أخطر 5 أسباب نفسية للإدمان

الادمان دايما سببه بيكون جذري، محدش بيصحى الصبح يقرر يبقى مدمن! عشان كده علاج الإدمان لازم يبدأ من الجذور ويكون نفسي قبل ما يكون علاج جسدي، كتير بيفشلوا في الاقلاع عن المخدرات لإنهم بيستخدموا الأساليب السطحية انهم يوقفوا تعاطي ويشعروا بأعراض انسحاب واكتئاب وتعب بيلاقو مافيش قدامهم حل انهم يرجعوا تاني للتعاطي.

الأسباب ورا الإدمان كثيرة بس في اسباب كامنة وجذرية والاسباب الخمسة دول هما الأكثر شيوعا:

1- الصدمة النفسية!

لما يتعرض شخص لحادث مؤلم، بيتسبب في تغييرات في الدماغ، التغييرات دي واحد منهم هو الادمان والصدمات الحقيقة متنوعة ممكن تكون حادثة عربية، أو وفاة شخص مقرب، أو خناقة دخلت فيها، أو اعتداء جنسى أو جسدي أو حتي اساءة لفظية.

مش كل الصدمات النفسية سهل تخطيها، وبيتعرض اشخاص كتير لاضطراب ما بعد الصدمة ودا بيسبب مشاعر زي الاكتئاب والقلق وممكن من خطورته يؤدي للادمان أو الانتحار، واللي بيكون هدفهم في الاخر هو النسيان أو التخلص من المشاعر السلبية، مهم جدا لو عند صدمات من الطفولة انك تعالجها قبل ما تفكر تعالج الادمان وقتها هتكون ارادتك في الحياة أقوى.

2- الاضطرابات المتزامنة 

ساعات الاضطرابات النفسية بتكون هي الاساس في لجوء الشخص للإدمان،  يمكن تشخيص هذه الاضطرابات المتزامنة أو عدم تشخيصها، تشمل بعض اضطرابات الصحة النفسية:

• القلق
• الاكتئاب
• اضطراب ثنائي القطب
• فصام
• اضطراب ما بعد الصدمة
• اضطراب الوسواس القهري

3- اضطراب الوسواس القهري

للاسف بيلجأ الاشخاص المصابين للمخدرات أو الكحول عشان يقمعوا مشاعرهم السلبية اللي بتيجي مع اضطرابهم المتزامن، في حين ان نشوة التعاطي سواء كحول أو مخدرات هي شئ مؤقت وبتخلي الاضطرابات النفسية اسوأ على المدى الطويل، لأن بعض اثار الادمان هما القلق والاكتئاب، لما الشخص المصاب يجيله كمان الاثار دي مع اعراض اضطرابه الحالية بيكون جحيم مش قادر يتخطاه غير بانه يكون تحت تأثير المخدرات طول الوقت!

4- الاستعداد الجيني

وجود تاريخ عائلي من التعاطي وشرب الكحوليات، بيزود احتمالية تعاطي الشخص الكحول والمخدرات، ودا صحيح خصوصا لو الطفل نشأ بوجود متعاطين في البيت، هيبان له وهيترسخ في ذهنه انه شئ عادي وفي كل البيوت، هيكون خوفهم من التعاطي أقل بكتير من شخص عمره ما جرب ولا شاف شخص بيتعاطي، دا غير ان الطفل هينشأ على التأقلم مع شئ سلبي زي الادمان، ان الشخص المدمن بيتعاطي وتاني يوم يتصرف كأب وكموظف وكأنه شئ عادي!

5- المشاكل الجنسية

الأشخاص اللي بيعانوا من المشاكل الجنسية بتسببلهم بصمة عار وتدني احترام الذات ودا شعور بيلازمهم طول الوقت، وللاسف بيسبب شعور بالخجل والذنب حتى في ابسط افعالهم بيحاولوا يعتذروا كانهم دايما غلطانين بشكل ما، وبدل ما يعالجوا المشاكل دي أو يعالجوا نفسيتهم بيلجأوا للتعاطي وشرب الكحول بشكل مفرط عشان يتعايشوا، دا غير ان الكحول والمخدرات بتدي الشخص شعور زائف بالطاقة والنشوة ودا بيديه “عذر” للشرب والتعاطي بدل ما يعالج الوضع بطريقة صحية وايجابية.

نصيحتنا

الاشخاص المصابين بالاضطرابات المتزامنة عادة ما بيتم وصف ادوية طبية ليهم عشان تقلل من المشاعر دي، ولو نفسيا مش مستقر وعندك مشاكل نفسية تانية غير الادمان احجز استشارة مع اقرب دكتور نفسي واطلب منه يرشحلك أماكن لجلسات علاج الادمان.