اضطراب ما بعد الصدمة  أو اضطراب الكرب التالي للصدمة أو الـ PTSD هو نوع من أنواع المرض النفسي اللي لازم يسبقه حادث واحد (صدمة) على الأقل أو عدة حوادث كارثية أو تهديدات مش عادية. و “مش عادية” هنا معناها إنهـا تتعدى التهديدات اللي بتحصلنـا كل يوم في الشارع.. زي تهديدات بالقتل، تهديدات بفقد أي حاجة وأي حد عزيز علينا، الخ..

التهديدات دي مش لازم تبقى موجهة للشخص نفسه وإنما ممكن تبقى لحدث شافه قدامه زي أعمال العنف مثلأً اللي حصلت بعد ثورة يناير، أو زي إن حد يتهدد بالقتل قدامه، أو إنه يشهد حادث اغتصاب مثلاً أو حتى تهديد ليه، الناس اللي راجعة من الحرب من أكتر الناس اللي معرضه لـ اضطراب ما بعد الصدمة.

زمان قبل ما يتم تشخيص المرض بالإسم ده كان بيتقال عليه تعب المعركة أو Combat Fatigues واُطلق على الجنود اللي راجعين بمشاكل نفسية من الحرب العالمية التانية.

زمان بس مش قوي كدة .. كان بيتم تصنيف اضطراب ما بعد الصدمة على إنه اكتئاب نفسي لحد ماخرج من تحت عبايته وبقى مرض لوحده لأن تشخيصه وأسبابه وطرق علاجة مختلفة كتير عن الاكتئاب.

اضطراب ما بعد الصدمة ممكن يبقى نتيجة هرمونات وراثية برضه .. وزي المرض العضوي بالظبط، بيفضل كامن ومش محتاج علاج لحد ما يحصل حاجة تفوقه عند المريض وفي حالتنا هنا هي الصدمة النفسية.. اللي بيختلف احتمالها من شخص لآخر على حسب هو عنده ضعف في الحتة دي ولا لأ.

أعراض اضطراب ما بعد الصدمة: الأعراض النفسية والجسدية بتظهر عادة في خلال 6 شهور بعد الصدمة النفسية. يعني لو المريض جاله اكتئاب بعد سنتين صعب شوية نصنفه اضطراب ما بعد الصدمة. لازم الحدث الصادم اللي اتعرضله يكون أثر على فهم الشخص لنفسه والعالم اللي حواليه وده بالتالي بيولد عنده إحساس بالضعف والعجز والكآبـة.

إيه هي أعراض اضطراب ما بعد الصدمة

أولاً لازم نبقى متفقين إن الشخص يبقى اتعرض لحادثة تهديدها استثنائي أو كارثي على مدى مدة قصيرة أو طويلة. وإن الحدثة اللي اتعرضلها دي المفروض إنهـا منطقياً لو حصلت لشخص تاني كان هايجيله حالة من اليأس. عشان نقدر نبتدي نشك في اضطراب ما بعد الصدمة.

في أعراض غالباً بتيجي مع بعضهـا

1. إنه يبقى مصدوم ويفضل يفتكر الحدثة باستمرار، سواء عن طريق الكلام أو الأحلام / الكوابيس أو أفكار ومشاهد بذكريات الحادثة.
2. إنه يحس بعجز أو ألم لما يمر بحاجة شبه الحادثة دي
3. إنه يوصل بالشخص إنه يتجنب الظروف (القائمة بالفعل أو اللي احتمال تحصل) اللي تشبه ظروف الصدمة النفسية دي.

وفي عرض مُهم جداً في عمليه التشخيص

• إنه يحصله عجز جزئي أو كامل إنه يتذكر حاجة من الحاجات المهمة في التجربة اللي عدى فيهـا
• حدث أساسي زي صعب يتنسي: إنه مايفتكرش حادثة العربية كانت فين مثلاً
• حدث عادي ممكن ينساه: إسم الظابط اللي كتب محضر الحادثة مثلاً

أعراض مستمرة غالباً بييجي 2 منهـا في نفس الوقت

• صعوبة الدخول في النوم، أو الأرق
• زيادة الاحساس بالخوف
• التحفز واليقظة المفرطة
• صعوبة في التركيز
• الهيجان ونوبات الغضب

وفي شوية أعراض عامة زي:

• الانسحاب والانعزال من المجتمع
• برود عاطفي
• لامبالاة

مضاعفات اضطراب ما بعد الصدمة

اتفقنا فوق إن اضطراب ما بعد الصدمة يعتبر نتيجة للصدمة النفسية اللي بيمر بيها البني آدم .. لكن المشكلة ممكن تكبر وتخش فـ مضاعفات لا قدّر الله زي:

• اضطراب التوتر الحاد
• اضطراب التكيُف
• اضطرابات فصامية
• اضطرابات الألم المزمن
• اضطرابات الشخصية الحدية
• اضطراب الشخصية المعادية للمجتمع.
• اضطرابات الأكل
• تغيرات في الشخصية
• الكآبة
• إدمان المخدرات
• الهلوسة وتوهم المرض
• فقدان الذاكرة الجزئي
• محاولات الانتحار

في أعراض محددة عند الأطفال ضحايا العنف الجنسي وهي:

• التبول أو التغوط اللاإرادي (لما يكون الطفل خلاص اتعود يتحكم في الإخراج لوحده بقاله فترة)
• سلوك جنسي غير مألوف للطفل
• اللعب الجنسي اللي مش مناسب لعمر الطفل

العلاج المتوفر لـ اضطراب ما بعد الصدمة

• العلاج السلوكي المعرفي: لعلاج آثار الصدمة على الإنسان، ومساعدته على التكيف مع الصدمة من خلال تقليل الأفكار السلبية الجديدة اللي ممكن تجيله نتيجة تعرضه لصدمة معينة.
• العلاج النفسي التخيلي: اتأيف مخصوص عشان يعالج اضطرابات ما بعد الصدمة.
• العلاج النفسي العصبي: وده بيقوم على عزل ذاكرة الصدمة الضمنية لأنها السبب الرئيسي لإجهادات ما بعد الصدمة، وهو مزيج من كذا تكنيك تاني أهمهم العلاج المعرفي السلوكي.
• العلاج الدوائي: اللي بيوصفوا الدكتور وفي الأغلب بيبقى مضاد اكتئاب بيقوم على سد المستقبلات Receptors من نوع الفا 2 الموجودة في الدماغ. انسداد المستقبلات دي يزيد من نسبة النورابينفرين في الدماغ بالاضافة إنه يزود افراز السيروتونين وبيقلل امتصاصه فبيستمر فترة أطول.