۹ حاجات هايساعدوك تتغلب على اضطراب القلق الاجتماعي
مبدئياً، لو عندك خلط بين اضطراب القلق الاجتماعي والانطوائية يبقى مكانك مش هنا.. لو بتقوم بتشخيص الأعراض اللي عندك على إنهـا كسوف وانك شخص مش اجتماعي فده وارد.. إنمـا لو عندك اضطراب القلق الاجتماعي فحابين نقولك إن أكبر جريمة بترتكبها في حق نفسك إنك تتهم نفسك اتهامات غلط.
اضطراب القلق الاجتماعي أو “السوشيال فوبيا” أعراضه واضحة وصريحة. يمكن بيشترك مع أمراض نفسية تانية في أعراضه إنمـا مابيشتركش في أعراضه مع حاجات عادية كلنـا بنحس بيهـا.
تشخيصك باضطراب القلق الاجتماعي لازم يبقى عن طريق حد متخصص سواء دكتور نفسي أو أخصائي نفسي وماينفعش تشخص نفسك بنفسك لأنه زي ما قلنـا في حاجات كتير كلنـا بنحس بيهـا بدرجات مختلفة وصعب جداً تشخص نفسك بمجرد القراية أو السمع.
إيه الفرق بين اضطراب القلق الاجتماعي والكسوف؟
- أولاً: كل اللي عنده سوشيال فوبيا هايبقى مش اجتمـاعي ولكن العكس غير صحيح، وده اللي بيعمل لخبطة عند الناس.
- ثانياً: اضطراب القلق الاجتماعي دايماً أسبابه مش منطقية أو ضعيفة جداً زي مثلاً إنك تبقى ماشي في الشارع وحاسس إن كل النـاس مراقبينك مع إن ده مش منطقي.
- ثالثاً: الاضطراب بيبـان جداً في المواقف اللي كل النـاس بتتوتر فيهـا، زي إنك تقف تتكلم قدام عدد كبير من الناس.
- رابعاً: اضطراب القلق الاجتماعي بيتميز بكشل كبير قوي إنه بيعطلك عن ممارسة حياتك الطبيعية. يعني ممكن جداً يخليك تتجنب تقابل حد جديد أو إنك تقدم لشغل جديد أو إنك تستقبل مكالمة تليفون مُهمة.
إيه اللي المفروض تعمله لو اتشخصت بـ اضطراب القلق الاجتماعي ؟
- تمرينات التنفس (آه اللي معظم الناس بتتريق عليها دي) دورهـا أصلاً إنهـا تنظم ضغط الدم في جسمك وبالتالي في دماغك وتهدي شوية من كمية الأفكار السلبية اللي بتجيلك.
- لازم تشتغل على نفسك مع حد متخصص لمدة تلات شهور تقريباً، تروح تقابل حد جديد وتيجي تحكيله على اللي حصل، تعمل اجتمـاع مع ناس كتير وترجع تحكيله على اللي حصل، وهكذا..
- خد بالك إن أسوأ حاجة ممكن تعملها هي إنك تنكر إن عندك سوشيال فوبيا. لأن كل ما بترفض تعترف بالحقيقة دي كل ما المرض ده بيتمكن منـك، وتبتدي تدي لنفسك أعذار ومبررات تخليك مستريح مكان مانت واقف.
- وبرضه مش كل شوية تفكر نفسك: أصل أنا عندي سوشيال فوبيا، أنا عندي سوشيال فوبيا، أنا عندي سوشيـ….! لازم تمسك العصاية من النص. بص الموضوع بسيط: لما تلاقي نفسك حاولت تتغلب على القلق ده وماقدرتش إفتكر إن عندك مرض إسمه سوشيال فوبيا عشان تحمي نفسك من الإحساس الكاذب بالفشل والملامة.
- لكن ماتقولش أنا مش هحاول أعمل كذا عشان أنا عندي سوشيال فوبيا. فهمت الفرق؟ لو مافهمتش إبعتلنا تعليق تحت.
- إلعب لعبة مسلية جداً جربها ومش هاتندم: لما تقابل حد غريب تخيل إنه صاحبك من زمـان.. بس متأفورش يعني 😉 لو حد إسمه محمد تخيل إنه هو هو محمد بتاع المدرسة وابتدي اتعامل معاه على هذا الأساس بس بدون الدخول في تفاصيل محمد بتاع المدرسة فعلاً .. مش هانتجنن إحنا عشان نتعالج من السوشيال فوبيا يعني 🙄
- في لعبة تانية أسهل شوية: لما تبقى داخل على موقف جديد مُرهق بالنسبالك زي مكالمة تليفون مثلاً لحد ماتعرفوش.. حاول تشبهه بمكالمة شبهها عملتهـا قبل كدة.. بكدة إنت تقريباً بتستنتج النتيجة بتاعت المكالمة وهاتلاقي إنهـا مش هاتختلف كتير عن نتجية المكالمة اللي عملتها قبلها وده حقيقي بالمناسبة.
- إقفش الأفكار السلبية بسرعة: الموضوع ده محتاج تمرين وده اللي هايساعدك فيه الأخصائي اللي إنت بتتابع معاه. كل ما قدرت تحلل الأفكار السلبية بسرعة (أو عالأقل تنفضلهـا) كل ما قدرت تتغلب عليها أسهل.. والعكس للأسف صحيح. صاحبك اللي ماردش على رسالتك اللي بعتهـاله من نص ساعة وارد يبقى مزنوق فـ اجتماع بس إنت هايجيلك خمستلاف فكرة سلبية تانية غير دي أنا عارف. قدامك حل من الاتنين: يا تمنطق الفكرة “بسرعة” يا تلهـي نفسك وتعمل أي حاجة تانية.
- فيه حاجات كتير عشان تتحايل على اضطراب القلق الاجتماعي ، بس الحيل دي وانت بتنفذهـا مش هايبقى ليهـا أي تأثير إيجابي على المدى الطويل إلا لو قعدت حللت اللي حصل وحطيت إيدك على المشكلة فعلاً اللي إنت قدرت تحلهـا. أقولهالك بطريقة تانية: لو ضحكت على نفسك مرة عشان تعرف تعمل اجتماع كويس من غير ما تتربك وتتلخبط.. فإنت بتعمل كد “بتضحك على نفسك يعني” عشان تثبت لنفسك إنك تقدر تتغلب على قلقك ده. مش عشان تاخدهـا إسلوب حياة، لأنه مش هاينفع تعمل كدة فـ كل حاجة.. إنت محتاج توصل للمنبع مش تعالج العَرَض بس.
- حاجة أخيره: بخصوص النصايح اللي من عينة “تخيل إنك كذا أو تخيل إن الموقف كذا” .. هي ممكن تبان حاجة صعبة ومش منطقية .. بس خد بالك إن أصلاً مشكلة أمراض القلق إنهـا بتخلي البني آدم يتخيل حاجات مش منطقية.. فهي تبان صعبة أو مالهـاش فايدة حقيقية إنمـا لو فهمت إن مرضك أصلاً عبار عن أوهام مش منطقية هاتفهم هي ليه لازم ماتبقاش صعبة وليه ليها فايدة حقيقية.
