انتهاك جنسي في مكان العمل : ازاي تتعاملي مع مديرك البصباص
مكان الشغل هو أمن مكان بتحسي أنه مش هتتعرضي لأي انتهاك جنسي فيه، رغم ذلك ممكن تقابلي انتهاكات من قبل مديرك أو زميل ليكي في الشغل، طيب هتسكتي ولا هتسيبي الشغل؟ ولا دا ولا دي، هتواجهي، لأنك قوية ودا شغلك إلي لازم تدافعي عنه
ليه بيحصل انتهاك جنسي
- وارد إن اللي بيعمل كدا يبقى شخص مش سوي ده احتمـال لازم تحطيه في دمـاغك
- شخص معندهوش ثقة في نفسه أنه يبني علاقة سوية من خلال الزواج عشان كدا بيستغل أي فرصة خارج أطار الزواج يعمل بيها كدا
- زوجته مطلعة عينه ومسيطرة عليه وقرفاه في عيشته وجاي يطلع دا على عينك أنتي
- عنده سلطة ونفوذ وحابب يستغلهم لتلبيه أغراضه
- شخص مريض بكل المقاييس وجبان أنه يعترف بمرضه وبيخرجه في شكل انتهاكات وتحرشات بتوصل لمكان شغله
أقري كمان عن الانتهاك وشخصيته من هنا الانتهاك الجنسي : أسبابه وأعراضه وإزاي الجاني مجني عليه أصلاً
ازاي تواجهي أي انتهاك جنسي في مكان الشغل
الرفض :
- ممنوع كلام حلو وممنوع كلام خارج الشغل ، وضحي دائماً أن دا مكان شغل وبس ومفيش أي حاجة بينكوا غير كدا
- ممنوع مكالمات خارج الشغل وفي وقت متأخر
- بلاش تسيبيه يتجاوز مساحته الشخصية في الحركة، خلي دائماً في مساحة بينك وبينه حتى وأنتو قاعدين
- مافيش العزومات برا الشغل وممنوع الهدايا من غير مناسبة هو مش ابن خالتك
- أوعي تفكري تهربي ومتواجهيش الموقف
- إنسي تماماً أنك تسيبي شغلك، الحق معاكي أنتي
- حاولي ماتبقيش معاه لوحدكم في أي مكان حتى لو المكتب، خلي في مساحة كافية والباب مفتوح وتقصري الكلام معاه وأنتو لوحدكم
الحدود : لكل حاجة حدود للهزار والكلام وحتى لو كلام على الشغل وهزار عليه كله بحدود
طرف ثالث : خلي معاكي دائماً زميلتك في الشغل وأنتي قاعدة تبقى معاكي في مكتبك، وأنتي مروحة تبقى معاكي وهي هتفهم أنه بيحاول يضايقك
خليكي لماحة : الست عندها حاسة سادسة بتحس لو الكلام عادي فعلاً ولا ليه أكثر من قصد تاني وفيه نيه سيئة وحاجة مش مظبوطة، بتحس بالخوف قبل أي حاجة وعشان كدا صدقي أحساسك وأوعي تتجاهلي أحساسك دا
المواجهة : بدأ يتعدى حدودة وحركاتة، علي صوتك والتهديد بأنك هتعلي صوتك لحد ما الموظفين تتلم ومش كدا وبس خلي معاكي رقم حد من بيته أهله، زوجته وقوليله أنك هتتصلي بيها لو مبطلش تصرفاته دي وهتوصلي الموضوع للجهه الأعلى منه وهيخسر شغله
الثقة بالنفس : خليكي واثقة في نفسك مش مترددة ولا خايفة وأنتي قصادة واثقة أنك على حق وأنه مجرم وتبقى عينك في عينه وتبرقي، أوعي عينك تنكسر قصاده، أنتي على حق وهو إلي مفروض يخاف مش أنتي، متتكسفيش أنك تتكلمي، ثقي في نفسك أنك الضحية مش هو وحتى لو محدش وقف جمبك يكفي أن دا حقك وأنتي بتدافعي عنه
شاركينا بأحسن الطرق للتعامل في المواقف إلي زي دي عشان غيرك تستفيد!
