تأثير الصدمات النفسية على الصحة النفسية

واحد من بين كل 3 اشخاص على الأقل بيتعرض لأحداث صادمة في حياته، والاحداث الصادمة دي ممكن تحصل للشخص نفسه او للناس اللي بيحيهم وقريبين منه، الصدمات غالبا بتكون احداث صعبة او خطيرة ممكن توصل للموت زي مثلا التعرض لحادثة او عنف بدنى او كوارث طبيعية أو أمراض.

إيه اللى بيحصل لما بتمر بصدمة نفسية؟

لما الانسان بيمر بصدمة كبيرة، الجسم تلقائيا بيدافع عن نفسه وبيبتدى يقوم برد فعل من خلال مجموعة من الاعراض الجسمانية اللي بتختلف في حدتها من شخص لشخص، وكأن جسمك بيستعد لحالة طوارئ وبيفرز مواد كيميائية بتتسبب في اعرضا مختلفة زي:

  • ارتفاع ضغط الدم
  • زيادة سرعة ضربات القلب.
  • التعرق.
  • فقدان الشهية.

وكل دي حاجات طبيعية لأنها مجرد استجابة لجسمك انه اتعرض لصدمة او خطر، بس في ناس بتحسب يحصلها صدمة او انكار للواقع ممكن يخليها تقضى أيام في حزن او غضب او إحساس بالذنب وغالبا بمرور الوقت بيحصل تحسن تدريجي وبيتخفى الاعراض، بس في بعض الحالات المشاعر دي ممكن تستمر عند بعض الناس لفترة وتسبب مشاكل نفسية او عقلية خطيرة زي اضطراب ما بعد الصدمة والاكتئاب.

اضطراب ما بعد الصدمة (PTSD)

الناس اللى بتتعرض لصدمة شديدة ممكن يستمر معاهم إحساس القلق لسنين طويلة، وفى أعراض مهمة بتصاحب اضطراب ما بعد الصدمة زي استرجاع الذكريات او الاحداث المؤلمة وتجنب الأماكن اللى بترتبط بالصدمة او الحدث الموجع وكمان الأرق وقلة التركيز والاكتئاب وادمان المخدرات والكحول.

وأفضل طريقة لعلاج اضطراب ما بعد الصدمة بتكون العلاج بالحوار مع طبيب نفسي، لأن دي اكتر حاجة ممكن تشجع المريض انه يتكلم عن التجربة المؤلمة اللي مر بيها، وممكن الطبيب كمان يوصف شوية أدوية تخفف الاكتئاب غالبا الناس بيعانوا منه بعد الصدمات الشديدة.

الاكتئاب

في فرق كبير بين الاكتئاب ومجرد الشعور بالحزن او الإحباط، لأن المكتب بيعانى من مشاعر شديدة من القلق واليأس والسلبية والعجز ويتستمر المشاعر دي مع الشخص ومش بتقل ولا بتختفى.

العلاج بالكلام زي العلاج المعرفي السلوكي (CBT) والإرشاد النفسي مع ادوية مضادات الاكتئاب بتوصل لنتائج هايلة في علاج الاكتئاب.

تعمل اية لو اتعرضت لصدمة شديدة؟

أطلب مساعدة الناس اللي حواليك

عادة بعد الصدمات بتحس إنك مش قادر تتكلم مع حد من عيلتك او اصحابك عن الازمة اللي مريت بيها، ممكن عشان متقلقهمش ومتضغطش عليهم، او عشان محتاج مساحة يكون مع نفسك شوية، بس لازم تحاول تكون وسط الناس عشان يساعدوك تتعافى من اللى انت فيه، لو حاسس ان مفش حد قريب منك ممكن يساعدك ممكن تروح لدكتور نفسي وهو هيقدر يساعدك تخرج من ازمتك.

اهتم بنفسك

لازم تهتم بصحتك عشان تقدر تتعافى مرة تانية، ممكن تاخد إجازة او تريح شوية، لازم كمان تهتم بالأكل الصحي وتتبع نظام غذائي متوازن وتبعد تماما عن الكحول والمخدرات لأنها اكيد هتضرك اكتر.

تابع مع دكتور متخصص

لو حسيت إنك بتعانى من اعراض مزعجة مأثرة على حياتك اليومية لازم تلجا لدكتور متخصص في أسرع وقت عشان يقدر يساعدك، والدكتور بيكون ضروري في حالة:

  • معندكش حد قريب منك تقدر تتكلم معاة.
  • حسيت ان الصدمة مر عليها اكتر من 6 أسابيع وانت مش قادر ترجع لطبيعتك مرة تانية.
  • لو حد قريب منك حس بتغيرات سلبية طرأت عليك ونصحك تروح لدكتور عشان تطمن، لازم تسمع كلامه.
  • شغلك او دراستك ابتدوا يتأثروا بحالتك النفسية.
  • لو حسيت إنك مش قادر تمارس حياتك بشكل طبيعي وتقوم بالمهام اليومية المعتادة.
  • بتشرب كحول كتير او مخدرات عشان تقدر تتأقلم وتواصل حياتك.

اترك تعليق