الصحة النفسية سايكويكي

إيه أنواع و أعراض اضطراب الأكل ؟

أعراض اضطراب الأكل
كتبها Asmaa Shaban

اضطراب الأكل مرض نفسي شائع جدا ويمكن مش بنتكلم عنه كتير هنا في العالم العربي وأشهر مثالين ليه هما فقدان الشهية العصبي أو المعروف بأسم Anorexia nervosa ،والنهام العصبي أو المعروف بأسم Bulimia nervosa. والمقال دا هايعرفك علي أعراض اضطراب الأكل اللي بتكون موجودة في الشخص اللي بيعاني من الاضطراب النفسي ده.

السرية والعزلة المبالغ فيها

اضطراب الأكل مرض بيجيب معاه كتير من الاحساس بالذنب والحرج وعشان كدا بيميل المريض لأنه يمارس عاداته في الأكل في السر ،الشخص اللي بيحارب مع اضطراب الأكل ممكن ياكل قدامك عادي جدا ويبدو طبيعي ،وبعدين يدور علي أي طريقة عشان يمارس عاداته في الأكل ،ولو هو مصاب بفقدان الشهيه العصبي هايدور علي أقرب فرصة للأسف انه “يرجع” كل الأكل اللي أكله ،ولو هو مصاب بالنهام العصبي هايدور علي اقرب فرصة عشان ياكل علي اد ما يقدر ،او اللي الدكاترة بيسموه بالترتيب purge و binge. والسلوك دا في الأكل ممكن يستهلك ساعات من الوقت ،عشان كدا المصاب باضطراب الأكل دايما هايدور علي حجج واعذار انه ما يخرجش معاك او يتفادي انه يروح اي مناسبة اجتماعية فيها اكل ،وهايميل انه يقضي وقته وحيد علي انه يقضيه مع اصحاية وعيلته.

الغضب والدفاع المستميت عن نفسه

لو حاولت تعبر عن قلقك للشخص المصاب باضطراب الأكل من عادات أكله ،هايكون رد فعله فوري وعنيف جدا،ومش بعيد يكدب اي حاجة أو اي دليل انت بتقوله او بتتكلم فيه.

التفاوت الشديد بين اللي هو شايفة واللي انت شايفة

الشخص المصاب باضطراب الأكل غالبا بيبقي شايف نفسه تخين جدا ولازم يخس ،وفي حالات زي البوليميا الشخص المصاب بيها بيبقي تحت الوزن الطبيعي بمراحل وممكن يوصل لمراحل خطيرة من تدني الوزن ويفضل يضغط علي جسمة عشان يخس اكتر! ،الشخص المصاب بالاضطراب بيبقي رؤيته لأكله ووزنه غير رؤية اللي حوالية تماما ،ودي بتبقي أحد الاشارات الخطيرة لاضطراب الأكل.

زيادة في معدلات التوتر والاكتئاب

الشخص اللي بيحاول دايما يداري عاداته في الأكل زي النهم المبالغ فيه ،عد السعرات الحرارية لكل حاجة ،الترجيع ،التمرين الجسدي القاسي بيبقي طول الوقت قلقان ان حد يعرف انه بيعمل العادات دي أو الأسوأ انه حد يشوفه وهو بيعمل العادات دي ،ودا بيسبب انه بيقي عصبي وقلقان طول الوقت تقريبا.
وكمان بتبدأ تبان عليه اعراض الأكتئاب زي النوم المتقطع ،الاحساس المبالغ فيه بالذنب ،الاحساس بفقدان الأمل وفقدان الشغف بحاجات كان بيحبها وبتبسطه.
وكل دا بيبقي نتيجة لأنه علي مستوي من المستويات بيبقي عارف ومتأكد ان اللي بيعمله دا ضار ليه جدا.

إخفاء فقدان الوزن

لما نيجي نبص بالذات للمصابين بفقدان الشهية العصبي أو Anorexia nervosa فطبيعي أنهم هايفقدوا وزن نتيجة لتقليلهم أكلهم بشكل ملحوظ ،وفي الحالة دي ونتيجة لإحساسهم بالذنب هايبدأو يخفوا فقدان الوزن دا بهدوم واسعه أكبر من مقاسهم ولو اضطرهم الأمر انهم ياكلوا مع حد هايفضلو طول الوقت يقلبوا في أكلهم ويقطعوه بس مش هايكلوه في الحقيقة.
وبالنسبة للستات هاتنقطع دورتهم تماما لأن الهرمون المسئول عن الدورة الشهرية موجود في الدهون اللي بناخدها من الأكل واللي بالتالي ما بتدخلش جسم السيدة المريضة باضطراب الأكل من الأساس.

الصرف المبالغ فيه علي الأكل واخفاء الطعام

في حالة الشخص اللي بياكل كتير جدا أو bingeing هتلاقي انه بيشتري أكل كتير ببشاعة ودايما عشان يداري علي تصرفاته هتلاقيه بيخبي الأكل في حتت غريبة جدا ،وهتلاقي اثار الأكل دايما في حتت غريبة في البيت.
وبالنسبة للمريض اللي بياكل كتير جدا وبعدين يرجع الأكل اللي أكله هتلاقيه دايما بيتجه للحمام بعد الأكل ،وبما انهم بيجبروا نفسهم علي الترجيع فهتلاقي ان الصباع اللي بيستخدموه دايما عليه علامات عض ،وغالبا بيعانوا من مشاكل في أسنانهم.

في كل الحالات اللي فاتت والسيناريوهات اللي عرضناها عليكم ،جسم المريض بيتعرض لضغط رهيب وتدمير مستمر ،وبما أن المرض نفسي بالمقام الأول لازم عناية نفسية طارئة وتدخل سريع.

لو حسيت أن حد قريب منك ينطبق عليه اعراض من اللي ذكرناها في المقال حاول تتكلم معاه براحة جدا وبدون غضب أو انفعال ،حددله التصرفات اللي لفتت نظرك وحاول تساعدة انه يلجأ لدكتور أو مصحة جيدة تساعدة في التخلص من المرض دا.

عن الكاتب

Asmaa Shaban