6 حاجات أوعدك هايحصلوا في حياتك لو قللت من استخدامك للسوشيال ميديا

الحقيقة إن قبل ما يفكر “مارك زوكربيرغ” في اختراع الفيسبوك أو قبل ظهور وسائل التواصل الاجتماعى بشكل عام زي هاي فايف وإنت راجع، كنا لسه بنتواصل مع أهلنا وأصحابنا و بنتفاعل مع بعض أكتر وبصورة طبيعية أكتر، دى 6 حاجات كويسة هاتحصلك لو بطلت تستخدم السوشيال ميديا لفترة واضحة:

1- هتكون أسعد في حياتك نسبيًا وحاتحس بفرق

في الواقع الافترضى للسوشيال ميديا، من السهل جدا أنك تقارن حياتك بحياة أصحابك وتقلل من نفسك. لأننا دايما عايزين نكون الأحسن فبنلجأ للمقارنة وبنكون عايزين دايما نكون زيهم في كل حاجة مستواهم المادى أو الإجتماعى أو شكلهم ومظهرهم…

ودايما بنحس أن حياتهم بتتقدم وأن حياتنا في حالة جمود. دايما بنفكر في اللى حقق حلمه واشتغل الشغل اللى بيحبه وأحنا لسه مش لاقيين شغل أو بنفكر في اللى اتجوز وكون أسرة وبنحس دايما أن مفيش مقارنة بين حياتنا وحياة الناس.

في السوشيال ميديا، الناس بتقدم أفضل حاجة عندها أحسن الصور وأحلى لحظات حياتهم. من المستبعد جدا أن حد يحط صورة وحشة ليه أولحظة يائسة في حياته علشان الناس كلها تشوفها. لو حد لف العالم، أكيد هيحب أنه ينزل صور ليه. لكن لو اتعرض لمشكلة كبيرة في سفرة زى المشاكل المادية مثلا، أكيد مش هيحب أنه يعرف الناس كلها. علشان كده، لازم تسأل نفسك ليه بتقارن حياتك بالحياة الافتراضية على وسائل التواصل الاجتماعى وتحس قد ايه حياتك بائسة؟ أنت بالظبط بتقارن أسوأ لحظات حياتك أو الفترات الصعبة والظروف اللى بتمر بيها بأفضل لحظات الآخرين.

لما تبطل إدمان استخدام السوشيال ميديا، هتبطل تقارن حياتك بحياة الناس حواليك وهتكون راضى أكتر عن حياتك وهتحقق إنجازات حقيقية بعيد عن المقارنات.

2- هتكون منتج أكتر في شغلك وفـ حياتك

هتدرك فجأة أن في حاجات كتيرة ممكن تعملها بدل أنك تضيع وقت على وسائل التواصل الاجتماعى. كمان هتلاقى طرق علشان تخلى أحلامك واقعية أكتر. هل كنت عايز تتعلم لغة جديدة أو تتعلم مهارة جديدة زى البيانو أو رياضة جديدة، وبدل ما تبدأ تتعلمها ضيعت الوقت ده على السوشيال ميديا، أنت ممكن فعلا تستثمر الوقت ده في أنك تحقق خطوة حقيقة في حلمك بدل من أنك تتمناها بس.

ممكن جدا أنك تلجأ لأنك تخدع نفسك في محاولاتك أنك تقلل من الوقت اللى بتقضيه على السوشيال ميديا، كام مرة حطيت خطة أنك تقضى ربع ساعة بس على السوشيال ميديا ولاقيتهم بقوا ساعتين؟ أكيد حصلت كتير. علشان كده، حاول أنك تتجنب من الأول وتقرر أنك هتفصل النت خالص لفترة محددة.

3- هتكون راضى عن حياتك بشكل أكبر.

لما تنفصل عن إدمان السوشيال ميديا هتقدر تشوف الحياة الواقعية. هتكون ممتن وراضى أكتر عن حياتك بدل من إحساس الغيرة والحسد من حياة الناس على السوشيال ميديا. هتحس أن حياتك أحسن بكتير ومش هتسمح لل 10 حاجات اللى مش عندك بس عند أصحابك على السوشيال ميديا أنهم يخلوك مش راضى عن حياتك، كمان هتشوف النعم الكتير اللى عندك اللى ممكن متكنش واخد بالك منها زى نعمة الصحة والأهل.

4- علاقتك بأهلك وأصحابك هتكون أحسن.

السوشيال ميديا هدفها في الأساس أنها تساعدك تتواصل مع أهلك وأصحابك، لكن هل ده فعلا اللى بيحصل؟ كام مرة لقيت لقيت نفسك بتقضى وقتك على وسائل التواصل الاجتماعى في حين أن الناس فعلا حواليك ومش بتتواصل معاهم ومش ملاحظهم من الأساس؟

كام مرة قضيت وقتك على السوشيال ميديا بدلا من أنك تتكلم مع إنسان حقيقى جمبك؟ اللى بيحصل هو أن السوشيال ميديا بقت بتفكك الناس مش بتحقق التواصل. لما تقطع علاقتك بوسائل التواصل الاجتماعى، هتدرك أن التواصل في العالم الحقيقى أحسن بكتير من العالم الافتراضى.

5- هاستستمع أكتر بالجمال اللي حواليك.

أراهنك إن كتير من الحاجات الجميلة في العالم الحقيقى بعيدا عن صور وفلاتر السوشيال ميديا إنت لسة ماشوفتهاش. لو قدرت تبعد عن الموبايل ومتشتتش نفسك، أكيد هتبدأ تلاحظ حاجات كتيرة حواليك ممكن مكنتش واخد بالك منها حتى لو ساكن في مصر 😀 . ولأننا في الدنيا مش عايشين للأبد، لازم أننا نقضى وقتنا في الحياة الحقيقة وسط الطبيعة مش مجرد صور على شاشة.

6- هتكون مبتكر أكتر ودي حاجة هايلة لوحدها

لما بتكون مشتت بوسائل التواصل الاجتماعى، مخك بيتقفل عن الحياة الواقعية وبتكون أقل ابتكار. لما تبطل إدمان السوشيال ميديا، هتكون مبتكر أكتر و أكيد حياتك هتكون أحسن. ممكن تكون محتاج فلوس أكتر لكن مجرد الرغبة مش هتحققلك اللى أنت بتحلم بيه. لو سبت الموبايل وبطلت تشتت نفسك، هتبدأ تاخد خطوات حقيقية لتحقيق حلمك وهتبدأ تفكر وتنفذ.