هوس الثرثرة : ليه بنرغي كتير فالـ presentation والحل

معظمنا عنده مشكلة في الـpresentation، بيفضل يرغي كتير،زيادة عن اللزوم وعن الفكرة إلي هو عايز يوصلها، لأن قلقه بيتشكل في شكل ” هوس الثرثرة “، أنه حابب يعبر عن نفسه وعن أفكاره ويقنعك بيها، لكنه بيبالغ في أقناعه وتأكيده ورغيه!

أحنا ليه بيجلنا ” هوس الثرثرة ” وقت الـpresentation

1-الخوف والقلق والتوتر : بيخليك يا تسكت خالص يا تتكلم كتير عشان تقلل التوتر 

2- تأكيد فكرتك: عايز تأكد فكرتك فبتفضل تقول أكثر من مثال وتعيد الشرح بأكثر من صيغة وتسأل فهمت فهمت؟

3-تضيع وقت: بتحاول تخلص وقتك لأنك مجهزتش كويس فبتملى بأي كلام وأي دش يجي في بالك

4- قلة تحضير : مقرتش عن إلي بتتكلم عنه كويس وبالتالي محضرتش كلام يكفي الوقت إلي هتعرض فيه

حل مشكلة ” هوس الثرثرة ” وقت الـpresentation

التجهيز

1- حدد هدفك :

عوزة أعمل برزنتشن ليه؟ هعرض وهقدم أيه، مقابلة شغل ولا أنا مدرب وهشرح أو حتى مشروع بتتكلم عنه

2-جمع معلوماتك :

العرض هيبدأ أمتى وهينتهي أمتى، هيكون قصاد مين، هتتكلم فيه عن أيه، الجو العام رسمي ولا مشروع بين صحاب ولا عاوز تقول حاجة لحد من غير ما ترغي ويفهمك بسرعة

3- الأهم ثم المهم :

رتب معلوماتك إلي هتقولها من الأكثر أهمية لأقل أهمية، الناس بتركز في أول 7 دقايق وبعد كدا التركيز بيقل، وأحذف الزيادات والتوضيح الزيادة والتأكيد إلي ملوش لزوم

4- نظم وقتك:

نظم كل حاجة هتقول المقدمة في أد أيه، الكلام الدسم إلي في النص هيأخد أد أيه، هتختم في أد أيه، أكتب كل حاجة فيهم محتاجة أد أيه بالكلام بتاعها جمبها

5- التدريب :

أدرب كتير قصاد المرآيه وقصاد عيلتك وسجل لنفسك حتى لو كان غرض العرض أنك تعرض وجهة نظرك لحد ويفهمك بسرعة، سجل وكل ما تحس بكلام مش مفهوم عيدة بصيغة تانية لحد ما تحس أن كلامك مناسب وبعدين أدرب أنك تتكلم مع الحركة إلي تناسب الكلام، وبعدين أدرب على نبرة الصوت متبقاش واحده عشان الملل يروح

6- ظبط ساعتك البيولوجية : نام بدري وأصحى بدري عشان عقلك يبقى رايق وهادي

وقت البرزنتشن

1- اللبان : من العوامل النفسية إلي بتخلينا نفك أي توتر ونهدى هو الأكل وعشان كدا خلي لبانه في بوقك قبل العرض بثواني لحد ما الناس تيجي عشان تهيىء مخك أن الوضع عادي أحنا في أمان وبنأكل وزي الفل

2- ظبط النفس : خد نفس طويل وخرجة بهدوء

3- الثقة بالنفس : أقف في النص فارد جسمك متحطتش أيدك ورا ظهرك ولا تخاف الوضع عادي، وقفة الثقة هتحسسك أن الوضع عادي وأنت شخص برنس وعلى وضعك مش محتاج تقول كلام كتير عشان تأكد فكرتك، صوتك واثق واضح وهادي وفيه تلوين بين نبراته تهدي شوية وتعلي شوية، أقرا المقال دا كمان 7 حاجات سريعة جداً تظهرك واثق من نفسك

4-التركيز: كل تركيزك أنك هتقول بس الكلام إلي مظبط وقتك وتدريبك عليه لا أكثر ولا أقل

5- بلاش أسئلة جانبية : أول ما حد يسألك سؤال ملوش علاقة بالموضوع وأنت ماشاء الله متتوصاش ما هتصدق ترغي في أي حاجة أمسك نفسك وقوله نأجلها لما نخلص طيب

6- أدي فرصة للرد : أدي فرصة للناس تسأل وتقولك رأيها، بس ردك يبقى بأختصار أنت ملتزم بوقت

7- فيد باك: بعد ما تخلص خد رأي الناس في كلامك وهل حسوا بأن المعلومة وصلت ولا كان فيه رغي زيادة عن اللازم وأكتب الملاحظات دي وأبدأ غير فيها لحد ما المرة الجاية

قولولنا لو جربتوا حاجة منهم أو تعرفوا طريقة جديدة؟