أهم 9 نصايح عشان تعرف تتعامل مع اضطراب الشخصية الحدي
لو تم تشخيصك إن إنت عندك اضطراب الشخصية الحدي ، طبيعي جداً إنك تحس إن كل يوم هو تحدي جديد. تحدي ضد نفسك. لكن في الحقيقة في حاجات عملية كتير جداً ممكن تعملهـا عشان تساعد نفسك بنفسك.
الخبر الكويس إن مع الوقت بتفهم نفسك أكتر وبتقدر تتعامل مع نفسك بطريقة أحسن وبتقدر تتعامل مع الأعراض والمشاكل النفسية اللي بتقابلك بسبب اضطراب الشخصية الحدي.
أول حاجة لازم تعملهـا إنك ما تتكسفش. كونك اتشخصت باضطراب ده في حد ذاته حاجة كويسة على فكرة. ببساطة لأنك أخيراً عرفت إن اللي المشاعر السلبية الكتير واللخبطة اللي إنت بتحس بيها دي ليها إسم وتشخيص. عالأقل دلوقتي تقدر تعذر نفسك على كل قرار غلط اتسبب فيها الاضطراب ده .. زائد كمـان إنك مش لوحدك اضطراب الشخصية الحدي منتشر بشكل كبير جداً. وده طبقاً لإحصائيات النـاس اللي اتشخصت بالاضطراب فما بالك باللي ماشملهـمش الاحصائيات؟
ثانيًا: الناس اللي عندهم اضطراب الشخصية الحدي بيميلوا إنهـم يأذوا نفسهم. الغلطة اللي بتعملها إنك بتعتمد على الناس التانية عشان يمنعوا الأذى ده عنك وده مش صح. الأذى جـاي منك إنت ومافيش غيرك إنت هايمنع الأذى ده عنك. فماتعتمدش على حد عشان الموضوع ده مش عملي بتاتاً.
ثالثًا: راقب المُحفزات اللي بتزود الرغبة عندك إنك تأذي نفسك. المُحفزات دي ممكن تبقى أي حاجة: الناس، الحالات النفسية، الاعياد، المناسبات، الأماكن، أفكار محددة، الخ.. لازم يبقى معاك ورقة وقلم وتكتب فيهـا الحاجات دي عشان تنتاقشها مع المعالج أو عالأقل عشان تتفاداها على قد ما تقدر.
رابعًا: زي ما كتبت المُحفزات، حاول تكتب جنبهـا أو في أي حتة تانية يعني .. الحاجات اللي خلتك تفصل من المُحفزات دي، الحاجات اللي شتت انتباهك وتراجعت عن أفكارك السلبية. إكتبهم برضه عشان تناقشهم مع المعالج بتاعك أو عالأقل عشان تلجألهم.
خامسًا: إلعب مزيكـا أو عالأقل إسمع مزيكا.. والنوع اللي بتلعبه أو بتسمعه لازم يبقى معاكس لحالتك النفسية .. بمعني لو متضايق إسمع حاجة فرايحي .. ولو حاسس بقلق وتوتر شغل مزيكا هادية.
سادسًا: إعمل حاجة.. لازم تعمل حاجة إنت بتحبها وتلتزم بيها.. أياً كانت إيه الحاجة دي. إتمشى، إقرا، اشترك في نشاط ما، ارقص، إكتب، نضف البيت، الخ.. المُهم تكون الحاجة اللي انت بتعملها متطلبه منك حس مشاركة عالي .. يعني بلاش تليفزيون وكمبيوتر وموبايل، الخ..
سابعًا: لو عندك إحساس بالإنعزال مسيطر عليك دلوقتي .. حاول تعمل أي نشاط ليه علاقة بالواقع اللي إنت فيه .. لو في البيت إمسك حتة تلج وسيبها تسيح على إيدك .. لو في الشارع أتكلم مع حد ياكش تسئله الساعة كام .. اشتري حاجة من الكشك، دي، ساعد حد، إعمل أي حاجة فيها صفتين “تفصلك عن الإحساس السلبي ده، ويكون ليها علاقة بالواقع”
ثامنًا: في حالة إن عندك مشاعر انتحارية (ومنها إنك عايز تأذي نفسك لازم تطلب مساعدة من حد متخصص فوراً .. أو تكلمه في التليفون. ماتتكسفش ده هدفه أصلاً.
تاسعًا: لحد ما يبقى في تواصل بينك وبين المعالج بتاعك حاول تتعامل مع المشاعر السلبية بتاعتك:
لو متضايق ومتعصب وحاسس إنك مش مرتاح: قطع جرنان، إضرب مخدة، كسر قطع تلج في البانيو، الخ..
لو مكتئب ومتضايق وحاسس إنك لوحدك: اتفرج على حاجة بتحبهـا في التليفزرون أو عالنت، إسمع مزيكا بتحبهـا، إعمل حاجة بتحبها في المطلق، اكتب كل مشاعرك السلبية فـ ورقة وقطعها.
لو متوتر وقلقان ومضغوط: إعمل كوباية كاكاو دافية أو أي مشروب إنت بتحبه ومزمز فيه، إعمل تمرين التنفس (عشر مرات شهيق جامد، وفي كل مرة زفير بطئ)، خد دش دافي طويل شوية.
لو حاسس إنك عايز تأذي نفسك: حط حتة تلج عالمكان اللي عايز تأذي نفسك فيه.. الفكرة إن التلجة هاتأذيك بس مش هاتعلم والأذى مش هايدوم، فاتبقى ضربت عصفورين بحجر، خد حمام بارد جداً، إلزق حتة بلاستر على مكان في جسمك وشيلها بسرعة أو بطيئ براحتك.
طبعاً دي نقط سريعة عشـان تتعامل مع هجمة لحد ماتوصل لعناية طبية متخصصة مش وصفات طبية ولا علاج.
طيب إيه اللي ممكن تعمله عشان تقلل اضطراب الشخصية الحدي عالمدى البعيد؟
- تتكلم مع صحابك وعيلتك أكتر
- لازم تبقى عارف هاتعمل إيه لما تتعب (إعمل ليسته)
- دور على اللي زيك واتكلم معاه
- نام كويس جداً عشان يبقى عندك طاقة
- العب رياضة لانها بتلعب دور كبير في تحسين الحالة النفسية
- العب مزيكا أو مارس أي هواية
- اختار حد من اللي بتعرفهم بتحب / بتعرف تتكلم معاه عشان تشاركه افكارك دايماً
