التوتر والقلق مضيعين من عينك النوم؟ هنقولك تعمل ايه
التوتر والقلق مضيعين من عينك النوم؟ إحنا هنساعدك تنام وانت حاسس بيهم.
وانت رايح في مشاكل التوتر والقلق والأرق، كُنا إحنا راجعين عشان كدة جايين نديك نصايح تساعدك تتجاوز الأيام اللي فيها ضغط شغل أو مشاكل بتفضل مأثرة عليك لحد وقت النوم، عايزينك تفهم بس إن القلق بيجيب قلة النوم وقلة النوم بتزود القلق، لإنك في الحالتين دماغك مش بتقف، بس لو عرفت العلاقة بينهم وفصلت ده عن ده هتقدر تتعامل صح وتتجاوز المشكلة دي.
المحتويــات
إيه اللي بيحصل لدماغنا لما بنحس بالقلق؟
اللي بيتحكم في دماغنا هي اللوزة الدماغية ودي اللي بتنشط لما بيكون فيه استجابة مُعينة لازم الجسم ياخدها سواء هنتخانق أو هنهرب من حاجة، بس لما بتحس بقلق بقى بتتضاءل الاستجابة الأولية للوزة الدماغية فالتفكير بيكون بطئ جدًا، لكن في حالة الإجهاد المُزمن بيكون العقل في حالة عالية جدًا من اليقظة عشان يعرف يواجه الإجهاد اللي بيحصل ولكن الأثر ده بيظهر في صور تانية زي ألم العضلات وسرعة التنفس وزيادة ضربات القلب وأبرز عرض بيكون اضطرابات النوم.
طيب إزاي تتخلص من التوتر والقلق وتحسّن نومك؟
التحضير للنوم الهادي المُريح بيبدأ من بدري جدًا من قبل ما تفكر تنام بكتير، يُعتبر كدة من أول اليوم، ودي النصايح اللي هتساعدك لو اتبعتها:
- نصايح خلال اليوم
- افهم انت بتعاني من ايه بالظبط: القلق جُزء طبيعي من التجربة الإنسانية هتعدي بيها يعني هتعدي بيها، بس حاول تفهم الفرق بين الأعراض الجسدية زي عدم الراحة مثلًا، والعوامل العقلية زي القلق الإجتماعي واعرف ان الاتنين ليهم أثر على النوم بشكل كبير.
- كُل أكل صِحي: لما بنعُك في الأكل جِسمنا بيعاند معانا، فلما بتاكل وجبات سريعة ودهون كتير ده بيخلي جسمك يستجيب للإلتهابات والألم وبالتالي صعوبة نومك بتزيد، لكن لما بتاكل أكل صحي معدتك بترتاح وجسمك بيكون أحسن وبالتالي هتنام بشكل أفضل.
- العب رياضة: الرياضة بتخلي أجسامنا تفرز مواد كيمائية تحسسنا بالرِضا والراحة، فبالتالي التوتر بيقل جدًا خاصة لو بنمارس رياضة استرخائية زي اليوجا فبتحسن النفس وبتساعد على تنظيم ضربات القلب فالقلق بيخف تمامًا والنوم بيكون مريح.
نصايح قبل ما تروح تنام
- اعمل روتين ليلي
لو بتعمل نفس الحاجة بنفس الكيفية كل يوم فده هيساعد عقلك يحدد الوقت المناسب لإن اليوم ينتهي، ممكن تغسل سنانك وتقرأ كتاب وتشرب مشروب دافي لمدة كام يوم ورا بعض فهتلاقي إنك بتتعود وبعد ما تخلص آخر حاجة في روتينك بيكبس عليك النوم. - اعمل قايمة
لو انت شخص صعب يروح في النوم عشان بيفكر في شُغل ومهمات اليوم الجديد، ريّح نفسك واكتب كل اللي انت عايزه في ورقة على هيئة قوائم عشان تفضي دماغك قبل النوم. - ابعد عن أي جهاز
هو تحدي صعب جدًا في الجيل الحالي خاصة بعد تعلُّقنا بالموبايلات والتلفزيونات ولكن الضوء اللي بيخرج من الأجهزة دي بيسحب من المُخ الميلاتونين وده الهرمون الأساسي اللي بيساعدنا عالنوم. - خلّي سريرك مُريح
اختار مرتبة مُريحة تناسب جسمك وتفرِّد عليها عمودك الفقري بشكل صِحي ومخدة طبية متكونش بتسببلك وجع في عضلات رقبتك مثلًا أو بتخليك قايم تعبان بحيث إنك لما تحط راسك تحِس بالراحة اللي انت محتاجها وتنام علطول. - طفيّ كل الأنوار
أقفل كل الأنوار اللي ممكن تدخل أوضتك وتاخد من عنيك النوم، استخدم ستاير غامقة عشان تحجب عنك الضوء لما الشمس تطلع لأن النور لو قطع نومك مش هيكون مريح. - استخدام الضوضاء الثابتة
ودي وسيلة بيستخدموها الأمهات في تنويم الرُضع لما بيكون نومهم صعب لأن الصوت لو مستمر بنفس الكيفية بيدخلك في النوم غير إنه بيحجب عنك أي دوشة ممكن تحصل جنبك. - ابعد الساعات والمنبهات عنك
لما مبتعرفش تنام كويس بتقلق ان الوقت يكون اتأخر فبتفضل تبص في الساعة وده بيطير النوم من عينك، غير إنك لو اتبعت النصايح اللي فاتت وفيه ساعة جنبك فبيكون صوت عقارب الساعة موتّر ومستفز
لو انت بقى جربت كل الخطوات دي على مدار اليوم ومعرفتش تنام يبقى لازم في الحالة دي تزور طبيب نفسي يساعدك بالطريقة اللي تناسبك لإن النوم والقلق بينهم علاقة طردية لازم تسيطر على حاجة فيهم عشان تقدر تسيطر عالحاجة التانية وترتاح.
