6 جمل متقولهاش أبدا لابنك
الأبوة و الأمومة وأنك تقدر تربى أولاد هي واحدة من أكبر وأصعب التحديات المجزية ، وغالبا أحنا كأهل بنكون دايما مشغولين بطلبات أولادنا المادية والعملية زى أننا نوفرلهم مسكن آمن واحتياجاتهم اليومية ، وده ممكن يسبب أننا نغفل عن احتياجهم النفسى واللى بيكون ليه دايما تأثير على نموهم العقلى .أوقات كتيرة من غير قصد ممكن نقول كلام يكون ليه تأثير سلبى على أولادنا على المدى الطويل ممكن يسببلهم عدم اتزان نفسى وقلة الثقة بنفسهم و مفاهيم غلط كتيرة ،ودى أمثلة على أكتر الجمل الشائعة اللى بتتقال دايما وبيكون ليها آثار سلبية على الطفل:
- ” متخذلنيش ، متخيبش ظنى فيك “
غالبا الأهل بيلجأوا للنوع ده من العبارات لما بيكونوا عايزين يحمسوا أطفالهم أنهم يعملوا حاجة معينة أو يمنعوهم من تصرف غلط ، فبيستخدموا جمل متطرفة زى ” متكسفنيش قدام الناس ” ، و ده بيعتبرابتزاز العاطفى بيخلى دايما الطفل حاسس بضغط كبير لو مقدرش ينفذ الحاجة المطلوبة منه ويحس بفشل أكبر لو مقدرش يحققه كمان دايما بيكون خايف من النقد ، ممكن بدل الجمل المتطرفة دى نستخدم أسلوب التشجيع ودايما نحسسه أنه حاول ونجح حتى لو مقدرش يوصل للهدف المطلوب منه .
- ” صاحبك حل أحسن منك “
مقارنة ابنك بأصحابه بيكون ليه تأثير كبير على علاقته بيهم و بكل الأطفال اللى في سنه لأنها بتكون دايما علاقة تنافسية ، وبدل ما بيكون العلاقة بينهم قايمة على قيمة الصداقة والحب بت كون العلاقة بينهم قايمة على التنافس وأنه دايما يثبت أنه أحسن من أصحابه وده بيخلى عنده غل وحقد لو هما سبقوه في حاجة و العلاقة مش بتكون سوية أبدا ، كمان بيخلق نوع من عدم تقدير الذات .
- ” مش هتكبر وتبقى قوى إلا لما تخلص أكلك ، الأكل هيجرى وراك لو مخلصتوش “
على الرغم من أنها جملة شائعة جدا بين الأهالى إلا أنها ممكن يكون ليها تأثير سلبى على الأطفال ، لأنها ممكن تسببله اضطرابات في الأكل ، كمان ممكن يجيله رهاب من بعض الأكل وهى أكتر احتمال أنها تظهر خلال مرحلة الطفولة .
في الحالة دى ، الأهل بيستخدموا نوع من أنواع التلاعب بهدف تحقيق نتيجة معينة وهى أن أولادهم ياكلوا الأكل الصحى ، وده ممكن يسبب أن الأطفال يركزوا بشكل مبالغ فيه على أهمية الأكل و يفكروا في العواقب اللى ممكن تحصل لو مقدروش يكملوا الأكل وبالذات لو كان الطفل بطبعه من الشخصيات الحساسة أو القلقة ، والأحسن هو أن الأهل يستخدموا أسلوب التشجيع على أنهم ياكلوا أكل معين ويشرحلهم فوايده الصحية أو يقدمولهم الأكل بشكل جذاب للطفل .
- ” أنت زى باباك أو(مامتك ) بالظبط “
الجملة دى بالذات بتعتمد على الطريقة اللى بتوصل بيها ، بس كقاعدة عامة الجملة دى مينفعش أنها تتقال بأى شكل من الأشكال لأنها بتخلق دلالات سلبية عند الأطفال وبتخليهم يكرهوا الصفات المشتركة بينهم وبين أحد الوالدين الموروث عنهم الصفات دى .
كمان الجملة دى بتخلق مسافة كبيرة بين الأهل والطفل وبالذات لو اتقالت في خنافة أو اتقالت بنوع من الغضب ، وفى الحالة دى أنت بتقدم دليل واضح على أنك مش راضى عن علاقتك بشريك حياتك وده بيزعج الطفل وبيخليه يدخل في مشاكل وخلافات بين الأهل بشكل مش مباشر .
لازم الأم أو الأب يتجنبوا المقارنات التقيلة بين الطفل وشريك الحياة لأن ده بيقلل احترام الطفل لنفسه ، وبدل المقارنة الغير عادلة ممكن الأهل يستخدموا أسلوب النقد البناء ويكون بشكل شخصى من غير مقارنة .
- ” مش عايزه اسمع صوتك ، متزنش كتير “
من الطبيعى جدا أن الأطفال أوقات كتيرة بيعملوا دوشة حواليهم ، ودور الأهل هي أنهم يوجهوا سلوكهم ، وعلى العكس المعروف لازم الأهل ميمنعوش أولادهم أنهم يعبروا عن نفسهم ، أو أنهم يحدوا من الدوشة الكتيرة واللى ممكن يسموه إزعاج اللى بيكون أوقات كتيرة علامة على الذكاء والإبداع ،بمجرد أنك تقول لابنك أنا مش عايز اسمعك وبغض النظر عن الظروف ، بطريقة غير مباشرة بيوصل للطفل فكرة أن وجوده مش مرحب بيه ، وده بيخلى عنده شعور بالذنب وتأنيب الضمير .
- ” لو عملت كده هحبك “
من المفاهيم اللى لازم نثبتها في عقل الطفل هو أن الحب لازم يكون غير مشروط وأنه يكون حب أبدى . النوع ده من الجمل بيتقال دايما بهدف التحفيز لكن في الحقيقة على المدى الطويل ممكن يكون ليه نتايج سلبية على الطفل أنه بيحس أن حب أهله مرتبط دايما بسلوك أو فعل معين وده بيزود الضغط على الطفل ، على العكس تماما لازم دايما الأهل تفكر أولادها أن مشاعرهم ناحيتهم مش مشروطة أو مقيدة بسلوك معين .
