7 عادات يومية بنعملها بتدمر صحة الدماغ
الدماغ دي الكمبيوتر بتاع الجسم لو حصل فيه أي خلل بيأثر علي الجسم كله وزي موتور العربية أي عطل فيه بيأثر علي ميكانيكية العربية كلها وبيخليها مش مظبوطه هنا الدماغ نفس الفكرة فيه حاجات وعادات بنعملها بشكل يومي بتأثر علي صحة الدماغ.
لما نخلي بالنا من دماغنا واحنا صغيرين هنتفادي اننا نتعرض لأمراض بتصيب الدماغ واحنا كبار، زي برضه العربيه لما نصلحها ونريحها أول بأول ونغيرلها زيت وكاوتشات مش هتعمل معانا الدنيئه وتعطل في السكة، فا لما نخلي بالنا من دماغنا وصحة عقلنا ده هينعكس على صحتنا العامة.
عشان تعرف نصائح اكترعن الدماغ بص علي المقال ده
هما فيه شويه عادات الناس بتعملها بشكل يومي ممكن تأثر علي أداء الدماغ علي المدي البعيد:
- قلة النوم
بما ان الحياة اللي احنا عيشينها والتدخل الجامد للتكنولوجيا في حياتنا خلي رتمها سريع جدا وانعكس دا علي كل حاجه بنمارسها، وبالتالي بنيجي علي نفسنا لصالح شغلنا وبنهمل في الوقت المخصوص للنوم، في حين إن النوم ده زي الريستارت بتاع الكمبيوتر مهم عشان يرجع الجهاز يظبط الأداء ويستغل من تاني.
وفية دراسات علمية ربطت بين قلة النوم وارتفاع خطر الإصابة بالخرف والزهايمر، عشان كده لو فيه مشاكل في النوم من الأفضل إننا نبطل شرب الكافيين واستخدام الأجهزة الإلكترونية في بالليل، وتنظيم مواعيد النوم.
- الوحدة والعزلة الاجتماعية
ما نقصدش هنا عدد الأصحاب اللي عندك علي الفيس أو تويتر أو واتس أو غيرها من مواقع التواصل الاجتماعي الافتراضية، لكن هنا نقصد الأصحاب الحقيقين اللي بتشوفهم ويشوفوك وبتتاقبلوا كل فترة بعيدة أو قريبه.
فيه دراسة بتقول أن الناس اللي عندهم دائرة اجتماعية صغيرة كانت أو كبيرة بيكونوا أكثر سعادة من اللي بيميولوا للعزلة، والدراسة لقت إن العزلة الاجتماعية والوحدة بتزيد من خطر الإصابة بالزهايمر.
في المرة الجاية لما نحس بالوحدة اتصل بأي حد من صحابك القدام أو أخرج روح أي مكان وكون صداقات جديدة.
- الوجبات السريعة الكتير
لو مش بنلاقي الوقت الكافي عشان نحضر اكل لينا في البيت ويكون أكل صحي، هنلجأ اننا نتصل بالدليفري ونجيب أكل جاهز من بره وطبعا احنا لا عارفين مستوي النضافة اللي فيه المطعم أو الأكل نفسها، هنا هتبدأ المشكلة أن الأكل الجاهز ده بيهدد صحة دماغنا، التركيز على أكل النوع ده من الطعام بيقلل من كفاءة عمل الدماغ وبيساعد في تسريع عملية شيخوخته.
- سماعات الودان
استخدام سماعات الودان بقي أمر ضروري عشان نمشي مع التطور التكنولوجي، فيه كتير من الشباب بيسخدموا سماعات الودان وبيعلوا الصوت علي الأخر وده بيأذي أولا ودانهم وثانيا دماغهم.
وفيه دراسة ربطت ما بين فقدان السمع عند كبار السن وارتفاع خطر الإصابة بمشاكل في الدماغ زي الزهايمر.
عشان كده في المرة الجاية لما نيجي نستخدم سماعات الودان سواء للتليفون أو للأجهزة التانية ، بلاش نرفع الصوت علي الأخر، ونحاول ما نستخدماهش في سماع الأغاني أو الموسيقي لفترة أكثر من ساعتين.
- الكسل والخمول
لو بنرجع من الشغل حاسسين بإنهاك ومش قادرين علي الحركة، وكمان بنكمل اليوم بالقعدة قدام التليفزيون ونسهر بالليل، هنا ممكن نقلق علي صحه الدماغ، عشان كل لما يقل النشاط البدني بيرتفع خطر الإصابة بالخرف أو الزهايمر، ده مع خلطة أمراض تانية زي السكر وأمراض القلب وارتفاع ضغط الدم.
سمعنا كتير أن أضرار التدخين وكل الدكاتره قالوا انه ليه إضرار ومفيش اختلاف علي كده حتي شركات السجاير نفسها بقت تكتب علي العلب بتاعت السجاير كده طبعا دي تعليمات هي مش من مصلحتها إننا نبطل شرب سجاير لا، وطبعا رغم الأضرار فيه ناس كتير لسه بتدخن عادي بس اللي ميعرفهوش أن التدخين بيقلل من حجم الدماغ الخاص وبيخلي ذاكرتنا أسوأ وبيزود فرصه الإصابة بالخرف برضه وبشكل مضاعف عن الناس اللي مش بتدخن.
- الأكل الكتير
ساعات بنحس أن دماغنا مش مظبوطه لو دبناها أكل وملينا بطننا بوجبات ورا بعض أو وجبه وحدة كبيرة حتي لو كان الأكل صحي ومش اكل جاهز، ده لأن الأكل الكتير والدفعة واحدة بيقلل من قدرة الدماغ على إنها تبني شبكات قوية بتساعد في التذكر والتفكير.
- الضلمه
لو بنحب القعاد في الضلمة ومش بنحب نخرج في الشمس، ده بيعرض صحه الدماغ للخطر، عشان عدم حصولنا على الضوء الطبيعي بيرفع من خطر إصابتنا بالاكتئاب، وبالتالي بيأثر علي صحة الدماغ.
في النهاية اما نحافظ علي دماغنا نبعد عن العادات اللي بتأثر عليها هنقدر نتفادي أمراض كتير ممكن تصيبك أما تكبر وتخلينا عايشين مرتاحين لما نكبر ونعجز.
