دور العيلة السليمة لاستقرارك النفسي
العيلة مش مُجرد اسم بيتقال كِدة وخلاص، الرابط اللي بين أفراد العيلة رابط مش هتلاقيه برا بين صُحابك لإن رابط الدم أقوي من أي رابط تاني، ده ميمنعش إن فيه عائلات منفصلة والواحد مش بيرتاح فيها ولكن في حالة إن العيلة بتكون مترابطة وكل أفرادها خايفين على بعض بتكون العيلة هي المُفتاح الأول والأهم في استقرارك النفسي وصحتك العقلية.
ليه العيلة هما أهم مُفتاح في رحلة العِلاج النفسي والعقلي؟
الأبحاث أثبتت إن وجود عائلة مُستقرة بيساوي وجود شخص مُستقر، وده لإن جو العيلة بيأثر بالسَلب أو الإيجاب على شخصية الأفراد اللي موجودين فيها، وخاصة لو فرد بيعاني من مرض نفسي أو عقلي فوجوده في عيلة داعِمة ليه ومتقبلاه هو أكبر جُزء في علاجه أما وجوده في عائلة مُشتتة ومش مُدركة ألمه ومُعاناته هو سبيل انتكاسه وطول رِحلة علاجه أو استحالتها.
ودليل الأبحاث دي هو إن شعور الإنسان بيتكون من تعامل أقرب الناس ليه، فلو حسّ بالرفض أو النفور من اللي من دمه بيفكّر إن خلاص محدش هيحبه تاني أو هيقبله فبيكون عصبي ومتوتر في علاقاته الخارجية.
والدعم النفسي للعيلة بيظهر في أكتر من صورة:
الوجود الدايم
وجود أُسرة متفاهمة ومُتفهمة لوجود فرد منهم بيعاني بيخلي رحلة علاجه أسهل بكتير، فبيدعموه بكلامهم ووجودهم حتى بحضورهم لجلسات العلاج النفسي معاهم، وده بيفيد الطرفين، بيفيد الطرف اللي بيعاني بالأمان والاستقرار وإنه مقبول وفيه في علاجه أمل وبيفيد العيلة في طريقة تعاملها بالصورة اللي تناسب حالته.
تحسين العلاقات
وجود مرض نفسي عند أي حد بيعمل فجوة بينه وبين كل اللي حواليه، ولكن وجود العيلة في ضهره بيخليه يتعامل مع مرضه ومع نفسيته بشكل أفضل ولا يخسر علاقته بحد بيحبه ولا بيهم ولا حتى بنفسه.
الدعم
لما بيكون الإنسان متطمّن إنه لما يغلط هيلاقي اللي يساعده بيكون عايش حياته من غير خوف وقلق، وده اللي العائلات المُتفاهمة بيعملوه مع ولادهم، فوجود أب وأم مُتسامحين ومُستمعين بشكل جيد لولادهم بيبعد عنهم من الأساس إنهم يكدبوا لو غلطوا أو يصلحوا الغلط بغلط لإنهم خايفين من العقاب.
الإشراف بحُب
أهم حاجة في وجود العيلة جنبك إنهم يكونوا شايفين بتعمل إيه وبيوجهوك بحُكم خبرتهم وسِنهم، ممكن يكون إشراف بعض العائلات على ولادهم نوع من أنواع التسلُط ولكن وجود الإشراف بصَنعة الحُب واللطف والخوف الحقيقي على الأولاد بيخلي الشخص مرتاح نفسيًا ومتطمن ومش حاسس إنه متقيد أو إن حد بيراقبه وواقفله عالغلطة، وفي نفس الوقت ده بيضمن للعيلة الحفاظ على أفرادها من أي غلط أو طريق سد أو مرض أو أي حاجة وحشة ممكن تصيبهم لإنهم معاهم خطوة بخطوة من الأول.
