مرض ألزهايمر حكايته طويلة، واتعمل عنه كذا فيلم.. وإتقال عنه مرض العصر وكان تريند هزار عن النسيان من فترة، لما كان حد بينسى بيتقاله: “ايه الزهايمر اشتغل ولا ايه؟”

فتعالى نتكلم عن الزهايمر بشكل علمي، علشان في كلام كتير مش صح.

الزهايمر مصطلح صاغه دكتور ألماني اسمه “ألويس ألزهايمر” سنة 1906 لما عمل تشريح لجثة سيدة في الخمسينات ولقى ان عندها خلل عقلي نادر وغريب، ووصل للمرض لما لقى عُقد و”تنكُسات” في تلافيف المُخ.

سيبك من آخر كام كلمة وتعالى نشرح الموضوع بالبلدي.

بقى يا سيدي ده كده حاجة بتهاجم خلايا المُخ، وتقفّل السكة ما بينهم، بتمنع الكهربا عن الماكينة يعني. فهيحصل ايه؟ هتبوظ والبارومة هتاكلها.

بتفصل الكهربا ازاي؟

بتجيب كيس، وتملاه قطع بروتين، وتقوم محاوطه الخلية العصبية بيه. فتنفصل عن جيرانها ومصدر غذاءها، وتموت.  ده فعلًا اللي بيحصل.

وتقريبًا كل اللي إتشخص بالزهايمر في النهاية بيوصل لنفس الأعراض؛ فقدان الذاكرة (مش مُجرد نسيان)، إرتباك، صعوبة في الحاجات اللي كانت بتتعمل بسهولة قبل كده (السواقة او الكتابة او غيرهم)، صعوبة إتخاذ قرارات.

والأخيرة دي منطقية، أصل يعني ايه قرار وهيتاخد ليه ولمين؟
العقل مش لاقي إجابات.

بس حتى لو الاعراض واحدة، فـ الزهايمر ليه نوعين:

• النوع المُبكر

وده بيتشخص في اللي هم تحت سن 65، يعني في الأربعينات او الخمسينات. وده نوع مش شائع، بيشكل نسبة 5% من مرضى الزهايمر ككل.

خلي بالك هنا ان النوع ده بيزيد في المصابين بمتلازمة داون، وبنسبة كبيرة بيبقى سببه من جينات العائلة الكريمة.

• النوع المتأخر

وده بيتشخص فيمن هم أكبر من 65 سنة. وده مش معروف ليه سبب حقيقي، وممكن ميبقاش وراثي ولا في العيلة من الأساس. فمش عارفين بالظبط ليه بيصيب ناس مُعينة في السن ده دونًا عن غيرهم.

وهنا بييجي فتي كتير عن الأكلات اللي كذا والتمارين المش عارف ايه، بس خلينا نقول انها لسه لحد النهاردة مجرد تخمينات او هجص عشان التسويق.

طب ايه؟ انا كده قلقت على نفسي وعلى اللي حواليا، أعمل ايه؟

بص فـي حاجة أساسية علشان تفرق مابين النسيان العادي مرض الزهايمر

يعني لو بتدور على مفتاح ومش فاكر انت سبته فين، هتفتكر بعدين عادي. لكن لو ناسي يعني ايه مفتاح وبتاع ايه وبتدور عليه ليه؟ دي حاجة تقلق شوية…

تعالى ندي أمثلة أكتر. ونلعب لعبة مقارنة.

الطبيعي: بتنسى مواعيد النهاردة، وبتفتكرها متأخر.
المش طبيعي: بتسأل اصحابك او اسرتك على نفس الحاجة مرة ورا مرة.

الطبيعي: بتواجه صعوبة تراجع دفاتر حساباتك (لو بتعمل ده)
المش طبيعي: متعود تعمل أكله كل يوم، والمفروض حافظ الوصفة.. بس مش عارف تمشي عليها.

الطبيعي: بتحتاج مساعدة احيانًا في تظبيط المايكروويف (زيي كده) او تدور على قناة على التليفزيون.
المش طبيعي: مش عارف تشغل الغلاية الكهربا اللي فيها زُرار واحد وسلك كهربا.

الطبيعي: بتنسى انهاردة ايه
المش طبيعي: بتلاقي نفسك في أيام وشهور وأماكن مش عارف جيتها إزاي.

الطبيعي: السن ليه أحكامه وأثره على النظر
المش طبيعي: بتعدى قدام مراية ومش عارف مين اللي واقف قدامك. أو مش فاكر يعني ايه ألوان ولا مسافات.. أو يعني ايه مراية.

الطبيعي: بتدور على كلمة عارفها وعلى طرف لسانك بس مش فاكرها.
المش طبيعي: بتنادي الحاجات بإسم غلط، أو بتقف في نص الجملة ومش فاكر كنت بتقول ايه.

الطبيعي: بتنسى نضارتك او الموبايل ومش فاكر سبتهم فين.
المش طبيعي: بتنسى ان معاك موبايل او إنك بتلبس نضارة من الأساس.

الطبيعي: بتغلط في حاجات كل فين وفين.
المش طبيعي: بتنسى يعني ايه حساب بنك، او يعني ايه فلوس، او بتشتغل ايه.. أو حاجات بسيطة زى الإستحمام مثلًا وبيتعمل إزاي.

الطبيعي: بتتعب من الشغل او مشاكل البيت او الحياة الإجتماعية كل فترة.
المش طبيعي: بتنسى مين أفراد اسرتك وبتشجع فريق ايه وفي رياضة ايه.

الطبيعي: ليك روتين بتمشي عليه وحاجات بتحب تعملها كل فترة محددة.
المش طبيعي: بتتعصب جدًا وانت ناسي تعمل حاجة، ومش فاكرها. أو ده بيقلب معاك بتوتر وقلق وإرتياب وخوف واحيانًا إكتئاب.

إحنا فضّلنا نقول الأعراض بالشكل ده علشان نقلل “الهسهس” ان ممكن يكون حد عنده زهايمر، وحطيناها في صيغة لعبة.

بس الحقيقة ان الأعراض دي بتيجي في باكدج، ولو عندك إنت، او عند حد تعرفه، كتير من النقط اللي قلنا عليها “مش طبيعي” يبقى ننصحك متاخدش من المقالة دي تشخيص، وتحجز معاد كشف في أقرب فرصة.