التجربة. إمسك العصايا من النص: انت بتحبه، لكن ما بتحبش الطريق اللي هو ماشي فيه.

 

  • ثانيًا: بلاش كلام من عينه لو بتحبني بطل سجاير، لو ليا خاطر عندك بلاش تشرب، وهكذا.. لأنه بالتأكيد بيحب الحاجة اللي أدمنها دي (سواء مخدرات أو كحول أو غيره) أكتر منك.  لازم تتقبل الحقيقة المرة دي بدري بدري.. عشان تعرف تتعامل.

 

  • ثالثًا: ابتدي دور على برنامج تأهيل مُناسب ليه. ماينفعش أبدًا تاخده كدة من إيده وتحطه في مركز تأهيل أو تفرض عليه حياة جديدة كليًا صعبة عليه وبالتالي صعب يلتزم بيها. اسئل كويس على أنواع برامج التأهيل المختلفة وخد رأي الناس اللي تعافوا من الإدمان.

 

  • رابعًا: ماتختارش أي برنامج تأهيل أقل من 3 شهور .. لأن في إعلانات كتير هتلاقيها بتقولك شهر وشهرين وإسبوعين كمـان! أقل مدة أقرها المعهد الوطني لعلاج الإدمان هو 3 شهور.

 

  • خامسًا: في كل الأحوال ماتسيبهوش، حتى لو وافق يروح مركز تأهيل.. الشخص المُدمن فرصة تعافيه أكبر بكتير لما بيلاقي ناس حواليه واقفة في ضهره.. خليك سنده طول الرحلة.

 

  • سادسًا: التعامل مع المدمن ممكن جدًا يبقى خطر (سواء نفسًيا أو جسديًا) خاصة لو الشخص اللي بيساعده أضعف منه لأي سبب كان (الزوجة، الإبن، الأم، وهكذا..)  لازم يبقى ليك سند إنت كمـان.. حد من العيلة معاك، طبيب نفسي، ولو وصل الأمر استخدم القانون.

 

  • سابعًا: هاتفضل طول عمرك عايش متهدد إن يجيلك مكالمة تليفون بتقولك إن الشخص اللي بتحبه ده مات أو اتحبس أو عمل جريمة لا قدّر الله.. إحنا مش بنحبطك.. إحنا بنقولك إن التأهيل مُهم جدًا حتى لو اضطريت تستخدم أساليب عمرك ما كنت تتخيلها معاه!

 

  • ثامنًا: ده مش معناه إنك تكتفه وتاخده ترميه في مركز تأهيل ومتوقع إنه بعد تلات شهور هايجيلك بني آدم جديد! الموضوع مش بالسهولة دي ومش بالعنف ده! إمسك العصايا من النص.

 

  • تاسعًا: ولا المريض النفسي هايقتنع يروح لدكتور لما تقوله “إنت محتاج تروح لدكتور” ولا المُدمن هايقتنع يروح مركز تأهيل لما تقوله “لازم تتعالج من الإدمان”. وعشان يقتنع إنت محتاج حاجتين: طول نفس ومجهود من الناس اللي حواليه كلهم.
    من الآخـر خطة إسمها خطة تدخل أو Intervention Plan هيساعدك فيها أي أخصائي علاج إدمان، عشان تحاوط المدمن من كذا إتجاه من غير ما تضغط عليه فياخد جنب منك وتخسر سمعه ليك وتركيزه مع كلامك.
  • كمان صندوق مكافحة وعلاج الإدمان ممكن يساعدك وممكن تتواصل معاهم من هنا

عن الكاتب

أحمد الفرماوي