متلازمة العش الفارغ :لما الأولاد يسيبوا البيت

رغم إن السلوك نفسه في الحياة معتادين عليه إلا إن له سبب ومسمي علمي وهو متلازمة العش الفارغ وبتطلق علي الحالة اللي الزوجين بيقعدوا في البيت لوحدههم بعد ما كل الأولاد أما بيكونوا أتجوزا أو سافروا أو تركوا البيت لأي سبب أخر و الأبوين ممكن يتولد عندهم عواطف ومشاعر مختلطة
متلازمة العش الفارغ ملهاش تشخيص سريري لأنها عبارة عن ظاهرة توضح إن الآباء والأمهات بيعانوا من مشاعر أسى و حرمان لما أخر حد من عيالهم يسيب البيت لأي سبب.

ورغم أنهم بيشجعوا عيالهم علي أنهم يبقوا مستقلين إلا إن الأمر بيكون صعب عليهم لما يلاقوا البيت فجأة بقي فاضي علي أساس أن الأولاد جزء من حياتهم اليومية والروتين اليومي لما فجأة جزء من الروتين يتلغي ، القلق برضه علي الأولاد وسلامتهم وازاي هيقدروا يخلوا بالهم من نفسهم والأمر بيزيد لما يكون الآباء والأمهات مهتمين اوي بدورهم في حياة ولادهم والفترة دي بتكون صعبه عليهم .

تأثير متلازمة العش الفارغ

الباحثون شافوا في السابق إن الأبوين اللي بيعانوا من متلازمة العش الفارغ  بيكون عندهم  إحساس قوي بالحرمان وبالتالي بيكونوا اكتر عرضة للإصابة بالاكتئاب أو أمراض نفسية تاني زي  وإدمان الكحوليات أو أزمة الهوية و الخناقات الزوجية.

ورغم المشاعر السلبية بالآسي والحرمان  الأبحاث بتقول إن المتلازمة بتقلل من الخناقات بشكل عام في الشغل أو في البيت  وبتدي للطرفين فرصه انهم يحسنوا علاقتهم الزوجية واستعادة الذكريات الحلوة بينهم .

التكيف مع متلازمة العش الفارغ

في حاله الإحساس بالوحدة بعد ما الأولاد يسيبوا البيت لأي سبب  فيه اكتر من وسيلة عشان نتعايش مع الوضع الجديد.

1– تعايش مع الوقت  البعد عن مقارنه التصرفات للطفل او الابن أو الابنة في المواقف بالتوقعات اللي بيضعها الآباء ومن الأفضل مساندة الطفل انه يكون ناجح في حياته خارج البيت .

2– الحافظ على التواصل مع الأولاد ممكن الوالدين يضلوا قريبين من عيالهم من خلال التواصل بكل الطرق الجديدة والقديمة الزيارات التليفونات النت برامج التواصل الاجتماعي وغيرها من طرق التواصل.

3– التمس الدعم:  فكرة محاوله الحصول علي الدعم من الخارج بعد ما البيت يبقي فاضي بتساعد في التكيف مع الوضع الجديد  والدعم ممكن يجي من الأصدقاء القريبين من الوالدين ولكن لو الموضوع تطور لمرحلة الاكتئاب من الأفضل استشارة دكتور نفسي .

ممكن تعرف معلومات تانيه عن الاكتئاب النفسي : أحياناً مرض وأحياناً عرض وليه أنواع كتير

4-كن إيجابي علي طول: التفكير في استغلال الوقت والمجهود اللي كان موجهه لرعاية الأطفال ممكن نحوله لشئ ايجابي من خلال توجيهه للرعاية الشخصية ورعاية الطرف الأخر بكده ممكن يكون عامل مساعد للتكيف مع الوضع .

تجنب متلازمة العش الفارغ

عشان نتجنب الوقوع في المشاعر السلبية اللي بتيجي بسبب متلازمة العش الفارغ لو فيه حد من العيال أو أخر طفل بالبيت هيمشي قريب فمن الأفضل أن يتم التخطيط للوضع الجديد من بدري بحيث انه لما يبقي أمر واقع يكون ضرره أو تأثيره اقل عشان كده البحث عن فرصه شغل جديدة تناسب السن والعمر الحالي للطرفين بيكون مناسب عشان يكون بديل يستغل فيه الوقت اللي كان موجهه للأطفال بهدف التغلب علي الوحدة .