اضطراب ثنائي القطب (وبيقولوا عليه برضه الاضطراب ذو الاتجاهين أو الاضطراب الوجداني ثنائي القطب أو الهوس الاكتئابي) وهو واحد من الاضطرابات النفسية اللي بيحصل فيها فترات من الكآبة وفترات من الابتهاج الغير الطبيعي وبيختلف عن الابتهاج الطبيعي لانها ممكن تخلي الشخص يعمل حاجات طايشة وغير مسؤولة أحياناً.

الاضطراب الثنائي القطب أو الـ Biopolar Disorder منتشر أكتر في الستات عن الرجالة ومن الأمراض اللي بتهدى شوية مع التقدم في السن. النوع ده من الاضطراب في أغلب الأحيان بيكون بسبب عامل وراثي أو بسبب الظروف الحياتية اللي مر بيها المريض من أهمها الإجهاد النفسي المستمر.

اضطراب ثنائي القطب ليه أربع أنواع

النوع الأول :Bipolar I: في النوع ده بيحصل حالة هوس تدوم لمدة أكتر من سبع أيام على الأقل.  في بعض الحالات بيحصلها حالة هوس فقط، في حين إن معظم الحالات بتعاني من حالات كآبة أكثر من الهوس. حالات الهوس لو ماتعالجتش بطريقة صحيحة ممكن تدوم لمدة من 3 لـ6 أشهر، أما حالات الاكتئاب فـ بتحتاج فترة أطول لو بتتعالج بالعلاج النفسي فقط، قول من 6 لـ 12 شهر.

النوع الثاني: Bipolar II: في النوع ده بيحصل حالة اكتئاب شديدة مع حالة هوس خفيف.

 تغير المزاج السريع: عشان يتصنف المرض ده لازم تظهر أربع حالات في الفترة خلال 12 شهر.

اضطراب المزاج الدوري: يعتبر اظطراب خفيف لأن تغبر المزاج مش شديد زي الحالات واحد واتنين إنمـا بتدوم لفترة أطول منهم.

إيه هي أعراض اضطراب ثنائي القطب ؟

• الاكتئاب، المزاجية أو المودية يعني، عدم الاستقرار، ارتفاع المزاج بشكل غير طبيعي بالنسبة للموقف
• الكلام بسرعة كبيرة جداُ مع تغيير القاعدة
• يا بيفقد الطاقة بسرعة يا عنده زيادة كبيرة في الطاقة
• في تغيرات كبيرة في الشهية والوزن
• اضطرابات في النوم
• بيهمل في العناية بنفسه
• انطوائية جامدة أو اجتماعية زايدة عن الحد
• بيحس بالذنب بسهولة ومعندوش أمل في الحياة
• عنده إحساس إنه مالوش قيمة اوالعكس
• سلوكه متهور أحياناً زي إنه يصرف فلوس كتير فجأة
• ممكن يبقى عنده ميول للانحراف الجنسي
• عنده أفكار واعتقادات مضطربة وشاذة حبتين
• الموت ومحاولات الانتحار مسيطرة على تفكيره

العلاج:

بشكل عام في أنواع معينة من العلاجات زي العلاج السلوكي المعرفي وعلاج الإيقاع الشخصي المتناسق وعلاج التنظيم العائلي وكمان في أدوية كتير ممكن تتاخد عشان تساعد المريض إنه يستجيب للعلاج ويتحسن بشكل أسرع.